John 3

1Nie ng’atu acel nuti mi Jufarisayo, ma nyinge Nikodemo, en e jabim mi Juyahudi: 2ng’atuni bino i bang’e ku diewor, ewacu ire kumae, Japonji, wang’eyo nia in i japonji m’uai ba Mungu: kum ng’atu acel de mbe ma copo timo giranyutha maeni m’itimo, tek Mungu mbe kude. 3Yesu dwoko lembe ewacu ire kumae, Andhandha, awacu iri kumae, Tek junyolo dhanu nyen ungo, ecopo neno ker pa Mungu ngo. 4Nikodemo wacu ire kumae, Jucopo nyolo dhanu kan eti nenedi? ecopo mondo i min wang’ arionde, kan enyole? 5Yesu dwoko lembe kumae, Andhandha, awacu iri kumae, Tek jukunyolo dhanu ku pi ku Tipo de ngo, ecopo mondo i ker pa Mungu ngo. 6Gin ma junyolo ku kum en e kum; man gin ma junyolo ku Tipo de en e tipo. 7Ii kud uwang’ lii kum awacu iri kumae, Jubikonyolowu kendo be. 8Yamu koto yo ku m’eyenyo, man iwinjo dwande de ento ing’eyo ngo ka m’eai i ie, ing’eyo de ngo ka m’ecidho i ie, dhanu ceke kubang’gi ma junyolo ku Tipo bedo kumeno. 9Nikodemo dwoko lembe man ewacu ire kumae, Gin maeni copo timbre nenedi? 10Yesu loko lembe man ewacu ire kumae, In i japonji mir Israel, man ing’eyo gin maeni ngo? 11Andhandha, awacu iri kumae, Wayero pi gin ma wang’eyo, man wanyutho pi gin ma waneno; wun re wujolo lembanyutha mwa ngo. 12Tek ayero iwu pi gin m’i ng’om man wuyio ngo, wubiyio nenedi tek ayero iwu pi gin m’i polo? 13Ng’atu moko mbe m’uidho i polo, ndhu ng’atu m’uloro kud i polo, en e Wod dhanu, ma eni i polo. 14Man calu yang’ Musa ting’o thwol malu i yamba, e kumeno jubikoting’o Wod dhanu malu be; 15kara ng’atu ma tek uyio ubed ku kwo ma rondo ku rondo ni kume. 16Kum Mungu maru ng’om mumbe, ketho emio Wode kulong’, kara ng’atu ma tek uyie kud erwiny ki, endre ebed ku kwo ma rondo ku rondo. 17Kum Mungu oro Wode i ng’om ungo ya upok lembe m’i ng’om rac; endre kara ng’om uboth ni kume. 18Ng’atu m’uyie lem pare pokre ngo: ng’atu m’uyio ngo lem pare daru pokre rac, kum eyio nying Wod Mungu kulong’ ungo. 19Maeni de lembapoka, ya der ubino i ng’om, man dhanu gimaru mudho ma sagu der; kum tic migi rac. 20Kum dhanu ceke kubang’gi ma gitimo rac gidagu der, gibino de ngo ba der, kara kujujuke kum ric pare. 21Endre ng’atu m’utimo lemandha bino ba der, kara tic pare nyuthie, nia gitimbri i Mungu. 22Yo ng’ei gin maeni Yesu ku julubne gibino i ng’om Yahudi; erio keca gikugi, man emio baputisi. 23Yohana bende bemio baputisi i Ainon ma kago ku Salim, kum pi dupa nuti keca: e gibino, gimaku baputisi. 24Kum fodi jukubolo Yohana i odkol ungo. 25Ka kumeno penji nyai i kind julub Yohana ku Juyahudi pi logo. 26Gibino de ba Yohana, giwacu ire kumae, Japonji, en ma naka wubedo wukude loka Yordan, m’inyutho pire, nen, ng’atuni mio baputisi, dhanu ceke de gibino i bang’e. 27Yohana loko lembe ewacu kumae, Ng’atu moko copo jolo gin moko ngo, tek emire ire kud i polo ngo. 28Wun giwu wunyutho pira, nia awacu kumae, An a Kristu ngo, ento, ya juora i wang’e. 29Ng’atu m’ubedo ku mugole en e cwar mugole: ento jarim cwar mugole, m’ucungo m’uwinje de, anyong’a kwa nege kum dwand cwar mugole: ka kumeno anyong’a maeni timbre kakare. 30Ebikosagre be, ento an abikojwik be. 31Ng’atu m’uai malu esagu ceke; ng’atu m’i ng’om en e m’i ng’om, man eyero pi gin m’i ng’om: ng’atu m’uai i polo esagu ceke. 32Gin maeni m’eneno m’ewinjo de, mi maeno enyutho; ng’atu moko mbe de ma jolo lembanyutha pare. 33Ng’atu m’ujolo lembanyutha pare emwono ayine kum maeni nia Mungu en e andha. 34Kum ng’atu ma Mungu oro yero lembe pa Mungu: kum Mungu mio Tipo pa Mungu: kum Mungu mio Tipo ku mukero ngo. 35Wego maru Wod, man emio gin ceke i cinge. 36Ng’atu m’uyio Wod ebedo ku kwo ma rondo ku rondo; ento ng’atu m’uworo Wod ungo bineno kwo ngo, ento kwinyo pa Mungu ni i wie.

will be added

X\