Hebrews 6

1Kum kumeno wan ma waweko ponji ma kwong’a pa Kristu dong’ wacwala ni dokocu ma ndhu; ma watheko ko the lokocwiny ma waweko ko tic m’utho kendo ngo, ku mi yioyic ma yo ba Mungu de, 2mi ponji mi baputisi, man mi ketho cing’, man mi cer mi ju m’utho, man mi lembapoka ma nja. 3E maeni wabitimo, tek Mungu yio. 4Kum pi ju ma jumio igi der wang’ acel, man m’ubilo girarnia maeni m’i polo, man juketho gibed jugam mi Tipo Maleng’, 5man m’ubilo lembe ma ber pa Mungu, ku tego mi rundi ma biwok, 6e macen gilokri, e dwokogi nyen kendo ni lokocwiny copre ngo; kum giguro Wod Mungu kendo igi gigi, man gikethe ni lewic ma ngbeng’. 7Kum ng’om m’umadhu koth m’ucwi i wie wang’ udul, man etwio dek ma romo ju ma jufure pigi, ejolo mugisa ba Mungu: 8ento tek etwio ukudho kud ucok, e jukwere man e ceng’ni ku kwong’; ma kajikne juwang’e ku mac. 9Ento, jumer, kadok wayero kumeno bende, wageno gin ma ber m’usagu maeno piwu, man gin m’ubedo karacelo ku both: 10kum Mungu en e won gondri ngo ma nia wie wil kum tic mu man mer ma wunyutho kum nyinge, kum wutimo ni jumaleng’, man wubetimo asu. 11Man wayenyo ya ku ba dhanu m’i kindwu ng’atuman unyuth morkume ma calcal mi pong’ mi genogen cil i kajikne: 12kara kud wubed ku molkum, endre wubed jupor mi jucampacu mi lembang’ola ni kum yioyic ku twiocwiny. 13Kum kinde ma Mungu mio lembang’ola ni Ibrahim, kum ng’atu moko mbe m’usage m’ekwong’ i kume, edong’ ekwongre i kume gire, 14ewacu kumae, Andha mugisa abimio iri mugisa, ameda de abimedi. 15Man kumeno, kan edaru ciro ku twiocwinye, enwang’u lembang’olane. 16Kum dhanu kwong’o kwong’ ku gin ma dwong’ ma sagu: man i piem migi ma gipiemo ndri kubang’e kwong’ en e kajik lembe ma ketho tegone. 17I lembe maeni Mungu, m’uyenyo enyuth ni jucampacu mi lembang’ola karamb lokringo mi lembapora pare eketho kwong’ i diere; 18kara ni kum gin ario ma lokre ngo, ma i maeni cwayu ndra copre ngo ni Mungu, wabed ku juk ma tek, wan ma waringo wayenyo ko kaboth kara wamak genogen ma juketho i wang’wa; 19ma wabedo ko calu mangru mi ng’eyong’ec, ma en e genogen mandha ma mi tego de, man ma mondo i maeno ma ni i kusika mi bongu; 20ma Yesu mondo keca piwa calu jawipiro mwa, m’edaru doko jalam ma dit ma nja ma wadi pa Melkizedek.

will be added

X\