Hebrews 3

1Kum kumeno, umego ma leng’, ma jurib mi lwong’o m’i polo, iwu pid pi Jakwenda man Jalam Madit mi lembatuca mwa, en e Yesu: 2ma en e mandha ni ng’atu m’ukethe, calu yang’ Musa bende bedo i ot pa Mungu ceke. 3Kum jukwane ya eromo dwong’ ma sagu Musa, calu jagomot bedo ku yung ma sagu yung mi ode. 4Kum ku ba udi ceke m’agoma dhanu gomo en: ento ng’atu m’ugomo gin ceke en e Mungu. 5Man andha Musa bedo mandha i ot pa Mungu ceke va jatic, mi lembatuca mi gin maeno ma biyere macen; 6ento Kristu re calu wod, wi ot pa Mungu; ma ode en e wan nini, tek wamaku tegocwiny mwa ki man kulula mi genogen mwa ku tego cil i kajikne. 7Kum kumeno, cil calu Tipo Maleng’ uwacu kumae, Tin tek wubiwinjo dwande, 8Kud wudwok adundewu nwang’, calu m’i ceng’ camuco, Calu m’i ceng’ muloic m’i yamba. 9Ka ma wegwu gimulo ia i ie ku ponj ma giponja ko, Man gineno tic para rundi pier ang’wen, 10Kum kumeno lembe ton i ia kum dhanum’utuk maeni, Man awacu kumae, Gidubo thiri thiri ku yo i adundegi: Ento ging’eyo yo para ngo; 11Calu akwong’o i kwinyo para kumae, Gibimondo i yom para ngo. 12Wubed ku weng’wu, umego, kara adunde ma rac ma yioyic umbe i ie kud ubed i ng’atu moko mi kindwu, i kier ma jukier ko woko kum Mungu ma kwo: 13ento wujukru ceng’ ku ceng’, cil i nindo ma julwong’o Tin; kara ng’atu moko m’i kindwu cwinye kud udok nwang’ kud abombi mi dubo: 14kum wan wadoko jugam waku Kristugi, tek wamaku thek ma genogen mwa thekre ko ki cil i kajikne: 15kinde ma lembe wacre kumae, Tin tek wubiwinjo dwande, Kud wudwok adundewu nwang’, calu m’i ceng’ camuco. 16Kum ng’a, m’ucamu co ma nwang’u gidaru winjo? eyo, dhanu ceke ma giai kud i Misiri ni kum Musa ngo? 17Man lembe ton i ie i kum ng’a rundi pier ang’weni? en e kum ju m’udubo, ma kumgi podho i yamba ngo? 18Man ekwong’o ni ng’a ya gibimondo ngo i yom pare, en e ni ju ma gicamu co ngo? 19E waneno nia gicopo mondo ngo kum yioyic m’umbe.

will be added

X\