Luke 12

1I kinde maeca, kan udul dhanu rubanga dupa gicokri karacelo, ketho ginyondri, elar emaku wacu ni julubne kumae, Wukuru ni thobi rni Jufarisayo, ma en e ambili. 2Ento gin moko mbe ma umbre, ma ku binyuthre ngo; ma kandre de ma ku bing’eire ngo. 3Kum kumeno gin ma tek wuwacu i mudho ebiwinjre i der; gin ma wuyero ku the ith i kusika biyere wi udi. 4Man awacu iwu jurimba, Kud wulwor ju ma nego kum, ma yo ku ng’eye gin moko mbe ma gicopo timo. 5Ento apoyowu kum ng’atu ma wubilworo: Wulwor ng’atu, ma tego pare nuti yo ng’ei nek m’enego m’ebolo ko i gehena; eyo, awacu iwu, Wulwore. 6Juloko kira abic ku sente ario ngo? acel de mbe i kindgi m’urwinyo i wang’ Mungu. 7Ento yukwiwu ceke kwandre. Kud wulwor: wu ber ma sagu kira dupa. 8Man awacu iwu kumae, Ku ba dhanu ceke ma bituca i wang’ dhanu, Wod dhanu de bituce i wang’ malaika pa Mungu: 9ento ng’atu ma bikwera i wang’ dhanu jubikwere bende i wang’ malaika pa Mungu. 10Man ku ba dhanu ma biyero lembe kum Wod dhanu, jubiweko lembene ire woko: ento ng’atu m’uyero lembacidi kum Tipo Maleng’ ebiwekre woko ngo. 11Ka gibiterowu de i wang’ cokri, ku jubim, ku weg ng’ol de, cwinywu kud uringi maram wubiloko ko lembe, kadi ang’o ma wubiloko, kadi ang’o ma wubiyero: 12kum Tipo Maleng’ biponjowu i saa maeni nini ku gin ma maku wuyer. 13Ng’atu acel ma kind udul dhanu wacu ire kumae, Japonji, wac ni umira nia epok camupacu wakude. 14Ento ewacu ire kumae, Ng’atu e, ng’a m’uketha ni japoklembe kadi japokpiny i wiwu? 15Ewacu igi kumae, Wubed ku weng’wu, man wukuru giwu ni gin ceke mi kethocwiny hai kum piny: kum kwo pa dhanu mbe i gin m’esagre kudo. 16Man eyero lembabola igi, ewacu kumae, Podho pa jalonyo moko cego cam hai: 17man eporo lembe i ie gire, ewacu kumae, Abitimo ang’o, kum kamoko mbe ira m’aketh ie cam para? 18Ewacu kumae, Abitimo mae: Abimugo dero para, man abigoyo mange ma dit ma sagu; e abiketho cam para ceke ku piny para de keca. 19Abiwacu ni kwo para kumae, Kwo, ibedo ku piny dit m’akana mi rundi dupa; yom, cam, madhi, anyong’a negi de. 20Ento Mungu wacu ire kumae, In i jakasegu, diewor maeni jubilwong’o kwoni i beng’i; man gin m’iyiko, bidong’ ni ng’a? 21Kum ng’atu m’ukanu piny m’akana ire gire bedo kumeni, m’elony ungo de ku ba Mungu. 22Ewacu ni julubne kumae, Ka kumeno awacu iwu kumae, Cwinywu kud uring pi kwo mu, pi gin ma wubicamu; kadi pi kumwu, pi gin ma wubikendo. 23Kum kwo sagu cam, kum de sagu kendi. 24Iwu pid pi ngoro nia gicoyo ngo, gikayu de ngo; ma odkancam migi ku dero de mbe; ento Mungu mio igi cam: piwu sagu pi winyo dit apila! 25Ng’a m’i kindwu ma copo medo kadongone bot acel ni cwinye m’uringo? 26Ka kumeno tek wucopo timo gin maeno ngo ma nyathigi, nedi cwinywu ringo kum gin mange? 27Iwu pid pi thiuboko, maram gidongo ko: gimuli ku tic ungo, gicwio de ngo; ento awacu iwu kumae, Cil Suleman i dwong’ pare ceke eronjre ngo calkud acel ma kind maeni. 28Ento tek Mungu ronyo lum m’i thim kumeno, ma nuti tin, urwo de jubaye i mac; ebironyowu dit ma sagu ngo, E wun ma yioyic mu noki? 29Man kud wuyeny gin ma wubicamu, ku gin ma wubimadhu, kadok pidoic mu de kud ubed jiji. 30Kum gin maeni ceke thek m’i ng’om giyenyo: ento Wegwu ng’eyo nia can gin maeni ceke ni i kumwu. 