Hebrews 2

1Ka kumeno maku waketh cwinywa ma sagu kum lembe m’uwinjre, kara wiwa kud uwil i kume. 2Kum tek lembe m’uyere ni kum malaika ubedo ku tego, man dubo ceke kubang’e kubang’e ku camuco de unwang’u giramia ma pwe mi sukulia: 3e wabiboth nenedi, tek wagalu kum thwo both ma rokeni ngi? ma Rwoth ular ukwong’o yero, ma ju m’uwinjo uketho ecungo iwa: 4Mungu bende ginyutho gikugi, ku giranyutha ku musana man udul tego de, man ku giramia mi Tipo Maleng’, calku yeny ma ie yenyo gire. 5Kum eketho ng’om ma bibino, ma wayero pire ubed wor ni malaika ngo. 6Ento ng’atu acel e m’utuco kamoko, ewacu kumae, Dhanu en e girang’o, ma ii pido pire e? Kadi wod dhanu de, ma nia iliewe e? 7Iketho edok piny nyanok ma sagu malaika; Iketho jamkermiwic mi dwong’ man yung i wie, Man ikethe wi tic mi cingi: 8Iketho gin ceke bed wor the tiende. Kum i kind ketho gin ceke wor ire, eweko gin moko ngo ma kubedo wor ire ngo. Ento kawono fodi waneno gin ceke jukuketho ubed wor ire ngo. 9Ento wanene ma judwoke piny nyanok ma sagu malaika, en e Yesu, ni kum sendri mi tho ma juketho jamkermiwic mi dwong’ man yung i wie, kara ni kum bero pa Mungu ebil tho pi dhanu ceke kubang’gi kubang’gi. 10Kum emake, ma gin ceke gi pire, ma gin ceke de wok ni kume, i kelo m’ekelo ko wot dupa i dwong’ ya eketh won both migi dok ndhu cu ni kum sendri. 11Kum en m’edwoko jo leng’ man ju ma judwokogi leng’ ceke giai ba ng’atu acel: kum lembe nini lewic unege ngo nilwong’ogi umego, 12m’ewacu ko kumae, Abiewo nyingi ni juwada, I kind udul abiwero pak peri. 13Man kendo, Abiketho genogen para i ie. Man kendo, Nen, an ku nyithindho ma Mungu mio ira. 14Kum nwang’u nyithindho gi jurib ring’o ku rimo, en gire bende egamu maeno nino kumeca; kara ni kum tho ethir ng’atu ma jatego mi tho, ma en e wonabali; 15man kara egony dhanu ceke ma gi ng’eca ku ba rundi migi ceke ni kum lworo mi tho. 16Kum andha emio kony ni malaika ngo, ento emio kony ni kodhi Ibrahim. 17Kum kumeno emake ya juketh ebed calu utumin i gin ceke, kara edok ni jalam ma dit, ma won kisa mandha de i gin pa Mungu, kara eduny pi dubo mi dhanu. 18Kum nwang’u en gire esendre ma jubidhe, ecopo konyo ju ma jubidhogi.

will be added

X\