Luke 11

1Man etimbre, kan eberwo i kar acel, nia kan eweko, kind julubne acel uwacu ire kumae, Rwoth, ponjwa ku rwo, cil calu Yohana bende ponjo julubne. 2Man ewacu igi kumae, Ka wurwo, wuwac kumae, Wegwa, nyingi bed leng’. Ker peri bin. Yeny ma ii yenyo, utimbre i ng’om, calu m’i polo. 3Mi iwa kwen m’uromwa ku ba rupiny. 4Wek iwa dubo mwa woko; kum wan giwa bende waweko lem mi jubanja mwa kubang’gi kubang’gi. Kud iterwa i abidhe. Ento larwa ni ng’atu ma rac. 5Man ewacu igi kumae, Ng’a m’i kindwu m’ubedo ku jarimbe, m’ebicidho i bang’e ku diewor ma ling’, ebiwacu ire kumae, Jarimba, mi ira lungu kwen adek ni banja; 6kum jarimba m’uai i woth uwok i bang’a, man gin moko mbe kuda m’aketh i wang’e; 7e ebidwoko lembe kud i ot ebiwacu kumae, Kud icanda: kawono dhugola bedo acika, nyithindo para de nuti i bang’a wi kavuto; acopo ai nimio iri ngo? 8Awacu iwu kumae, Kadok aaia de ebiai ngo ebimio ire de ngo kum en e jarimbe, ento kum ekwayu asu ebiai ebimio ire calu ma cande ni i kume. 9Man awacu iwu kumae, Wukwai, e ebimire iwu; wuyeny, e wubinwang’u; wudwong’, e ebiyabre iwu. 10Kum ku ba dhanu ceke m’ukwayu gigamu; man ng’atu m’uyenyo enwang’u; ng’atu m’udwong’o de eyabre ire. 11Kum makani m’i kindwu ma wego ma wode bikwaye ku lungu kwen, e ebimio ire kidi? kadi rec, kan ebimio ire thwoli? 12Kadi tek ebikwaye ku tong’gweno, ebimio ire ithi? 13Ka kumeno tek wun, ma wu rac, wung’eyo maram wumio ko giramia ma ber ni nyithindho mu, Wegwu ma ni i polo bimio Tipo Maleng’ m’usagu ngo ni ju m’upenje? 14Ebewodho pajogi ma ajuba. Man etimbre, ka pajogi wok, ng’atu ma ajuba weco; man i udul dhanu wang’ lii. 15Ento kindgi moko wacu kumae, Ewodho pajogi woko ni kum Beelzebul ma jadit mi pajogi. 16Jumange, gimulo ie giyenyo giranyutha m’uai i polo i bang’e. 17Ento en, m’eng’eyo pidoic migi, ewacu igi kumae, Ku ba ker ceke m’upokre gire e eng’eny; man ot de m’upokre kum ot wadi podho. 18Man tek Jok bende pokre i kume gire, ker pare bicungo nenedi? kum wuwacu nia awodho pajogi woko ni kum Beelzebul. 19Tek awodho pajogi woko ni kum Beelzebul, wotwu ke wodhogi woko ni kum ng’a? ka kumeno gibibedo jupoklembe mu. 20Ento tek awodho pajogi woko ni kum lwet Mungu, e ker pa Mungu lund ubino i wiwu. 21Ka ng’atu ma tek ukendo jamtho pare kpo ukuro ot pare gire, jamni pare bedo museme: 22ento tek ng’atu ma tek ma sage bino i bang’e, eloye de, emayu woko jamtho pare ceke m’egeno, epoko ayeki pare de. 23Ng’atu ma jabang’a ngo nwang’u en e jadhoga; man ng’atu ma wacoko wakude ngo nwang’u eketho. 24Tipo m’ucido kan eai kud ii dhanu, ekadhu ku ka ma pi mbe i ie, ku yenyo yom, kan enwang’u ngo de, ewacu kumae, Abidok ba ot para m’aai i ie. 25Kan ewok, enwang’u ot ubedo ayweya aruka de. 26Elund ecidho egamu tipo abiro mange ma dubo migi sagu pare; man gimondo gibedo keno: bedo pa ng’atu maeno macen doko rac ma sagu ma kwong’a. 27Man etimbre, kan eyero lembe maeni, dhaku acel ma kind udul dhanu ting’o dwande, ewacu ire kumae, Mugisa ni ic m’unyoli, ku thuno m’idhodho bende. 