John 4

1Ka kumeno ka Rwoth ung’eyo nia Jufarisayo giwinjo ya Yesu ketho julubne ma sagu pa Yohana emio igi baputisi de. 2(kadok Yesu en emio baputisi ngo, endre julubne), 3eweko Yahudi, man ecidho kendo Galilaya. 4Man nia ekoekadh ku i Samaria be. 5Ka kumeno ewok i adhura acel mi Samaria, ma julwong’o Sukar, ceng’ni ng’om ma Yakobo mio ni wode ma Yusuf: 6man kulo pa Yakobo de ni kakeno. Ka kumeno, Yesu m’uol ku woth pare, ubedo kumeno dhu kulo. Nwang’u saa yenyo romo mir abusiende. 7Dhaku ma Samaria bino twomo pi: Yesu wacu ire kumae, Mi ira amadhi. 8Kum julubne ci ng’iewo cam i adhura. 9Ka kumeno dhaku ma Samaria wacu ire kumae, Ebedo nenedi ma in m’i Jayahudi, e m’idong’ ikwayu pi i bang’a e, ma an ke a dhaku mi Samaria? (Kum Juyahudi giribri ngo ku Jusamaria). 10Yesu dwoko lembe ewacu ire kumae, Tek ing’eyo giramia pa Mungu, ku ng’atu m’uwacu iri kumae, Mi ira amadhi; kuno di ipenje, man kuno di emio iri pi mi kwo. 11Dhakune wacu ire kumae, Rwoth, gin moko mbe i beng’i m’itwom ko, man kulone de thuth: ka kumeno inwang’u pi mi kwo maeni kani? 12I dit ma sagu kwaruwa ma Yakobo, m’emio iwa kulo, ma en de emadhu pige, ku wote, man lim pare? 13Yesu dwoko lembe ewacu ire kumae, Ku ba dhanu ceke m’umadhu pi maeni rieu binege kendo: 14ento ng’atu ma tek umadhu pi m’amio ire rieu binege kendo ki ngo; ento pi m’abimio ire bidoko ni kulo ma dhenyni i ie ni kwo ma rondo ku rondo. 15Dhaku wacu ire kumae, Rwoth, mi ira piguno, kara rieu kud unega, kadi kud abin atwom bor kuni. 16Yesu wacu ire kumae, Cidhi, ilwong’ cweri, e kan idwog keni. 17Dhakune dwoko lembe ewacu ire kumae, Cwara mbe. Yesu wacu ire kumae, Iwacu dre kumae, Cwara mbe: 18kum naka ibedo ku cogi abic; man ng’atu m’ibedo kude kawono de en e cweri ngo: maeni iwacu andha. 19Dhakune wacu ire kumae, Rwoth, aneno in i jabila. 20Naka kwaruwa girwo wi goduni; enke wuwacu, nia Yerusalem e ma ka ma maku jurwo i ie. 21Yesu wacu ire kumae, Dhaku, yia, saa bino, ma wubirwo ie ni Wego wi goduni ngo, kadok i Yerusalem de ngo. 22Wurwo ni gin ma wung’eyo ngo: wan re warwo ni gin ma wang’eyo; kum both uai ba Juyahudi. 23Ento saa bino, man enuti kawono, ma ju ma jurwo mandha gibirwo ni Wego i tipo man i lemandha: kum Wego yenyo wagi ju maeni e ma gibed jurwo ire. 24Mungu en e Tipo: man ju m’urwo ire gikogirwo be i tipo man i lemandha. 25Dhakune wacu ire kumae, Ang’eyo ya Masia bebino (ng’atu ma julwong’e Kristu): kan ebino, ebiyero iwa pi gin ceke. 26Yesu wacu ire kumae, An m’ayero iri nini an a en. 27I wi maeni julubne gibino; e igi wang’ lii kum ebeweco ku dhakune; ento ng’atu moko mbe m’uwacu kumae, Iyenyo ang’o? kadi, Nedi wuweco kude? 28Kum kumeno dhakune weko agulu pare, man eai ecidho i adhura, ewacu de ni dhanu kumae, 29Wubin, wunen ng’atu m’uyero ira pi gin ceke ma naka atimo: maeni copo bedo Kristu? 