John 15

1An a tiend ulok mandha, Vwa ke jatipodho. 2Ku ba janga ceke ma ni i ia ma cego nyinge ngo, ekabe woko: man ku ba janga ceke ma cego nyinge, elonye, kara eceg nyinge ma sagu. 3Kawono wu leng’ ni kum lembe m’ayero iwu. 4Wubed i ia, an de i iwu. Calu jange copo cego nyinge gire ngo, tek ebedo kum tiende ngo; wun de kumeno wucopo ngo, tek wubedo i ia ngo. 5An a tiend ulok, wun wu jange: Ng’atu m’ubedo i ia, an de i ie, ng’atuno cego nyinge dupa: kum wucopo timo gin moko ngo nge kuda. 6Tek ng’atu moko bedo i ia ngo, jubaye woko calu jange, ener de; e jucokogi, jubologi de i mac, man giwang’. 7Tek wubedo i ia, lem para de bedo i iwu, wupenj gin ma tek wuyenyo, manebitimbre iwu. 8I maeni Vwa doko dwong’ ya wucego nyingwu dupa; man wubibedo julubna. 9Cil calu Wego mara, e an bende amaruwu: wubed i merna. 10Tek wuworo cik para, wubibedo i merna; cil calu aworo cik pa Vwa, abedo de i merne. 11Giki maeni ayero iwu, kara anyong’a para bed i iwu, kara anyong’a mu de’pong’. 12Maeni cik para, nia wumeru, cil calu amaruwu. 13Ng’atu moko mbe m’ubedo ku mer ma sagu maeni, nia ng’atu moko mi kwo pare pi jurimbe. 14Wun wu jurimba, tek wutimo gin m’ang’olo iwu. 15Ugambre kawono alwong’owu jumiru ngo; kum jamiru ng’eyo ngo gin ma Rwoth pare timo: ento alwong’owu jurimo; kum gin ceke m’awinjo ba Vwa aketho wung’eyo. 16Wugoyo wia ngo, ento an e m’agoyo wiwu, akethowu de, kara wucidh wuceg nyingwu, nyingwune de dong’: kara gin ma tek wukwayu ba Wego ku nyinga, emi ginde iwu. 17Ang’olo gin maeni iwu, kara wumeru. 18Tek ng’om udaguwu, wung’eyo nia edaga ma fodi k’edaguwu ngo. 19Dok wun wu mi ng’om, kuno di ng’om umaru ma pare: ento kum wun wu mi ng’om ungo, ento agoyo wiwu kud i ng’om, kum kumeno ng’om udaguwu. 20Wupoi kum lembe m’ayero iwu kumae, Jamiru sagu rwodhe ngo. Tek ginyayu ragedo i kuma, gibinyayu ragedo i kumwu bende; tek giworo lembe para, gibiworo mu bende. 21Ento gin maeni ceke gibitimo i kumwu pi nyinga, kum ging’eyo ng’atu m’uora ngo. 22Tek abino ayero igLde ngo, kuno di dubo migi mbe: ento kawono gimbe ku gin ma gilok wie lembe kum dubo migi. 23Ng’atu m’udagu an nwang’u edagu Vwa bende. 24Tek atimo tic i kindgi ngo ma ng’atu mange mbe ma fodutimo, kuno di dubo migi mbe: ento kawono gidaru nena gidaga de waku Vwa. 25Ento maeni timbre, kara lembe m’ugore i cik migi kumae, utimbre kakare, Gidaga mananu. 26Ento ka Jajuk ubino, m’abioro i beng’wu m’uai ba Wego, en e Tipo mi lemandha, m’uai ba Wego, ebinyutho lembe pira: 27e wun bende wubinyutho lembe, kum wubedo i bang’a ugambre ku kwong’a.

will be added

X\