28Ento ewacu kumae, Ma sagu, mugisa ni ju m’uwinjo lem pa Mungu, m’uwore de. 29Kinde ma udul dhanu gibecokri karacelo i bang’e, emaku wacu kumae, dhanum’utuk maeni en e dhanum’utuk ma rac: eyenyo giranyutha; man giranyutha moko mbe ma bimire ire ento giranyutha pa Yona. 30Kum calu Yona doko giranyutha ni Junineve, e Wod dhanu bende bibedo kumeno ni dhanum’utuk maeni, 31Ubimo ma dhaku ma yor ariwa bicungo i pokolembe ku dhanum’utuk maeni, man ebipoko lembe i wigi rac: kum eai tung’ ng’om niwinjo rieko pa Suleman; man nen, ng’atu ma sagu Suleman ni keni. 32Dhanu mi Nineve bicungo i pokolembe ku dhanum’utuk maeni, man gibipoko lembe i wigi rac: kum giloko cwinygi kum lembayera pa Yona; man nen, ng’atu ma sagu Yona ni keni. 33Ng’atu moko mbe, ma kan ecwinyo thala, ekethe the ot, kadok the katoko, ento wi thethala, kara ju m’umondo ginen der. 34Thala mi kumi en e weng’i: ka weng’i cungo acel, kumi dho bende pong’ ku der; ento kan ebedo rac, kumi bende pong’ ku mudho. 35Ka kumeno nen tek der ma ni ii kud ubed ni mudho. 36Ka kumeno tek kumi dho pong’ ku der, ma ng’ete kucel col ungo, nwang’u ebibedo pong’ ku der kwa, calu ka thala mio iri der ku rienyne ma ber. 37Nie kan eyero, Jafarisayo penje nia gicam gikude: man emondo, ebedo dhu cam. 38Man ka Jafarisayo neno maeni, ie wang’ lii kum elar ecamu cemo ma fokejom ungo. 39E Rwoth uwacu ire kumae, Nie wun wu Jufarisayo wulwoko kikombe kud atangla ku yo woko; ento kud i iwu wupong’ ku kuvuga kud akece de. 40Wu jukusegu, ng’atu m’utimo yo woko etimo yor i ie bende ngo? 41Ento wumi gin ma ni i iwu ni giramia; e ka gin ceke bibedo leng’ iwu. 42Ento can i wiwu, Jufarisayo! kum wumio apaje mir ukuju kud usiga man uboko ceke, e wuweko ng’olo lembe ma pwe ku mer pa Mungu: ento emaku wutim maeni, man kud wuwek timo wagi maeno. 43Can i wiwu Jufarisayo! kum wumaru kom ma sagu ceke i kacokri, ku moth de i katali. 44Can i wiwu! kum wubedo calu odliel ma nen ungo, ma ju m’ukadhu kud i wigi ging’eyo ngo. 45Man ng’atu acel ma kind jueuthecik udwoko lembe ewacu ire kumae, Japonji, ku yero maeni ijuko wan bende. 46Man ewacu kumae, Can i wiwu bende wu jueuthecik! kum wuketho ter ma yeyo tek wi dhanu, wun giwu de wumulo terne ku lwetwu acel de ngo. 47Can i wiwu! kum wugomo odliel mi jubila, man wegwu negogi. 48Kum kumeno wu jumulembe man wuyio tic pa kwaruwu: kum ginegogi, man wugomo odliel migi. 49Ka kumeno bende rieko pa Mungu wacu kumae, Abioro jubila ku jukwenda i bang’gi; gibinego kindgi moko gibinyayu ragedo i kumgi de; 50kara jubin jupenj rimb jubila ceke, m’ugamu thwogre i thekri mi ng’om, ba dhanum’utuk maeni; 51ugambre kum rimb Habil cil ku rimb Zakaria, m’utho i kind pemblam ku hekalu: eyo, awacu iwu, jubipenjo ba dhanum’utuk maeni. 52Can i wiwu jueuthecik! kum wukabu kifungula mi ng’eyong’ec: wun giwu wumondo ngo, man wucero ju m’ubemondo. 53Kan eai ku keca, jugorcik ku Jufarisayo gimaku yenye ku rop apila, man gicung’e kara eyer pi gin dupa; 54gilibe ko, kara gimak lem moko m’uai i dhoge.

will be added

X\