John 20

1Nwang’u i ceng’ ma kwong’ane ma yenga, Mariamu Magdalene cidho pir kugweno ba liel m’aroka i cana, kinde ma fodi piny col col, man eneno kidi ng’iele woko ku dhu liel m’aroka i cana. 2Elund ekwanyu ng’wec, ebino de ba Simon Petro, giku jalub wadi ma Yesu maru, man ewacu igi kumae, Giwodho Rwoth kud i liel m’aroka i cana, wang’eyo de ngo ka ma gikethe i ie. 3Ka kumeno Petro wok woko, giku jalub wadi, man gicidho yo ba liel m’aroka i cana. 4Gin ario de giringo karacelo: jalub wadi de sagu Petro ku ng’wec, elar etundo ba liel m’aroka i cana; 5man kan egung’ eneno i ie de, eneno bongu ma nwang’ uvuto; endre emondo i ie ngo. 6Ka kumeno Simon Petro m’ubelubo ng’eye bende bino, man emondo i liel m’aroka i cana; man eneno bongu ma nwang’ uvuto, 7man kitambala, m’ubedo i wie, evuto karacelo ngo ku bongu ma nwang’, ento ebedo adola ka kende, 8Jalub wadi m’ular utundo ba liel m’aroka i cana, ulund umondo bende eneno, eyio de. 9Kum fodi ging’eyo lembagora pa Mungu ngo, nia ebikoai kendo be ku kind ju m’utho. 10Kum kumeno julub gidok thugi kendo. 11Ento Mariamu cungo acunga yo woko kum liel m’aroka i cana ku ywak: e kumeno, kan ebeywak, egung’ eneno i liel m’aroka i cana; 12man eneno malaika ario ku kendi ma tar gibedo abeda, acel yo ku wic, acel ke yo ku tielo, ka ma kum Yesu kouvuto i ie. 13E giwacu ire kumae, Dhaku, iywak nedi? Ewacu igi kumae, Kum gikabu Rwoth para woko, ang’eyo de ngo ka ma gikethe i ie. 14Kan eyero kumeno elokre yo ng’eye, man eneno Yesu cungo, ere eng’eyo ngo nia en e Yesu. 15Yesu wacu ire kumae, Dhaku, iywak nedi? iyenyo ng’a? En m’ewacu nyo en e jatipodho, ewacu ire kumae, Rwoth, tek itere kamange, yer ira ka m’ikethe i ie, kan abitere kamange. 16Yesu wacu ire kumae, Mariamu. Elokre, ewacu ire de ku dhu Juebrania, Raboni; ma juwacu kumae, Japonji. 17Yesu wacu ire kumae, Kud imul kuma; kum fodi aidho ba Wego ngo; ento ci ba utumira, man iwac igi nia abecidho ba Vwa ba Wegwu de, ba Mungu para man Mungu mu. 18Mariamu Magdalene ubino uwacu ni julub kumae, Aneno Rwoth; nia eyero ire lembe maeni de en. 19Nwang’u ceng’ nica en e ceng’ ma kwong’a ma yenga, ka piny udoko uthieno, nwang’u dhugola de bedo acika ka ma julub ni i ie, ni lworo m’unegogi ni Juyahudi, e Yesu bino ecungo de i diere, ewacu igi kumae, Kwiocwiny ubed i beng’wu. 20E kan edaru yero maeni, enyutho igi cinge ku ng’ete. Ka kumeno anyong’a nego julub ka gineno Rwoth. 21Ka kumeno Yesu wacu igi kendo, Kwiocwiny ubed i beng’wu; calu Vwa ora, an de aorowu kumeno. 22Kan eyero maeni, eyuyo i wigi, man ewacu igi kumae, Wujol Tipo Maleng’: 23dhanu ma tek wuweko dubo migi woko, e dubo migi wekre igi; dhanu ma tek wucero dubo migi, e giceri igi. 24Ento nwang’u Thoma, ma julwong’o Didumo, ma en e ng’atu acel ma kind apar wi ario, embe i bang’gi kinde ma Yesu bino. 25Ka kumeno julub wadi giwacu ire kumae, Waneno Rwoth. Ento ewacu igi kumae, Tek aneno poyo musumali i cinge ngo, aroyo lweta de ngo i poyo musumali, aroyo cinga de ngo i wang’ ng’ete, abiyio ngo. 26Yo ng’ei ceng’ abora julubne ginuti kendo i ie, man Thoma de gini karacelo kugi. Yesu bino, nwang’u dhugola bedo acika, man ecungo i diere, ewacu kumae, Kwiocwiny ubed i beng’wu. 27Elund ewacu ni Thoma kumae, Riei lweti kakeni, inen cinga de; riei cingi de, iroi i wang’ ng’eta: man kud ibed ma yic umbe, ento ma yic nuti. 28Thoma loko lembe ewacu ire kumae, Rwodha ku Munguna. 29Yesu wacu ire kumae, Kum idaru nena, iyio: mugisa ni ju ma gineno ngo, ento giyio. 30Ka kumeno Yesu timo giranyutha mange dupa i wang’ julub m’ugore i kitabu maeni ngo: 31ento maeni gore kara wuyi nia Yesu en e Kristu, ma Wod Mungu; man kara ka wuyio wubed ku kwo i nyinge.

will be added

X\