John 6

1Yo ng’ei gin maeni Yesu cidho loka nam mi Galilaya, ma en e nam mi Tiberia. 2Udul dhanu ma dit de lubo ng’eye, kum gineno giranyutha m’etimo kum ju ma kumgi lith. 3E Yesu idho got malu, man ebedo kuca ku julubne. 4Nwang’u kadhukuwijo ma en e agba mi Juyahudi, udhingo. 5Ka kumeno Yesu m’uting’o wang’e malu, m’eneno de udul dhanu ma dit ubebino i bang’e, ewacu ni Filipo kumae, Wabing’iewo kwen kani, kara joni gicami? 6Ewacu lembe maeni m’emulo ko ie: kum eng’eyo en gin m’ebitimo. 7Filipo loko lembe ire kumae, Kwen mi denarii dak ario de ciromo kugi ngo, ma ka kubang’gi nzu ging’wenyo nyanok nyanok. 8Acel m’i kind julubne, en e Andrea, m’umin Simon Petro, uwacu ire kumae, 9Nyathinyir acel ni keni, ma lungu kwend nganu abic ni kude, ku rec ario: ento maeni ang’o i kind adhudhe ma kumeni? 10Yesu wacu kumae, Wuketh dhanu bed piny. Nwang’u kakeca lum dit i ie. Kum kumeno jumaco gibedo piny, welgi yenyo romo rubanga abic. 11E Yesu ting’o lungu kwen; e kan efoyo pire, epoko ni ju m’ubedo piny; rec bende kumeno calu ma giyenyo. 12E ka giyeng’, ewacu ni julubne kumae, Wucok kodine m’udong’, kara gin moko kud urwiny. 13E gicokogi, man gipong’o katoko apar wi ario ku kodi lungu kwend nganu abic m’udong’ ni ju m’ucamu. 14Nie ka dhanu neno giranyutha m’etimo, giwacu kumae, Maeni jabila andha m’ubebino i ng’om. 15Ka kumeno Yesu m’ung’eyo ya giyenyo bino make ku tego, ya gikethe ni ubimo, eai kendo ecidho wi got e kende. 16Ka piny udoko uthieno julubne giloro piny dhu nam; 17e giidho i combo, man gibecidho Kapernaum loka nam. E i kinde maeni piny uyutho, Yesu de fodi ubino i bang’gi ngo. 18E wang’ nam de maku tuk kum yamu ma dit m’ukoto. 19Ka kumeno ka gikiewo ma yenyo romo ungolo abic kadi abiro, gineno Yesu m’ubewotho ku wi nam, ebedhingo combo de: e lworo makugi. 20Ento ewacu igi kumae, En e an; lworo kud unegwu. 21Ka kumeno giyenyo gijole i combo: e eni eni combo tundo i ng’om ka ma gibecidho i ie. 22Urwone udul dhanu m’ucungo loka nam uneno nia yei mange mbe kakeca, ento acel, nia Yesu de mondo ngo ku julubne i combo, ento ya julubne gicidho kendgi 23(ento yei moko ai i Tiberia ubino ceng’ni ka ma gicamu ie kwen yo ng’ei foyofoc ma Rwoth ufoyo): 24e kan udul dhanu neno nia Yesu mbe kakeca, kadok julubne de, gin gigi gimondo i yei, man gibino Kapernaum, ma gibeyenyo ko ka Yesu. 25Ka ginwang’e de loka nam, giwacu ire kumae, Japonji, ibino kakeni awene? 26Yesu dwoko lembe igi ewacu kumae, Andhandha, awacu iwu, Wuyenya ngo kum wuneno giranyutha, ento kum wucamu lungu kwen wuyeng’. 27Kud wutim pi cam ma nyothre, endre pi cemo m’ubedo mi kwo ma rondo ku rondo ma Wod dhanu bimio iwu: kum Wego, ma Mungu, mwono ayi i kume. 28Ka kumeno giwacu ire kumae, Wabitimo ang’o, kara watim tic pa Mungu? 29Yesu loko lembe ewacu igi kumae, Maeni tic pa Mungu ya wuyi ng’atu m’eoro. 30E giwacu ire kumae, Ka kumeno itimo giranyutha ang’o kara wanen, e wayii bende? itimo ang’o? 31Yang’ wegwa gicamu mana i yamba; calu egore kumae, Emio igi kwen m’uai i polo gicam. 32Ka kumeno Yesu wacu igi kumae, Andhandha, ayero iwu, Kwen m’uai i polo Musa mio iwu en ungo; ento Vwa e m’umio iwu kwen mandha m’uai i polo. 33Kum kwen pa Mungu en e maeno m’uai i polo loro piny, man emio kwo de ni ng’om. 34E giwacu ire kumae, Rwoth, bedimi iwa kwen maeni thiri thiri. 