John 11

1Nwang’u ng’atu acel kume lith, en e Lazaro ma Bethania, ma pacu ma thugi Mariamu giku Marsa ma nyamin. 2En e Mariamu maeno m’uwiro Rwoth ku mo ma ng’wice ng’ar, man eyweyo tiende ku yukwie, m’umin mire ma Lazaro kume lith. 3Ka kumeno nyimin gioro kwenda i bang’e, giwacu kumae, Rwoth, nen, ng’atu m’imaru kume lith. 4Ento ka Yesu winjo kumeni, ewacu kumae, Tho maeni en e mi nek ungo, ento pi dwong’ pa Mungu, kara Wod Mungu nwang’ dwong’ ni kume. 5Nwang’u Yesu maru Marsa ku nyamin de man Lazaro. 6Ka kumeno kan ewinjo nia kume lith erio nindo maeno ceng’ ario ka m’ebedo i ie. 7Yo ng’ei maeni elund ewacu ni julubne kumae, Dong’ wacidhu kendo i Yahudi. 8Julubne giwacu ire kumae, Japonji, kawono Juyahudi giyenyo gicenyi ku kidi; e icidho kuca kendo? 9Yesu loko lembe kumae, Ceng’ saane apar wi ario ngo? Tek ng’atu moko wotho ku dieceng’, ekier ungo, kum eneno der mi ng’om maeni. 10Ento tek ng’atu moko wotho ku diewor, ekier, kum der umbe i ie. 11Eyero gin maeni: man yo ng’ei maeni ewacu igi kumae, Jarimbwa Lazaro nindo; ento acidho kara acewe ku wang’ nindo. 12Ka kumeno julub giwacu ire kumae, Rwoth, tek enindo, ebiboth. 13Nwang’u Yesu yero pi tho pare: ento giwacu nyo eyero pi yom ma juyom ko ku wang’ nindo. 14Yesu lund uwacu igi kele kumae, Lazaro tho. 15Anyong’a nega piwu kum ani kuca ngo, kara wuyi; ento dong’ wacidhu i bang’e. 16Ka kumeno Thoma, ma julwong’e Didumo, uwacu ni julub wadi kumae, Wan bende wacidhu kara wathou wakugi. 17Ka kumeno ka Yesu wok, enwang’u nia edaru vuto i liel udoko ceng’ ang’wen. 18Nwang’u Bethania ni kago ku Yerusalem, ma yenyo romo ungolo ang’wen; 19dhanu mi Juyahudi de dupa gibino ba Marsa giku Mariamu, kara gijukgi pir umeggi. 20Ka kumeno ka Marsa winjo nia Yesu bebino, ecidho erombo kude: ento Mariamu bedo asu i ot. 21Marsa lund uwacu ni Yesu kumae, Rwoth tek ande ini keni, kuno di umira tho ngo. 22Cil kawono de ang’eyo nia gin ceke ma tek ibipenjo ba Mungu, Mungu bimio iri. 23Yesu wacu ire kumae, Umeru bicer kendo. 24Marsa wacu ire kumae, Ang’eyo nia ebicer kendo i cer mi kajikceng’. 25Yesu wacu ire kumae, An a cer, ku kwo de: ng’atu m’uyio ira kadok etho ento ebibedo kwo; 26man ng’atu ma tek ubedo kwo en ke eyio ira ebitho ki ngo. Iyio maeni? 27Ewacu ire kumae, Eyo, Rwoth: adaru yio nia in i Kristu ma Wod Mungu, ma ng’atu m’ubebino i ng’om. 28E kan edaru yero maeni, ecidho, man elwong’o Mariamu ma nyamin mung’ mung’, ewacu kumae, Japonji ni keni, man ebelwong’i. 29E en, kan ewinjo maeni, eai pio pio, ecidho i bang’e de. 30(Nwang’u Yesu fodutundo pacu ngo, ento fodi eni ka ma girombo ie giku Marsa.) 