John 19

1Pilato lund ugamu Yesu, efode de. 2Asikari de kiedo jamkermiwic mir ukudho, giroyo i wie, gironye de ku kendi m’uluga; 3man gibino i bang’e, giwacu kumae, Moth iri Ubimo mi Juyahudi! Gipade de ku cing’gi. 4Pilato wok woko kendo man ewacu igi kumae, Nen, akele woko i beng’wu, kara wung’ei nia anwang’u dubo moko ngo i ie. 5Yesu lund uwok woko, m’ekendo jamkermiwic mir ukudho ku kendi m’uluga. Pilato wacu igi kumae, Wunen ng’atuni! 6Ka kumeno ka julam ma dongo kud asikari ginene, gikok, giwacu kumae, Gure, gure! Pilato wacu igi kumae, Wugame wun, wugure: kum anwang’u dubo moko ngo i ie. 7Juyahudi giloko lembe ire kumae, Cik mwa nuti, man ku cik maeno maku etho, kum ekethre gire ni Wod Mungu. 8Ka kumeno ka Pilato winjo lembe maeni, lworo nege m’usagu; 9man emondo i Odtiti kendo, epenjo Yesu kumae, Iai kani? Ento Yesu loko ire lembe moko ngo. 10Ka kumeno Pilato wacu ire kumae, Iweco i bang’a ngo? ing’eyo ngo nia tego para nuti m’agonyi ko, man tego para nuti de m’aguri ko? 11Yesu loko lembe ire kumae, Tego peri mbe m’itimo ko gin moko i kuma, tek emire iri ku malu ngo: ka kumeno ng’atu m’uciba iri dubo pare sagu. 12Kum lembuni Pilato yenyo kagonye: ento Juyahudi giwoi, giwacu kumae, Tek igonyo ng’atuni, nwang’u i jarim Kaisari ngo: ku ba dhanu ceke ma kethie gire ni ubimo nwang’u ejai ni Kaisari. 13Ka kumeno ka Pilato winjo lembe maeni, ewodho Yesu woko, ejany de wi kom mi pokolembe i ka ma julwong’o Ng’omathora, ento ku dhu Juebrania en e Gabatha. 14Nwang’u en e ceng’ mi Yikopiny mi kadhukuwijo: eyenyo bedo calu en e saa mir abusiende. Man ewacu ni Juyahudi kumae, Nen, Ubimo mu! 15Ka kumeno gikok kumae, Tere cen, tere cen, gure! Pilato wacu igi kumae, Agur Ubimo mu? Julam ma dongo giloko lembe kumae, Ubimo mwa mbe ndhu Kaisari. 16Elund emie igi ya gigure. 17Ka kumeno gigamu Yesu: e ewok woko, m’ebielo yen m’athara ire gire, i ka ma julwong’o Karupokowic, ma julwong’o ku dhu Juebrania Golgotha: 18gigure kakeca, ku jumange ario, acel yo ku, acel ke yo ku, man Yesu ke ni i diere. 19Man Pilato goro ramblembe bende, man ekethe wi yen m’athara. Lembene gore kumae, YESU MA NAZARETI, UBIMO MI JUYAHUDI. 20Ka ku meno dhanu dupa ma kind Juyahudi gisomo ramblembe maeni, kum ka ma juguro ie Yesune ni ceng’ni kud adhura; man egore ku dhu Juebrania, man ku dhu Jurumi, man ku dhu Juyunani. 21Ka kumeno julam ma dongo mi Juyahudi giwacu ni Pilato kumae, Kud igor kumae, Ubimo mi Juyahudi: ento nia ewacu kumae, An a Ubimo mi Juyahudi. 22Pilato loko lembe kumae, Gin m’adaru goro adaru goro ndhu. 23E kan asikari gidaru guro Yesu, gigamu kendi pare gipoko ie ang’wen, ku bang’ asikari ceke ng’atuman ku maka pare; ku jabia bende: nwang’u jabiane kawang’ kwocne mbe, jutheko cwie i wie cik piny. 24Ketho giwacu i kindgi kumae, Ku wayecue ayeca, ento dong’ wagoyue ku jara, ketho wanwang’ ka won: kara lembagora pa Mungu timbre kakare, m’uwacu kumae, Gipoko kendi para i kindgi, Man gigoyo jabia para de ku jara. 25Asikari gilund gitimo gin maeni. Ento min mire cungo the yen m’athara pa Yesu, ku nyamin min de, ma Mariamu ma ci Klopa, giku Mariamu ma Magdalene. 26Ka kumeno ka Yesu neno min mire, ku jalub m’emaru cungo, ewacu ni min kumae, Dhaku, nen wodi! 27Elund ewacu ni jalub kumae, Nen meru! Ugambre i saa maeni jalub udwoke i ot pare. 28Yo ng’ei maeni, Yesu m’ung’eyo nia kawono gin ceke thum, kara lembagora pa Mungu timbre kakare, ewacu kumae, Rieu unega. 29Nwang’u juketho picwa pong’ tabu kakeca: e giketho ucoi pong’ ku picwa wi tiend alagi, gikethe kum dhoge. 30Ka Yesu jolo picwa, ewacu kumae, Ethum: e ekulo wie, man eweko cwinye kadhu. 31Ka kumeno, kum ceng’ maeni ceng’ mi Yikopiny, Juyahudi lund upenjo Pilato nia jutur tiendgi, jutergi cen, kara avujgi kud ubed kor yen m’athara ceng’ sabatu (kum ceng’ sabatu maeno ceng’ ma dit). 32Ka kumeno asikari gibino gituro tiend ng’atu ma kwong’ane, ku pa wadi de ma jugurogi gikude; 33ento ka gibino ba Yesu; gineno de nia edaru tho, gituro tiende ngo: 34ento acel m’i kind asikari cobo ng’ete ku tong’, e ndhu ndhu nica rimo ku pi de thwogre. 35E ng’atu m’uneno enyutho lembe, nyutholembe pare de en e andha: eng’eyo de nia eyero andha kara wun bende wuyi. 36Kum gin maeni timbre, kara lembagora pa Mungu timbre kakare kumae, Jubituro cogone acel de ngo. 37Lembagora mange de pa Mungu wacu kumae, Gibineno ng’atu ma gicobo. 38Yo ng’ei gin maeni Yusuf ma Arimathayo, ma jalub Yesu, ento nyalwe ni lworo mi Juyahudi, epenjo Pilato ya ekab avuj Yesu: Pilato de yio ire. Ka kumeno ebino ekabu avuje. 39Nikodemo bende bino, en e ng’atu m’ubino i bang’e ku kwong’a ku diewor, m’ebekelo mo ma liu ma ng’wice ng’ar m’uribre kud udok, ma yenyo romo mukero pier ang’wen wi abic. 40Kum kumeno giting’o kum Yesu, giriwo ku bongu ma nwang’ kud udok ma ng’wice ng’ar, calu kura kuny mi Juyahudi. 41Nwang’u podho nuti ka ma jugure ie; man liel ma nyen m’aroka i cana nuti i podhone ma fodi juyiko ng’atu moko i ie ngo. 42Gilund giyiko Yesu kakeca (kum liel m’aroka i cana ni ceng’ni) kum en e ceng’ Yikopiny mi Juyahudi.

will be added

X\