31Ento wuyeny ker pa Mungu, e giki maeni bimedre iwu. 32Kud wulwor, wun udul ma nyanok; kum enyayu mutoro i Wegwu nimio iwu ker. 33Wulok piny ma wubedo ko, man wumi giramia ni jucan; wukwoi gbethe ma biti ngo iwu giwu, piny m’akana ma thum ungo i polo, ka ma jakwo tundo ceng’ni i ie ngo, kadok ukoko de nyotho ngo i ie. 34Kum ka ma piny m’akana mu ni ie, adundewu bibedo keca bende. 35Dong’ pierwu bed atwia, thala mu de bed m’eliel; 36wun giwu wubed calu dhanu m’ukio rwoth migi, kan ebiai i agba mir ambadha; kara, kan edwogo edwong’o de, giyab ire pio pio. 37Mugisa ni jumiru maeno, ma ka rwoth migi bino ebinwang’u gibekuro: andha awacu iwu, nia ebitwire gire, e ebiketho gibed piny dhu cemo, man ebibino ebitimo igi. 38Man tek ebino i kur mir arionde, man tek i mir adege de, enwang’ugi kumeno de, mugisa ni jumiru maeno. 39Ento wung’ei maeni, nia tek won ot ung’eyo saa ma jakwo bino i ie kuno di ekuro, man eweko ot pare ngo ya jutur. 40Wuyikru bende: kum i saa ma wuwacu nyo ngo e Wod dhanu bino. 41Petro wacu kumae, Rwoth, iyero lembabola maeni iwa, kadi ni dhanu ceke? 42Rwoth uwacu kumae, Ka kumeno ng’a ma jakurpiny mandha ma riek de, ma rwoth pare bikethe wi juode, nimio igi cemo maka migi ka nindone tundo? 43Mugisa ni jamiru maeno, ma ka rwoth pare bino ebinwang’u etimo kumeno. 44Andha awacu iwu, nia ebikethe wi gin ceke m’ebedo ko. 45Ento tek jamiru maeno biwacu i adundene kumae, Rwoth para galu ku bino pare; man ebimaku fodo jutic wadi ma co ku ma nyir de, man ecamu emadhu de, emer de ku kong’o; 46rwoth pa jamiru maeno bibino i ceng’ m’ewacu nyo ebibino i ie ngo, i saa de m’eng’eyo ngo, man ebigoye ma tek, ebiketho maka pare karacelo ku mi jumandha ngo. 47Jamiru maeno, m’ung’eyo yeny ma ii rwoth pare yenyo, eyikre de ngo, etimo de ngo calu yeny ma ii rwodhe yenyo, jubigoye ku goc dupa; 48ento ng’atu m’ung’eyo ngo, man etimo gin m’uromo ku goc de, jubigoye ku goc ma nok. Man ng’atu ma tek jumio ire dupa, jubilwong’o dupa i bang’e: man ng’atu ma tek juketho gin ma dit i kore, e jubikwayu ma sagu i bang’e. 49Abino bolo mac wi ng’om; e ang’o m’ayenyo, tek edaru opo? 50Ento baputisi para nuti ma jubimio ira; man cwinya ng’abre dit ma foketimbre kakare ngo! 51Wuwacu nyo abino kelo kwiocwiny i ng’omi? Awacu iwu kumae, Ungo; ento ma sagu pokri: 52kum ugambre kawono dhanu abic m’i ot acel bipokre, adek bijai ni ario, ario ke ni adek. 53Gibipokri, wego kum wodo, wodo ke kum wego; mego ke ku nyare, nyaku ke ku min mire; wang’u ke ku ci wodo, ci wodo ke ku wang’u mire. 54Ewacu ni udul dhanu bende kumae, Ka wuneno afuru jire yo reto, ndhu ndhu nica wuwacu kumae, Koth ubebino; e etimbre kumeno. 55Man ka wuneno yamu m’uai yor ariwa bekoto, wuwacu kumae, Lietho ma kec bibino; e etimbre de. 56Wu weg ambili, wung’eyo maram wung’io ko wang’ ng’om ku polo; ento nedi wung’eyo ngo maram wung’i ko nindo maeni? 57Nedi wun giwu wuluro gin m’ubedo pwe ngo? 58Kum kinde m’ibecidho i wang’ jabim wuku jadegini, wuyik lembe wukude mor mor ma fodi wuni i yo; emaru ywei ba japoklembe, japoklembe maru mii ni asikari, asikari de maru boli i odkol. 59Awacu iri kumae, Ibiai kakeca ki ngo, ma fodi k’iculo wang’ sente pet kubang’e ngo.

will be added

X\