31Juyahudi ma gini kude i ot, ma gibejuke de, ka gineno nia Mariamu ai tho wok woko, gilund gilubo ng’eye, ma giwacu nyo eciywak wi liel. 32Ka kumeno ka Mariamu bino ka ma Yesu ni ie enene de, epodho piny the tiende, ewacu ire kumae, Rwoth, tek ini keni, kuno di umira kutho ngo. 33Ka kumeno ka Yesu nene m’ebeywak, ku Juyahudi bende ma gibino kugi gibeywak, ecur kud i ie cwinye de pido, 34man ewacu kumae, Wukethe kani? Giwacu ire kumae, Rwoth, bin inen. 35Yesu ywak. 36Juyahudi gilund giwacu kumae, Wunen maram emare ko! 37Ento jumoko m’i kindgi wacu kumae, Ng’atu m’uyabu wang’ ng’atu ma abinga e, ecopo ketho ng’atuni bende kud utho ngo? 38Ka kumeno Yesu m’ucur kendo kud i ie ebino ba odliel. Nwang’u en e odcana, man jujengo kidi i dhoge. 39Yesu wacu kumae, Wung’iel kidi woko. Marsa, ma nyamin ng’atu m’utho, uwacu ire kumae, Rwoth, kawono ng’wic kume beng’wi; kum etho cenge doko ang’wen. 40Yesu wacu ire kumae, Awacu iri ngo, nia, tek iyio, ibineno dwong’ pa Mungu? 41Ka kumeno ging’ielo kidi cen. E Yesu ting’o wang’e malu ewacu kumae, Vwa, afoii kum iwinja. 42Man ang’eyo nia iwinja thiri thiri: ento kum udul dhanu m’ucungo i vuta ayero, kara giyi nia iora. 43Man kan edaru yero kumeno, ekok ku dwande ma dit kumae, Lazaro, wok woko. 44E ng’atu m’utho wok woko, ma cinge ku tiende bedo ariwa ku bongu mi kuny; wang’e de bedo ariwa ku kitambala. Yesu wacu igi kumae, Wugonye, wek ecidhi. 45Ka kumeno dhanu mi Juyahudi dupa ma gibino ba Mariamu, ma gineno gin m’etimo de giyio ire. 46Ento jumoko m’i kindgi gicidho ba Jufarisayo, man giyero igi pi gin ma Yesu timo. 47Ka kumeno julam ma dongo ku Jufarisayo gicoko dilo, giwacu kumae, Watimu ang’o? kum ng’atuno timo giranyutha dupa. 48Tek waweke kumeno, dhanu ceke biyio ire: Jurumi de bibino kabu kakawa woko ku thek mwa. 49Ento ng’atu acel m’i kindgi, ma en e Kayafa, en e jalam ma dit i rundi maeno, ewacu igi kumae, Wung’eyo gin moko ki ngo, 50kadi wukwanu ngo nia maeni en e ber iwa ya ng’atu acel utho pi dhanu, man kara thek dho kud urwiny. 51Man eyero maeni gire ngo: ento kum en e jalam ma dit i rundi maeno, eewo nia Yesu bitho pi thek; 52man pi thek kende ngo, ento kara ecok nyithindho pa Mungu m’ulal mba bende i acel. 53Kum kumeno ugambre i ceng’ maeno giporo lembe kara ginege. 54Ka kumeno Yesu wotho kele kendo ngo kind Juyahudi, ento eai keca ecidho i ng’om ma ceng’ni yamba, i adhura ma julwong’o Efraim; erio de kakeca giku julub. 55Nwang’u kadhukuwijo mi Juyahudi ni ceng’ni: e dhanu dupa giai i ng’om giidho malu Yerusalem ma fodi kadhukuwijo kuwok ungo, gicidwokri leng’. 56Ka kumeno giyenyo ka Yesu man giwecri i kindgi, ma gicungo i hekalu kumae, Wuwacu ang’o? Ya ebibino i agba ngo? 57Nwang’u julam ma dongo ku Jufarisayo ging’olo, nia, tek ng’atu moko ng’eyo kakare, enyuthe, kara gi make.

will be added

X\