James 1

1Yakobo, ma jamiru pa Mungu man pa Rwoth Yesu Kristu, ni dhanu apar wi ario mi Jumulal mba, moth iwu. 2Umego, tek wupodho i udul abidhe, wukwane ceke ni mutoro; 3ma wung’ei ko ya mulo yioyic mu nyayu twiocwiny. 4Man wek twiocwiny ubed ku tic pare ma ndhu cu, kara wubed ndhu cu man dho de, ma wurem i gin moko ngo. 5Ento tek ng’atu moko m’i kindwu rieko mbe kude, wek ekwai Mungu, ma mio ni dhanu ceke ku berocwinye, egamugi ku dhau de ngo; man ebimire ire. 6Ento wek ekwai i yioyic, cwinye kud ubed jiji: kum ng’atu ma cwinye jiji e calu mukura ma yamu leko ethore de. 7Kum ng’atuno ie kud upid nia nyo ebigamu gin moko ba Rwoth; 8ng’atu ma pidoie ario, m’ubelokre swa i yo pare ceke. 9Ento dong’ umego ma nyaswaswa de ulule kum yung ma juyunge ko: 10jalonyo bende, kum jujwige: kum ebikadhu woko pami thiuboko m’i lum. 11Kum ceng’ dongo ku yamu ma lieth, man enero lum: e thiubokone podho, man ke bero mi kite nyothre: kumeno bende jalonyo birwinyo woko i woth pare. 12Ng’atu m’uciro abidhe mugisa kwanye; kum ka judaru mulo ie, ebinwang’u jamkermiwic mi kwo, ma Rwoth ung’olo ni ju m’umare. 13Ng’atu moko tek abidhe betime kud ewac kumae, Mungu bebidha en; kum dubo copo bidho Mungu ngo, en de ebidho ng’atu moko ngo: 14ento ku ba dhanu ceke ng’atuman abidhe time, nwang’u awanyane ma rac uting’e en, e abidhe bidhe. 15Awanyane ma rac, kan egamu ie, elund enyolo dubo: e dubone, kan eteng’ni, ekelo tho. 16Ku juwondwu, umego ma jumerna. 17Giramia ceke ma ber kubang’gi kubang’gi man giramia ceke ma ndhu cu kubang’gi kubang’gi, uai malu, uloro piny ku ba Wego mi der, ma lokri rr umbe kude, kadok tipopiny ma podho kum lokri rr. 18E enyolowa ku lembe mi lemandha, kara wabed ni landu mi mwoka mi ju m’ecwio. 19Umego ma jumerna, wung’eyo lembe maeni. Ento ku ba dhanu ceke wek ng’atuman ubed m’ewinj pio, ebed yo kum wec, kum kwinyo bende; 20kum kwinyo mi dhanu timo bedopwe pa Mungu ngo. 21Kum kumeno wucor lemsasa ceke cen ku dubo m’udhir, man wujol lembe ma jupidho i iwu ku molcwinywu, ma copo bodho ng’eyong’ec mu. 22Ento dong’ wubed jutim lembe, man juwinj awinja kende ngo, ma wubewondru ko giwu. 23Kum tek ng’atu moko e jawinj lembe awinja man e jatim lembe ngo, en e va ng’atu m’ubeneno wang’e ma junyole ko i kieu: 24kum ebenendre gire, ecidho woko de, e ndhu ndhu nica wie wil pir ayine maram ebedo ko. 25Ento ng’atu m’ubeneno i cik ma ndhu cu, cik mi gony, m’ebetimo kumeno de asu, ma en e jawinj awinja kende ngo ma wie wil ento e jatim m’ubetimo, ng’atuni bibedo jamugisa kum tic m’etimo. 26Tek ng’atu moko ie pido ya en e jakisoma, ma k’ecero lebe ngo enke ebewondo adundene, nwang’u kisoma pa ng’atuni en e mananu. 27Kisoma m’alili ma cido de ngo i wang’ Mungu mwa ma Wegwa e ee, ya julieu kic ku mon ma coggi tho i can migi, man ke gwok ma jugwokri ko gijo ni ng’om ma jukuvukri ngo.

will be added

X\