John 1

1Ku kwong’a Lembe nuti, Lembe de bedo ku Mungu, Lembene de en e Mungu. 2Ku kwong’a eni ba Mungu. 3Gin ceke cwire ni kume; man gin moko mbe m’ucwire ma kucwire ni kume ngo. 4Kwo bedo i ie; man kwone en e der mi dhanu. 5Der urieny i mudho; mudho de ng’eye ngo. 6Ng’atu acel, ma Mungu oro ubino, ma nyinge Yohana. 7Ng’atuni bino pi nyuth, kara enyuth lembe mi der, kara dhanu ceke giyi ni kume. 8En e der ungo, endre ebino kara enyuth lembe mi der. 9Maeni en e der andha, ma menyo dhanu ceke kubang’gi m’ubino i ng’om. 10Yang’ eni i ng’om, ng’om de cwire ni kume, e ng’om re ma kung’eye ngo. 11Ebino ba pare ma dhe, man ju ma gi pare ma dhene re gijole ngo. 12Ento ju m’ujole ceke, emio igi tego ma gidoko ko nyithindho pa Mungu, ni ju ma giyio nyinge: 13m’unyole, ku rimo ngo, kadok ku yeny mi kum, kadok ku yeny mi dhanu de ngo, endre pa Mungu. 14Man Lembe doko kum, ebedo de i kindwa (man waneno dwong’ne, dwong’ ma calu pa nyodo ma kulong’ pa Wego), m’epong’ ku bero ku lemandha de. 15Yohana nyutho lembe pire, ekok akoka, ewacu kumae, Maeni en e ng’atu m’ayero pire kumae, Ng’atu m’ubino i ng’eya esaga: kum en e ng’atu ma kwong’a ira, 16kum wan ceke wagamu kum gin m’epong’ ko, man bero wi bero. 17Kum cik umire ni kum Musa; bero ku lemandha bino ni kum Yesu Kristu. 18Ng’atu moko mbe ma foduneno Mungu nindo moko; Wode kulong’, m’eni i kor Wego, enyuthe. 19Maeni lembanyutha pa Yohana, kinde ma Juyahudi gioro julam ku Julawi m’uai Yerusalem i bang’e nipenje kumae, In i ng’a? 20Man etuco, ekwero ngo: etuco kumae, An a Kristu ngo. 21Gipenje de kumae, Ka kumeno ang’o? In i Elia? E ewacu kumae, An a en ungo. Die in i jabila? Edwoko lembe kumae, Ungo. 22Ka kumeno giwacu ire kumae, In i ng’a? kara wadwok lembene ni ju m’uorowa. Iwacu ang’o piri giri? 23Ewacu kumae, An a dwand ng’atu moko m’ukok akoka i yamba kumae, Wutir yo pa Rwoth, calu Isaya ma jabila wacu. 24Man joni gi ju ma Jufarisayo giorogi. 25Gipenje de, man giwacu ire kumae, Ka kumeno tek in i Kristu ngo, kadok Elia de ngo, kadok jabila de ngo, imio baputisi nedi? 26Yohana dwoko lembe igi, ewacu kumae, Amio baputisi i pi: ng’atu acel ucungo i kindwu ma wung’eyo ngo, 27ma en e ng’atu m’ubino i ng’eya, ma thondh wara pare an aromo ngo ya agony. 28Gin maeni timbre i Bethabara, ma loka Yordan, ka ma Yohana mio ie baputisi. 29Urwone eneno Yesu bebino i bang’e, man ewacu kumae, Nen, Nyathi Rombo pa Mungu, ma kabu dubo m’i ng’om woko! 30Maeni en e ng’atu m’ayero pire kumae, Ng’atu m’ubino i ng’eya juketho esaga: kum en e ng’atu ma kwong’a ira. 31Man ang’eye ngo; ento kara enyuthre ni Israel, kum lembe nini abino ku mio baputisi i pi. 32Yohana de nyutho lembe, ewacu kumae, Aneno Tipo ai i polo loro piny pamir akuru; ebedo de i wie. 33Man ang’eye ngo: ento ng’atu m’uora nimio baputisi i pi, ewacu ira kumae, Ng’atu ma tek ibineno Tipo beloro i wie man ebedo i wie, en e ng’atu m’umio baputisi i Tipo Maleng’. 34E aneno, man anyutho nia maeni en e Wod Mungu. 35Urwone kendo Yohana cungo, ku juario ma kind julubne; 36man eneno Yesu kan ewotho, ewacu kumae, Nen, Nyathi Rombo pa Mungu! 37Man julubne ario giwinjo kan eyero, e gilubo ng’ei Yesu. 38Yesu lokre de, man eneno gilubo ng’eye, man ewacu igi kumae, Wuyenyo ang’o? E giwacu ire kumae, Rabbi, (thelembene, ka juloke, Japonji,) ibedo kani? 39Ewacu igi kumae, Wubin, e wubineno. Ka kumeno gibino gineno de ka m’ebedo i ie; man gibedo gikugi ceng’ maeno: nwang’u saa calu mir apaje. 40Acel ma kind juarione m’uwinjo Yohana bewacu, m’ulubo ng’eye de, en e Andrea, m’umin Simon Petro. 41Elar enwang’u umin ma dhe ma Simon, e ewacu ire kumae, Wanwang’u Masia (thelembene, ka juloke, Kristu). 42Ekele ba Yesu. Yesu neno bang’e, man ewacu kumae, In i Simon ma wod Yona: jubilwong’i Kefa (thelembene ka juloke, Petro). 43Urwone eyenyo ecidh i Galilaya, e enwang’u Filipo: man Yesu wacu ire kumae, Luba. 44Nwang’u Filipone en e ng’atu ma Bethsaida, mir adhura ma thugi Andrea ku Petro. 45Filipo nwang’u Nathanael, man ewacu ire kumae, Wanwang’u ng’atu ma Musa goro pire i cik ku jubila, en e Yesu ma Nazareti, ma wod Yusuf. 46Nathanael uwacu ire kumae, Gin moko ma ber copo ai i Nazareti? Filipo wacu ire kumae, Bin inen. 47Yesu neno Nathanael ubebino i bang’e, man ewacu pire kumae, Nen, Jaisraeli mandha ma abombi mbe i ie! 48Nathanael uwacu ire kumae, Ing’eya nenedi? Yesu loko lembe ewacu ire kumae, Ka fodi Filipo kulwong’i ngo, m’ini ther ulam ca, nwang’u aneni. 49Nathanael uloko lembe kumae, Japonji, in i Wod Mungu; in i Ubimo mir Israel. 50Yesu loko lembe ewacu ire kumae, Kum awacu iri nia aneni ther ulam ni, iyio? ibineno giki ma dit ma sagu maeni. 51Man ewacu ire kumae, Andhandha, awacu iwu, Wubineno polo yabre, man malaika pa Mungu m’ubeidho m’ubeloro de wi Wod dhanu.

will be added

X\