John 9

1Kan ebekadhu, eneno ng’atu ma wang’e cor ugambre i kanyol pare. 2Man julubne gipenje, giwacu kumae, Japonji, ng’a m’udubo, ng’atuni, kadi junyodo pare, ketho junyole ma wang’e cori? 3Yesu dwoko lembe kumae, Ng’atuni dubo ngo kadok junyodo pare de: ento kara tic pa Mungu nyuthre i kume. 4Wakowatimu tic pa ng’atu m’uora be, ma fodi ceng’ nuti: diewor ubebino, ma ng’atu moko mbe ma copo timo ie tic. 5Ma fodi ani i ng’om, an a der mi ng’om. 6Kan eyero kumeno, eng’ulo lau i ng’om, man etimo ulobo ku laune, man ewiro ulobo i wang’ ng’atu ma wang’e cor, 7ewacu ire kumae, Cidhi, ilog i kut mi Siloam (thelembene ka juloke, Or). Ka kumeno ecidho, elogo de, man ebino m’eneno. 8Ka kumeno juwadi, ku ju ma yang’ ginene, nia en e jakwaipiny, giwacu kumae, Maeni en e ng’atu ma bedo bekwayu piny e ngo? 9Jumange wacu kumae, En e en: jumange ke wacu kumae, Ungo, endre e calu en. Ewacu kumae, An a en. 10Ka kumeno giwacu ire kumae, E ka weng’i yabre nenedi? 11Eloko lembe kumae, Ng’atu ma julwong’o Yesu etimo ulobo ewiro i wang’a de, man ewacu ira kumae, Ci Siloam, ilogi: ka kumeno acidho alogo, e wang’a lero. 12Giwacu ire kumae, Ng’atuno nikani? Ewacu kumae, Ang’eyo ngo. 13Gitero ng’atu ma naka wang’e corne ba Jufarisayo. 14Nwang’u ceng’ ma Yesu timo ie ulobone man eyabu wang’e de en e ceng’ sabatu. 15Ka kumeno Jufarisayo bende gipenje kendo maram wang’e lero ko. Man ewacu igi kumae, Eketho ulobo i wang’a, man alogo, e aneno piny eni. 16Ka kumeno jumoko ma kind Jufarisayo giwacu kumae, Ng’atuni ai ba Mungu ngo, kum ekwiro ceng’ sabatu ngo. Ento jumoko wacu kumae, Ng’atu ma jadubo copo timo giranyutha ma kumeni nenedi? E pokri ni i kindgi. 17Ka kumeno giwacu kendo ni ng’atu ma wang’e cor, Iwacu ang’o pire, ni weng’i m’eyabu? E ewacu kumae, En e jabila. 18Ka kumeno Juyahudi giyio pire ngo nia naka wang’e cor, ka wang’e lero kendo, ma fodi gikulwong’o junyodo pare ngo en e ng’atu ma wang’e lerone, 19man gipenjogi giwacu kumae, Maeni wodwu, ma wuwacu nia junyole ma wang’e cori? e ka kawono ke eneno piny nenedi? 20Junyodo pare gioko lembe giwacu kumae, Wang’eyo nia maeni en e wodwa, nia junyole de ma wang’e cor: 21ento maram eneno ko piny kawono, wang’eyo ngo; kadi nia ng’a m’uyabu wang’e de wang’eyo ngo: wupenje; wang’e teng’ni, ebiyero gire. 22Junyodo pare giyero lem maeni, kum gilworo Juyahudi: kum Juyahudi gidaru ripo lembe, nia tek ng’atu moko bituco ya en e Kristu, e jubikabe woko kud i kacokri. 23Ka kumeno junyodo pare wacu kumae, Wang’e teng’ni; wupenje. 24Ka kumeno gilwong’o ng’atu ma yang’ wang’e cor wang’ arionde, giwacu ire kumae, Mi yung ni Mungu: wang’eyo nia ng’atuni en e jadubo. 25Ka kumeno eloko lembe kumae, Kadok en e jadubo, ang’eyo ngo: ang’eyo gin acel, nia, naka wang’a cor, kawono re aneno piny. 26Gilund gipenje kumae, Etimi nenedi? eyabu weng’i nenedi? 27Eloko lembe igi kumae, Ayero iwu kawono, e wuwinjo ngo; wuyenyo wuwinj lembene kendo nedi? wun bende wuyenyo wudok julubne? 28Man gicaye, giwacu kumae, In i jalubne; ento wan wa julub Musa. 29Wang’eyo nia yang’ Mungu weco ku Musa: ento pi ng’atuno, wang’eyo ngo ka m’eai i ie. 30Ng’atuni dwoko lembe wacu igi kumae, Ei, maeni en e gin ma wang’u ijo, nia wung’eyo ngo ka m’eai i ie, enke eyabu wang’a. 31Wang’eyo nia Mungu winjo weg dubo ngo: ento tek ng’atu moko jarwo ni Mungu, etimo yeny ma ie yenyo de, e ewinje. 32Ugambre ma ng’om uthekre fodi juwinjo ngo nia ng’atu moko yabu wang’ ng’atu ma junyole ma wang’e cor. 33Tek ng’atuno ai ba Mungu ngo, ecopo timo gin moko ngo. 34Giloko lembe giwacu ire kumae, Junyoli ndhu i dubo, man iponjo wani? E girieme woko. 35Yesu winjo nia girieme woko; kan enwang’e de, ewacu ire kumae, Iyio ni Wod Mungu? 36Eloko lembe ewacu kumae, En e ng’a, Rwoth, kara ayi ire? 37Yesu wacu ire kumae, Inene, man en e en ma wubeweco wukude nini. 38Ewacu kumae, Rwoth, ayio. E erwo ire. 39Yesu wacu kumae, Kum lembapoka abino i ng’ombuni, kara ju ma neno piny ungo ginen; man kara ju ma neno piny ke gidok ni abinga. 40Jumoko mi Jufarisayo ma gibedo kugi giwinjo lembe maeni, man gipenje kumae, Wan bende wan abinga? 41Yesu wacu igi kumae, Tek wun abinga, kuno di dubo mbe kudu: ento kawono wuwacu kumae, Waneno piny: kum kumeno dubo mu dong’.

will be added

X\