Hebrews 7

1Kum Melkizedek maeni, ubimo mi Salem, jalam pa Mungu ma Malu Ngbir, m’erombo kud Ibrahim nwang’u ebedwogo m’eai i nek mir ubimo man emio ire mugisa, 2ma Ibrahim upoko ire apaje rni gin ceke (ma en e ma kwong’a, ku lembaloka, Ubimo mi bedopwe, man ke Ubimo mi Salem, ma en e, Ubimo mi kwiocwiny; 3m’umbe won, m’umbe min, m’umbe ku thekwaru, ma thek ma ceng’ thekre kudo mbe kude kadok kajik mi kwo de, ento judwoke calku Wod Mungu), m’ebedo jalam thiri thiri. 4Nie dong’ iwu pid maram ng’atu maeni dit ko, ma Ibrahim, ma kwaru ma dit, umio ire apaje mi kum jambayeki ma cu. 5Man gin nini ma gi kind wot Lawi ma gijolo tic pa jalam lembang’ola ni i bang’gi ma gigamu ko apaje mi dhanu calku cik, thelembene, mi jupagi, kadok joni giai i pier Ibrahim: 6ento ng’atu ma thekwaru pare kwandre ngo m’eai ko i bang’gi egamu apaje bang’ Ibrahim, man emio mugisa ire m’e won lembang’ola. 7Ento ma piembe mbe ng’atu ma nok unwang’u mugisa ba ng’atu m’usage. 8Man kakeni dhanu ma tho jolo apaje; ento keca acel, ma junyutho pire ya ebedo kwo. 9Man, calu eyere, ni kum Ibrahim cil Lawi de, m’ejolo apaje, ewodho apaje; 10kum fodi eni i pier won, ka girombo giku Melkizedek. 11Nie tek dokocu ma ndhu nuti ni kum lamulam mi julam pa Lawi (kum dhanu gijolo cik ku the tije), nedi jalam mange wok kendo ma wagi pa Melkizedek, man ma jukwane ngo calu wagi pa Haruni? 12Kum lamulam mi julam lokre, e cik bende ukoulokre be. 13Kum ng’atu ma gin maeni yere pire en e ng’atu m’i suru mange, ma ng’atu moko mbe i ie m’utimo tic mi pemblam. 14Kum ebedo ngbeng’ nia Rwoth mwa ai kud i Yuda; ma Musa kuyero gin moko ngo pi julam mi surune. 15Man gin ma wayero bedo ngbeng’ ma sagu dit apila tek jalam mange wok calu wagi pa Melkizedek, 16ma judwoke jalam, i cik mi tego ma mi kum ungo, endre i tego mi kwo ma kajikne mbe: 17kum junyutho pire kumae, In i jalam mi nja Calu wagi pa Melkizedek. 18Kum juthiro lembang’ola ma kwong’a kum ng’ic pare man kum kuloka pare m’umbe 19(kum cik dwoko gin moko cu ma ndhu ngo), man jukelo i wie genogen ma ber m’usagu, ma wacoro ceng’ni Mungu ni kume. 20Man kum kwong’o kwong’ umbe ngo 21(kum gin andha judwokogi ni julam ma ku kwong’ ungo; ento en re ku kwong’ ni kum ng’atu m’eyero pire kumae, Rwoth ukwong’o man ebilokre gire ngo, In i jalam mi nja); 22m’usagu bende Yesu doko mukwatu mi lembariba ma ber m’usagu. 23Man gin judwokogi julam ma dupa andha, kum ni kum tho gicopo bedo ngo: 24ento en, kum ebedo mi nja, ebedo ku lamulam pare rni julam ma lokre ngo. 25Kum kumeno bende ecopo bodho ju ma gicoro ceng’ni Mungu ndhu ma gwei ni kume, kum ebedo mi nja kara ekwai pigi. 26Kum jalam ma dit ma kumeni umaku wan, m’e leng’, m’umbe abombi, m’ecido ngo, m’ekoire ku judubo, ma judode malu ma sagu polo; 27can wodho lam ma ceng’ ku ceng’ unege ngo, calu julam ma dongo maeno, ma lar mio lam pi dubo pare gire, macen ke pi dubo mi dhanu: kum etimo maeni wang’ acel pil, kan ewodhre gire. 28Kum cik ketho dhanu gibed julam ma dongo ma gi ng’ic; ento lembe mi kwong’ m’uwok yo ng’ei cik, eketho Wod, ma judwoke cu ma ndhu mi nja.

will be added

X\