Hebrews 4

1Ka kumeno, dong’ lworo negwa, tek lembang’ola mi mondo i yom pare nuti ku jubin junwang’ ng’atu moko m’i kindwu rem pire. 2Kum andha judaru yero lembanyong’a ma juboth ko iwa, cil calu gin bende: endre lembawinja kelo kuloka igi ngo, kum eribre ku yioyic ungo i ju m’uwinjo. 3Kum wan ma wayio wamondo i yom maeno; cil calu ewacre kumae, Calu akwong’o i kwinyo para, Gibimondo ngo i yom para: kadok tic udaru thum cil i kathek mi ng’om. 4Kum ewacu kamoko kumae pi ceng’ abirone, Man Mungu yom i ceng’ mir abirone ni tic pare ceke; 5man i ka maeni kendo kumae, Gibimondo ngo i yom para. 6Ka kumeno kum ebedo kakare ya jumoko bimondo i ie, man ju ma lembanyong’a ma juboth ko lar uyere igi gimondo ngo kum camuco migi, 7eng’olo nindo moko kendo kumae, Tinuni, m’ewacu ko i Daudi i nindo ma cen (cil calu elar ewacre), Tinuni tek wubiwinjo dwande, Kud wudwok adundewu nwang’. 8Kum tek Yocuwa mio igi yom, kuno di k’eyero pi nindo mange macen ungo. 9Ka kumeno yom mi sabatu bedo kakare pi dhanu pa Mungu. 10Kum ng’atu m’udaru mondo i yom pare eyom en gire bende ni tic pare, calu Mungu bende yom ni pare. 11Ka kumeno dong’ waketh cwinywa kum mondo i yom maeno, kara ng’atu moko kud ukier kum camuco m’upore ku maeni. 12Kum lembe pa Mungu e kwo, man etimo, man e bith ma sagu palamularu moko ma lake kun ku kun, m’ecobo ko cil ku poko ng’eyong’ec ku tipo, man ujonj ku mio ma yor i ie bende, man e yot kum ng’io pidoic ku lembapora mir adunde. 13Man giracwia pa Mungu mbe ma kunyuthre ngo i wang’e: endre gin ceke gi muneru man gibedo ayaba ngbeng’ i wang’ ng’atu ma wabedo ku lembe wakugi. 14Ka kumeno wan ma wabedo ku jalam ma dit ma dwong’, m’ekadhu kud i polo, en e Yesu ma Wod Mungu, dong’ wamak lembatuca mwa ki. 15Kum wakubedo ku jalam ma dit ungo ma can kunege ngo kum ng’ic ma wa ng’ic ko; endre ng’atu ma jubidhe kum gin ceke ma calu jubidho kowa, ere ma dubo mbe. 16Ka kumeno dong’ wacoru ceng’ni kom mi bero ku tegocwiny, kara wajol kisa, man wanwang’ bero m’ukonywa i nindo ma can ni i kumwa.

will be added

X\