Galatians 1

1Paolo, jakwenda (ma dhanu ketho re ngo, kadi ni kum dhanu de ngo, ento ni kum Yesu Kristu, man Mungu ma Wego, m’uting’e kud i kind ju m’utho), 2wakud umego ceke de ma wanuti wakugi, ni kanisa mi Galatia: 3Bero iwu ku kwiocwiny m’uai ba Mungu ma Wego, man Rwoth mwa Yesu Kristu, 4m’umire gire kum dubo mwa, kara elarwa kud i rundi maeni ma rac ma kawono, calu i Mungu mwa ma Wegwa yenyo: 5dwong’ ma rondo ku rondo ubed ire. Amen. 6Ia wang’ lii ka wuai pio kumeno ba ng’atu m’ulwong’owu i bero pa Kristu wudok ba lembanyong’a ma tung’; 7ma en e mange ngo: ento jumoko nuti ma gibeng’abu cwinywu, gibeyenyo gilok lembanyong’a ma juboth ko pa Kristu dok tung’. 8Ento kadok wan, kadi malaika m’uai i polo de, biyero iwu lembanyong’a ma juboth ko ma tung’ ku maeni ma wayero iwu, wek kwong’ ubed i wie. 9Calu walar wawacu, awacu kumeca kendo kawono kumae, Tek ng’atu moko yero iwu lembanyong’a ma juboth ko ma tung’ ku maeno ma wujolo no, wek kwong’ ubed i wie. 10Kum kawono abeyenyo dhanu e m’ufoya, kadi Mungu? kadi abeponjo nyayu mutoro i dhanu? tek abeyenyo nyayu mutoro i dhanu, meca an a jamiru pa Kristu ngo. 11Kum abeketho wung’ei, umego, pi lembanyong’a ma juboth ko m’ayero iwu, ya en e mi dhanu ngo. 12Kum agame ba dhanu ngo, kadi juponja kude aponja de ngo, ento ewok i bang’a ni kum nyuth pa Yesu Kristu. 13Kum wuwinjo pira i rundi m’ukadhu i kisoma mi Juyahudi, maram anyayu ko ragedo kum kanisa pa Mungu hai, man anyothe: 14man ang’eyo kisoma mi Juyahudi ma sagu juwada dupa ma rundi migi ro ku para kind dhanu m’i ng’om ma thuwa, ma ava lemkei pa wegwa nega dit apila. 15Ento kan ebedo ber ni Mungu, m’ukoya, cil kud i ma, man elwong’a ku berone, 16ya enyuth Wode i ia, kara ayer pire kind Thekdhanumange; e pio pio nica wapido lembe waku kum ku rimo de ngo: 17kadok aidho malu Yerusalem de ngo ba ju ma gilar gibedo jukwenda i wang’a: ento acidho para i Arabia; man adwogo kendo Dameski. 18Ka rundi adek ukadhu alund aidho malu Yerusalem niliewo Kefa, wario wakugi de ceng’ apar wi abic. 19Ento jukwenda mange aneno ngo, ndhu Yakobo m’umin Rwoth. 20Nie pi lembe m’agoro iwu no, wunen, i wang’ Mungu, abecwayu ndra ngo. 21Macen abino i ng’om mi Cami ku Kilikia de. 22Nwang’u kanisa mi Juyahudi ma gini i Kristu fodi ging’eyo wang’a ngo: 23ento giwinjo awinja kende kumae, Ng’atu ma naka bedunyayu ragedo i kumwa kawono ebeyero lembe mi yioyic ma naka enyotho; 24e gifoyo Mungu i kuma.

will be added

X\