30Giai i adhura ma gibino ko i bang’e. 31I kinde maeni julubne gikwaye, giwacu kumae, Japonji, cam cemo. 32Ento ewacu igi kumae, Cam para nuti mir acama ma wung’eyo ngo. 33Ka kumeno julubne giweco i kindgi kumae, Ng’atu moko kelo ire giracama moko? 34Yesu wacu igi kumae, Cemo para en e timo yeny ma i ng’atu m’uora yenyo, ku daru tic pare bende. 35Wuwacu ngo, Fodi dwi dong’ ang’wen, ka kakaicam biwoki? nen, awacu iwu kumae, Wung’ai weng’wu malu, wunen pothi, ya gidaru thwo mir akaya. 36Ng’atu m’ukayu enwang’u sukulia, man ecoko nying’ ni kwo ma rondo ku rondo; kara ng’atu m’ucoyo ku ng’atu m’ukayu de anyong’a neggi karacelo. 37Kum i maeni lembawaca en e andha kumae, Ng’atu acel ucoyo, ng’atu mange ke kayu. 38Aorowu nikayu maeno ma wumulu ku tic i kume ngo: jumange gimuli ku tije, wun de wumondo i muli mi tic migi. 39Man dhanu mi Jusamaria dupa ma i adhura maeni giyie ni kum lembe pa dhakune, m’etuco kumae, Eyero ira gin ceke ma naka atimo. 40Kum kumeno ka Jusamaria bino i bang’e, gikwaye ya gibed gikugi: man erio keca ceng’ ario. 41Dhanu mange de dupa giyio kum lem pare; 42e giwacu ni dhakune kumae, Kawono wayio ni kum wec peri ngo: kum wawinjo giwa, e wang’eyo nia maeni en e Jabodh mi ng’om andha. 43Yo ng’ei ceng’ ario eai kuca ecidho i Galilaya. 44Kum Yesu en etuco ya jabila mbe ku yung i ng’om pare gire. 45Kum kumeno kan ebino i Galilaya, Jugalilaya gijole, ma gidaru neno gin ceke m’etimo i Yerusalem i agba kum gin bende gicidho i agba. 46Elund ebino kendo i Kana mi Galilaya, ka m’eloko ie pi doko ni pigulok. Nwang’u jakal moko p’ubimo nuti ma kum wode lith i Kapernaum. 47Kan ewinjo nia Yesu ai iYahudi ebino i Galilaya ecidho i bang’e, man ekwaye ya elor piny, ekei kum wode; kum e ceng’ni tho. 48E Yesu wacu ire kumae, Tek wuneno giranyutha ku musana de ngo, wubiyio ki ngo. 49Jakal p’ubimo wacu ire kumae, Rwoth, lor piny ma fodi nyathin para ku tho ngo. 50Yesu wacu ire kumae, Cidh i yo peri; wodi bedo kwo. Ng’atuno yio lembe ma Yesu wacu ire, man ecidho i yo pare. 51Kan ebeloro piny, erombo ku jumiru pare, ma giwacu ire nia wode bedo kwo. 52Kum kumeno epenjogi pi saa ma kume maku kei i ie. Giwacu ire kumae, Nyaworo i saa mir abirone e kume m’ucek uweke. 53Kum kumeno won ung’eyo nia en e saa ma Yesu wacu ie lembe ire kumae, Wodi bedo kwo: e en gire eyio, ku juode kpo. 54Maeni giranyutha mir arionde kendo ma Yesu timo, kan eai i Yahudi ecidho Galilaya.

will be added

X\