Ephesians 5

1Ka kumeno wubed jukwany ba Mungu, va nyithindho ma jumer; 2man wuwoth i mer, cil calu Kristu bende maruwa, man emire gire piwa, ni giramia ku lam de ni Mungu ni ng’wic gin ma ng’wi ng’ar. 3Ento tarwang’, ku sasa ceke, ku kethocwiny hai kum piny, dong’ kud elwongre i kindwu ki, calu m’umaku jumaleng’; 4kadok lemblewic, kadi sosiwec, kadi lele, m’umaku piny ungo: ento ma sagu re mio foyofoc. 5Kum maeni wung’eyo andhandha, nia won tarwang’, kadok jasasa de, kadok ng’atu ma ketho cwinye hai kum piny, ma en e jarwo ma ni ayi gin ma acwia, umbe ku camupacu i ker pa Kristu ku pa Mungu. 6Kud wuyi ng’atu moko wondwu ku lembe ma ie nanu: kum kwinyo pa Mungu wok wi wot juco ni kum gin maeni. 7Ka kumeno kud wuribru karacelo kugi; 8kum naka wun wu mudho, ento kawono dong’ wun wu der ni kum Rwoth: wuwoth pami nyithindho mi der 9(kum nying’ der eni i berocwiny ceke man bedopwe ku lemandha de), 10ma wubeponjo ya girang’o ma nyayu mutoro i Rwoth; 11man kud wuribru ki ku tic mi mudho ma cego nyinge ngo, ento ma sagu re wuketh ging’ei pi dubo migi; 12kum en e lewic niweco pi gin m’utimbre ni kumgi ling’. 13Ento gin ceke ma tek juketho jung’eyo pi dubo enyuthie ni kum der: kum gin ceke m’unyuthre en e der. 14Kum kumeno ewacu kumae, Dong’ iceu, in ni’ibenindo, man iai i kind ju m’utho, man Kristu birieny i wii. 15Ka kumeno wubed ku weng’wu maram wuwotho ko, calu ju ma jurieko ngo ngo, endre calu jurieko; 16ma wubeng’iewo nindo, kum ceng’ gi rac. 17Kum kumeno kud wubed jukusegu, ento dong’ wung’ei karamb yeny ma Rwoth uyenyo. 18Man kud wumer ku pigulok, ma ie ju rop, ento dong’ Tipo re m’uromwu; 19ma wubewecru ku lembwer man wer ku wer mi tipo de, ma wubewero man wubeketho ko badwal ma mit ku i adundewu ni Rwoth; 20ma wubemio ko foyofoc thiri thiri pi gin ceke i nying Rwoth mwa Yesu Kristu ni Mungu ma Wego. 21Ma wubekethru ko giwu ya wubed wor ni juwedu i lworo pa Kristu. 22Mon, wubed wor ni cogwu ma dhe, calu ni Rwoth. 23Kum cwar dhaku en e wic ni dhaku, calu Kristu en e wic ni kanisa, ma en gire en e jalar mi kum. 24Ento calu kanisa bedo wor ni Kristu, e mon bende dong’ gibed kumeno ni coggi i gin ceke. 25Cogmon, wumar mondwu, cil calu Kristu bende maru kanisa, man emire gire pire; 26kara edwoke leng’, m’edaru lonye ku lwok mi pi ku lembe, 27kara ethier ire gire kanisa ma en e dwong’, ma poyo de mbe kadi bel de mbe kadok wagi gin ma kumeno de; ento kara ebed leng’ ma mulima de mbe. 28Cil kumeno maku cogmon bende gimar mondgi ma dhe calu kumgi gigi. Ng’atu m’umaru cege ma dhe nwang’u emare gire; 29kum ng’atu moko mbe m’udagu kume gire; ento etunge man egwoke, cil calu Kristu bende gwoko kanisa; 30kum wan wa wathkum mi kume. 31Kum kum lembe nini ng’atu ma nico biweko won ku min, man ebimoko kum cege; man gin ario gibidoko kum acel. 32Giramung’a maeni e dit; ento ayero pi Kristu man pi kanisa. 33Endre wun bende kubeng’wu kubeng’wu ng’atuman umar cege gire cil calu en gire; man dhakune bed ku wang’e m’elwor ko cware.

will be added

X\