John 10

1Andhandha, ayero iwu kumae, ng’atu ma mondo i dwol mi rombe ku dhugola ngo, ento eidho ku yo ku mange, ng’atuca en e jakwo, man jayek. 2Ento ng’atu ma mondo ku dhugola en e jakwac mi rombe. 3Jakur dhugola yabu ire; rombe de winjo dwande: man elwong’o rombe pare ma dhe ku nying’gi, etelo wigi de woko. 4Kan edaru wodho pare ma dhe ceke woko, etelo wigi, e rombe de gilubo ng’eye: kum ging’eyo dwande. 5Man gibilubo ng’ei welo ngo, ento gibipiei ire: kum ging’eyo dwand welo ngo. 6Yesu yero lembabola maeni igi: ento thelembe m’eyero igi ging’eyo ngo. 7Ka kumeno Yesu wacu igi kendo kumae, Andhandha, awacu iwu, An a dhugola mi rombe. 8Ju m’ular ubino ira ceke gi jukwo ku juyek: ento rombe winjogi ngo. 9An a dhugola; tek ng’atu moko mondo yor i bang’a, ebiboth, man ebimondo ebiwok woko de, ebinwang’u arusi de. 10Jakwo bino ngo, ndhu kara ekwal kwo, eneg nek, enyothi: an re abino kara gibed ku kwo, gibed kude dit apila. 11An a jakwac ma ber: jakwac ma ber mio kwo pare pi rombe. 12Ng’atu ma jatic, ma jakwac ungo, ma won rombe de ngo, kan eneno urudi bebino, eweko rombe, epiei, urudi de makugi, elalugi: 13epiei kum en e jatic, man ie pido pi rombe ngo. 14An a jakwac ma ber; man ang’eyo para ma dhe, para ma dhe de ging’eya, 15cil calu Wego ng’eya, an de ang’eyo Vwa; man amio kwo para pi rombe. 16Rombe para mange nuti, ma gi mi dwonduni ngo: gin bende akoakelgi be, man gibiwinjo dwanda; gibidoko udul acel de, ku jakwac acel. 17Ka kumeno Vwa mara, kum amio kwo para, kara agame kendo. 18Ng’atu moko mbe ma kabe kud i bang’a, ento amie gira. Abedo ku tego m’amie ko, man abedo ku tego m’agame ko kendo. Ajolo cik maeni ba Vwa. 19Ka kumeno pokri nyai kendo kind Juyahudi kum lembe maeni. 20Ju m’i kindgi dupa giwacu kumae, Pajogi ni i ie, abelu make; wuwinje nedi? 21Jumange wacu kumae, Maeni lembe pa ng’atu ma pajogi ni i wie ngo. Pajogi copo yabu wang’ abinga? 22Nwang’u agba mi lilo hekalu nuti Yerusalem: 23nindo mi koyo nuti; Yesu de bewotho i hekalu i pondot pa Suleman. 24Ka kumeno Juyahudi gibino gitieke, gipenje kumae, Ibiketho cwinywa bedo jiji rokani? Tek in i Kristu, yer iwa kele. 25Yesu loko lembe igi kumae, Ayero iwu, man wuyio ngo: tic m’atimo i nying’ Vwa ginyutho pira. 26Ento wuyio ngo, kum wuni i kind rombe para ngo. 27Rombe para winjo dwanda, man ang’eyogi, gilubo ng’eya de: 28amio igi kwo ma rondo ku rondo; man gibirwinyo ki ngo, ng’atu moko mbe de ma bimayugi kud i cinga. 29Vwa, m’umiogi ira, esagu ceke: ng’atu moko mbe de, ma copo mayugi kud i cing’ Vwa. 30An waku Vwa wan acel. 31Juyahudi giting’o kidi kendo nik gicanye ko. 32Yesu loko lembe igi kumae, Tic ma ber dupa m’uai ba Vwa adaru nyutho iwu; kum tic maeni ma kani ma wucanya ku kidi pire? 33Juyahudi giloko ire lembe kumae, Wacenyi ngo ku kidi kum tic ma ber, ento kum icido Mungu; kum in, m’i dhanu, ikethri giri ni Mungu. 34Yesu loko lembe igi kumae, Egore i cik mu kumae ngo, Awacu kumae, Wun wu mungugi? 35Tek elwong’ogi mungugi, ma lem pa Mungu wok i bang’gi (lembagora pa Mungu de copo tur ungo), 36wuwacu pire, ng’atu ma Wego dwoke leng’ eore de i ng’om kumae, Iyero lembacidi; kum awacu kumae, An a Wod Mungu? 37Tek atimo tic pa Vwa ngo, kud wuyia. 38Ento tek atimogi, kadok wuyia ngo, wuyi tic: kara wung’ei wuyi de ya Wego ni i ia, an de ani i Wego. 39Giyenyo kamake kendo: ento ewok kud i cing’gi. 40Man ecidho kendo loka Yordan i ka ma Yohana mio ie baputisi ku kwong’a; ebedo de kakeca. 41Dhanu dupa de gibino i bang’e; giwacu kumae, Andha Yohana timo giranyutha moko ngo: ento gin ceke ma Yohana yero pi ng’atuni en e andha. 42E dhanu dupa giyio ire keca.

will be added

X\