John 5

1Yo ng’ei gin maeni agba mi Juyahudi nuti; man Yesu idho malu Yerusalem. 2Nwang’u kut nuti Yerusalem ceng’ni dhu gang’ mi rombe, ma julwong’o ku dhu Juebrania Bethesda, ma pondode abic. 3Udul ju ma kumgi lith uvuto i maeni, ku ju ma wang’gi cor, ku ju ma weg abala mi tielo, ku ju m’ulindri, ma gibekuro dhenyni mi pi: 4kum nindo moko malaika pa Rwoth loro piny i kut, man eketho pi dhenyni: e ng’atu ma tek ular umondo yo ng’ei dhenyni mi pi e tho ceke m’unyang’ i kume kei ndhu. 5Nwang’u ng’atu acel nuti keca, m’ebedo ku mulima rundi pier adek wi abora. 6Ka Yesu nene m’ebevuto, eng’eyo de nia ebedo kumeno hai, ewacu ire kumae, Iyenyo kumi titre? 7Ng’atu ma kume lith udwoko ire lembe kumae, Rwoth, ng’atu moko mbe ira, m’uketha i kut kinde ma pi bedhenyni: ento kinde ma abebino ng’atu mange lar loro ira. 8Yesu wacu ire kumae, Ai malu ting’ kavuto peri, iwothi. 9E ndhu ndhu nica kum ng’atuno titre, man eting’o kavuto pare ewotho. Nwang’u ceng’ nino ceng’ sabatu. 10Kum kumeno Juyahudi wacu ni ng’atu ma kume kei nino kumae, Maeni ceng’ sabatu, man cik uyio ngo nik iting’ kavuto peri. 11Ento edwoko lembe igi kumae, Ng’atu m’utito kuma, e m’uwacu ira kumae, Ting’ kavuto peri, iwothi. 12Gipenje kumae, Ng’atu m’uwacu iri, Ting’ kavuto peri wothine en e ng’a? 13Ento ng’atu ma kume kei ung’eyo ngo nia en e ng’a; kum Yesu wodhre cen, udul dhanu de ni kakeca. 14Yo ku ng’ei gin maeni Yesu nwang’e i hekalu, ewacu ire de kumae, Nen, kumi titre ndhu: kud idong’ idub kendo ba, gin ma rac ma sagu maru wok i kumi. 15Ng’atuno cidho ewacu de ni Juyahudi nia en e Yesu m’utito kume. 16Man kum lembe nini Juyahudi ginyayu ragedo kum Yesu, kum etimo gin maeno i ceng’ sabatu. 17Ento Yesu loko lembe igi kumae, Vwa ubetimo tic cil ku kawono de, man an de atimo tic. 18Kum lembe nini Juyahudi yenyo kanege m’usagu, kum ekadhu ku wi cik mi ceng’ sabatu kende ngo, ento elwong’o Mungu ngi ya Won ma dhe, m’ekethre gire ro ku Mungu. 19Yesu lund uloko lembe ewacu igi kumae, Andhandha, awacu iwu, Wod copo timo gin moko gire ngo ma k’eneno Wego betimo ngo: kum gin ma tek etimo, e Wod bende timo ginde kumeca. 20Kum Wego maru Wod, man enyutho ire gin ceke m’etimo en: man ebinyutho ire tic ma sagu maeni, kara iwu wang’. 21Kum calu Wego ting’o ju m’utho, man emio igi kwo, e Wod bende mio kwo ni ju m’eyenyo kumeno. 22Kum kadok Wego de poko lembe wi ng’atu moko ngo, endre emio lembapoka ceke ni Wod; 23kara dhanu ceke giyung Wod cil calu giyungo Wego. Ng’atu m’uyungo Wod ungo eyungo Wego m’uore de ngo. 24Andhaandha, awacu iwu kumae, Ng’atu m’uwinjo lem para, m’uyio ng’atu m’uora de, kwo ma rondo ku rondo ni kude, man ebino ngo i pokolembe, ento ekadhu kud i tho emondo i kwo. 25Andhandha awacu iwu kumae, Saa bebino, man enuti kawono, ma ju m’utho biwinjo ie dwand Wod Mungu; man ju m’uwinjo gibibedo kwo. 26Kum calu Wego bedo ku kwo i ie gire, cil kumeno emio ni Wod bende ku kwo i ie gire: 27man emio ire ng’ol m’etim ko lembapoka, kum en e Wod dhanu. 28Iwu kud uwang’ kum lembe maeni: kum saa bebino, ma ju m’i liel ceke biwinjo ie dwande, 29man gibiwok woko; ju m’utimo ber, ni cer mi kwo; ju m’utimo rac ke, ni cer mi pokolembe. 30Acopo timo gin moko gira ngo: calu awinjo, e apoko lembe: man pokolembe para de pwe; kum asayu yeny ma ia yenyo ngo, ento yeny ma i ng’atu m’uora yenyo re. 31Tek anyutho lembe pira gira, nyutholembe para en e andha ngo. 32Ng’atu mange e m’unyutho pira, e ang’eyo ya gin m’enyutho pira, en e andha. 33Wuoro kwenda ba Yohana, en de enyutho nia en e lemandha. 34Ento nyutholembe m’ajolo ai ba dhanu ngo: ento awacu gin maeni, kara wubothi. 35En e thala m’uliel m’urieny de; man wuyio ya anyong’a negwu mi nindo moko i der pare. 36Ento nyutholembe m’abedo ko e dit ma sagu Yohana; kum tic ma Wego mio ira adar, tic maeni m’atimo enyutho pira, nia Wego ora. 37Man Wego m’uora, enyutho pira. Fodi wuwinjo dwande ngo nindo moko, kadi kite de fodi wuneno ngo. 38Man wumbe ku lem pare m’ubedo i iwu: kum ng’atu m’eoro, wuyie ngo. 39Wuyenyo i lembagora pa Mungu, kum wuwacu nia nyo wubedo ku kwo ma rondo ku rondo i igi; maeni de gi gin m’unyutho lembe pira; 40man wuyenyo ngo wubin i bang’a, kara wubed ku kwo. 41Agamu dwong’ ungo ba dhanu. 42Ento ang’eyowu ya wumbe ku mer pa Mungu i iwu giwu. 43Abino i nying’ Vwa, man wujola ngo: tek ng’atu mange bino i nyinge gire, wubijole. 44Wucopo yio nenedi ma wujolo dwong’ ng’atuman ba wadi man ba wadi, man wuyenyo dwong’ ungo m’uai ba Mungu m’e kende? 45Kud wuwac nyo nia abidotowu ba Wego: ng’atu m’udotowu nuti, en e Musa, ma wuketho genogen mu i kume. 46Kum tek wuyio Musa, kuno di wuyio an; kum egoro pira. 47Ento yek wuyio lembagora pare ngo, wubiyio lem para nenedi?

will be added

X\