James 2

1Juwada, kud wubed ku yic pa Rwoth Yesu Kristu, Rwoth rni dwong’, ma dhanu bedo tung’ tung’ i weng’wu. 2Kum tek ng’atu moko bino i kacokri mu ku lagith mi mola ma kwar, ku kendi ma ber de, man jacan bende mondo i ie ku kendi ma rac; 3e ng’atu m’ukendo kendi ma ber e ma bedo ber i weng’wu, man wuwacu kumae, Dong’ ibed kakae i ka ma ber; ni jacan e ma wuwacu kumae, Cung kaca, kadi ibed the kom mi tienda; 4meni nwang’u wuketho dhanu bed tung’ tung’ i weng’wu i kindwu giwu ngo, man ke wudoko jupoklembe mi lembe ma rac ma iwu pido ngo? 5Wuwinji, juwada ma jumerna; Mungu foyo ju ma gi jucan m’i ng’om ungo ya gilony i yioyici, ma gibed ni jucampacu mi ker m’eng’olo ni ju m’umare? 6Ento wuranju jucan. Julonyo givoyowu ngo, man ke gin nica e ma giywayuwu i wang’ kom mi pokolembe ngo? 7Gicido nying’ mi yung ma wulwongru kudo ngo? 8Ento tek wuketho cik mi ker utimbre kakare, calku lembagora pa Mungu ma kumae, Dong’ imar wat peri calu imeri giri, nwang’u wutimo dre: 9ento tek dhanu bedo tung’ tung’ i weng’wu, nwang’u wudubo, ma cik utuco wiwu ya wu judubo. 10Kum ng’atu ma tek biworo cik kpo, e kan acel ukier ire, meca edoko jadubo mi cik kpo. 11Kum ng’atu m’uwacu kumae, Kud igier mon mi juwedu, e en nini e m’ewacu kumae bende, Kud ineg nek. Nie tek igiero mon mi juwedu ngo, enke inego neki, nwang’u idoko jadubo mi cik. 12Dong’ lembe ma wuweco ku gin ma wutimo de ubed kumeno, calu dhanu ma jubipoko lembe migi ku cik mi gony. 13Kum pokolembe kisa pare mbe ni ng’atu m’unyutho kisa ngo: kisa behaire kum pokolembe. 14Kuloka en e ang’o, juwada, tek ng’atu moko wacu ya ebedo ku yioyic, enke tic umbe kude? yioyic nino copo bodhe? 15Tek umego kadi nyamego ebedo muneru man ke cemo mi ceng’ ku ceng’ umbe kugi, 16e ng’atu acel m’i kindwu wacu igi kumae, Wuci ma cwinywu kwio, kumwu de bed mor wuyeng’ de; ento wumio igi gin ma cande ni i kumgi ngo; nwang’u kulokane en e ang’o? 17Cil kumeno yioyic de, tek ebedo ku tic ungo, en e avu i ie gire. 18Eyo, ng’atu moko biwacu kumae, Ibedo ku yioyic, an ke abedo ku tic: nyuth ira yioyic peri nge ku tic peri, an ke abinyutho iri yioyic para ku tic para. 19Iyio ya Mungu en e acel; itimo dre: pajogi bende giyio, kumgi de bemiel. 20Ento iyenyo ing’ei, in i dhanu ma kiti mbe, nia yioyic ma tung’ ku tic ebedo lule? 21Jugonyo lembe ma wi Ibrahim ma wegwa ku tic ungo, kum ethiero Isak ma wode wi pemblami? 22Ineno ngo ya yioyic utimbre ku tic pare, man ku tic yioyic udoko ndhu cu? 23lembagora pa Mungu de timbre kakare m’uwacu kumae, Man Ibrahim uyio Mungu, e jukwane ire ni bedopwe; man julwong’e jarim Mungu. 24Wuneno nia ng’atu moko lembe m’i wie gonjre ku tic, man ku yioyic kende ngo. 25Kumeno bende Rahab ma won asara lembe m’i wie gonjre ku tic ungo, kum ejolo jukwenda, man eorogi woko ku yo ku mange? 26Kum calu kum nge ku cwiny en e avu, kumeno cil yioyic de ma nge ku tic en e avu.

will be added

X\