Galatians 5

1Pir agonya Kristu gonyowa: wucung ki ki ki kumeno, man kud wudok wutwiru kendo i mberembere mi ng’eca. 2Nen, an a Paolo abeyero iwu, nia, tek jutimo yaa i kumwu Kristu biloko iwu gin moko ngo. 3Eyo, atuco kendo ni dhanu kubang’gi nzu ma jutimo yaa i kumgi, nia gi jubanja mi timo cik kpo. 4Wukoc ku Kristu, wun ma wuyenyo lembe m’i wiwu gonjre ku cik; wukiewo ku bero. 5Kum wan ni kum Tipo ku yioyic wabekuro genogen mi bedopwe. 6Kum i Kristu Yesu yaa loko gin moko ngo, kadok yaango bende; ento yioyic re m’ubetimbre ni kum mer. 7Naka wuberingo dre; ug’a m’ucerowu kara kud wuwor lemandha? 8Lembacung’a maeni ai ba ng’atu m’ulwong’owu ngo. 9Ihobi ma nyanok romo i kwen ceke. 10Abedo m’ageno Rwoth piwu, nia wubibedo ku pidoic ma tung’ ungo: ento ng’atu m’ubesendowu biyeyo lembapoka pare, en e ng’atu ma tek enuti. 11Ento an, umego, tek fodi abeyero lembyaa asu, ka ke jubenyayu ragedo i kuma asu nedi? cudho mi kier mi yen m’athara ulund ukadhu woko. 12Ayenyo nia ju m’uketho cwinywu beringo rr githumbri gigi. 13Kum wun, umego, julwong’owu mi gony; endre gony mu kud udwokwu yaca kum lembe mi kum, ento ni kum mer ma jumari ko dong’ wubed jutic mi juwedwu man ni wadi man ni wadi. 14Kum cik kpo timbre kakare i lembe acel, ndhu i maeni: Ibimaru wedu calu imeri giri. 15Ento tek wukeiru man wucembru, e wubed ku weng’wu ba wumaru mwonjru. 16Ento awacu kumae, Wuwoth ku Tipo, e wubiketho awanya ma rac mi kum timbre kakare ngo. 17Kum kum bedo ku kumira kum Tipo, Tipo ke kum kum; kum maeni gi tung’ tung’ ku wadi; kara kud wutim gin ma wuyenyo wutim. 18Ento tek Tipo bepeyowu en, nwang’u wuni the cik ungo. 19Nie tic mi kum ginyuthii, ma gi eni: tarwang’, ku sasa, kud awanya ma rac, 20ku rwo ni ayi gin m’acwia, kud ajoga ma jutimo, kud adegi, ku por, ku ngiri, ku kwinyo, kud ali, ku pokri, ku yic ma tung’ tung’, 21ku kumira, ku mer ma jumer ko ku kong’o, ku miel ma rac, ku wagi gin ma kumeno de; alar apoyowu pi maeni, cil calu yang’ akoapoyowu, nia ju m’ucikutimo wagi gin ma kumeni gibicamu pacu mi ker pa Mungu ngo. 22Ento nying’ Tipo en e mer, ku mutoro, ku kwiocwiny, ku mwonyolembe hai, ku bedo ber ku dhanu, ku berocwiny, ku bedo mandha, 23ku molcwiny, ku kwerigijo, cik umbe kum wagi gin maeni. 24Man ju ma gi pa Kristu Yesu giguro kum kud avane man awanya ma racne de kor yen m’athara. 25Tek wabedo ni kum Tipo, dong’ wawothu bende ni kum Tipo. 26Ku wayeny yung ma juyung kowa mananu, ma wasend ko juwadwa ma nia ng’atuman usend wadi man usend wadi, ma kumua de negwa kum juwadwa man kum wadi man kum wadi.

will be added

X\