35Yesu wacu igi kumae, An a kwen mi kwo: ng’atu m’ubino i bang’a kec binege ngo, ng’atu m’uyia de rieu binege ki ngo. 36Ento awacu iwu, nia wunena, ere fodi wuyio ngo. 37Ceke ma Wego mio ira gibibino i bang’a: ng’atu m’ubino i bang’a de abibaye woko ki ngo. 38Kum aloro kud i polo piny, nitimo yeny ma ia yenyo an ungo, ento yeny ma i ng’atu m’uora yenyo re. 39Man maeni en e yeny ma i ng’atu m’uora yenyo re, ya kum ceke m’emio ira moko kud urwiny ira, endre aketh ecung i kajikceng’. 40Kum maeni en e yeny ma i Vwa yenyo nia ceke kubang’gi m’uneno Wod, m’uyie de, ubed ku kwo ma rondo ku rondo; man abiting’e malu i kajikceng’. 41Ka kumeno Juyahudi ging’ur i kume, kum ewacu kumae, An a kwen m’uai i polo loro piny. 42Man giwacu kumae, Maeni Yesu ngo, ma wod Yusuf, ma wang’eyo won ku mini? kawono ewacu nenedi kumae, Aai i polo aloro pinyi? 43Yesu loko lembe ewacu igi kumae, Kud wung’ur i kindwu giwu. 44Ng’atu moko mbe ma copo bino i bang’a, tek Wego m’uora kupeye ngo: man abiketho ecungo i kajikceng’. 45Egore i lem jubila kumae, Gin ceke gibinwang’u ponji ba Mungu. Dhanu ceke kubang’gi m’uwinjo ba Wego, m’ugamu ng’eyo de gibino i bang’a. 46En e nia ng’atu moko neno Wego ngo, ndhu ng’atu m’uai ba Mungu, e m’uneno Wego. 47Andhandha, ayero iwu kumae, Ng’atu m’uyio ebedo ku kwo ma rondo ku rondo. 48An a kwen mi kwo. 49Yang’ wegwu camu mana i yamba, man githo. 50Maeni kwen m’uai i polo loro piuy, kara ng’atu m’ucamu kume moko kud etho. 51An a kwen mi kwo m’uai i polo loro piny: tek ng’atu moko camu kwen maeni, ebibedo rondo ku rondo: eyo kwen de m’abimio en e ring’ kuma, pi kwo mi ng’om. 52Ka kumeno Juyahudi gipiembri i kindgi, giwacu kumae, Ng’atu maeni copo mio ring’ kume iwa ya wacam nenedi? 53Ka kumeno Yesu wacu igi kumae, Andhandha, awacu iwu, Tek wucamu ring’ kum Wod dhanu ngo, wumadhu rimbe de ngo, wumbe ku kwo i iwu giwu. 54Ng’atu m’ucamu ring’ kuma m’umadhu rimba de ebedo ku kwo ma rondo ku rondo; man abiketho ecungo i kajikceng’. 55Kum ring’ kuma en e cemo mandha, rimba de en e giramadha mandha. 56Ng’atu m’ucamu ring’ kuma m’umadhu rimba de ebedo i ia, an de abedo i ie. 57Calu Wego ma kwo ora, man abedo de ni kum Wego; kumeno ng’atu m’ucama en bende ebibedo ni kuma. 58Maeni kwen m’uai i polo loro piny: calu ma yang’ wego camu ngo, man githo; ng’atu m’ucamu kwen maeni re bibedo rondo ku rondo. 59Eyero lem maeni i kacokri, kinde m’eponjo i Kapernaum. 60Ka kumeno kind julubne dupa, ka giwinjo maeni, giwacu kumae, Maeni lembe ma tek ng’a ma copo winje? 61Ento Yesu m’ung’eyo i ie gire ya julubne ging’ur kum maeni, ewacu igi kumae, Maeni ketho wukieri? 62Ka kumeno ang’o tek wubineno Wod dhanu beidho ka m’elar ebedo i ie? 63En e tipo ma mio kwo; kum kulokane mbe: lembe m’adaru yero iwu gi tipo, gi kwo de. 64Ento jumoko nuti i kindwu m’uyio ngo. Kum Yesu ng’eyo ku kwong’a ju m’uyio ngo, man ng’atu ma bicibe. 65Man ewacu kumae, Kum lembe nini awacu iwu nia ng’atu moko mbe ma copo bino i bang’a, tek emire ire ku ba Wego ngo. 66Kum maeni kind julubne dupa gidok cen, man giwotho kugi kendo ngo. 67Ka kumeno Yesu wacu ni ju apar wi ario kumae, Wun bendewuyenyo wucidhi? 68Simon Petro loko lembe ire kumae, Rwoth, wabicidho ba ng’a? In i won lembe mi kwo ma rondo ku rondo. 69E wadaru yio wang’eyo de nia in i Ng’atu Maleng’ pa Mungu. 70Yesu loko lembe igi kumae, Agoyo wiwu an ungo wun apar wi ario, man kindwu acel en e wonabali? 71Karaman eyero pi Yuda ma wod Simon Iskariote, kum en e ng’atu ma bicibe, en e acel m’i kind juapar wi ario.

will be added

X\