Ephesians 3

1Kum lembe nini an a Paolo, ma jakol pa Kristu Yesu pi wun ma wu Thekdhanumange, 2tek ebedo kumeno ya wuwinjo pi tic mi pokopok mi bero maeni pa Mungu m’umire ira iwu; 3maram juketho ang’eyo ko giramung’a ni kum nyuthonyuth calu alar agoro ku lembe ma nyanok, 4ku maeni, ka wusomo, wucopo ng’eyo ng’eyong’ec para i giramung’a pa Kristu; 5ma kum dhanum’utuk mange juketho eng’eire ngo ni wot dhanu, calu ma kawono enyuthre ni jukwenda pare ma leng’ man jubila i Tipo; 6ya, Thekdhanumange gi juwagi jucampacu, man gi juwagi wathkum mi kum acel, man juwagi jugam kum lembang’ola i Kristu Yesu ni kum lembanyong’a ma. juboth ko, 7ma judwoka jatimne, calku giramia mi bero maeno pa Mungu m’umire ira calku tim m’etimo mi tego pare. 8Bero maeni jumio ira, an nini m’a nok ma sagu jumaleng’ ceke, ya ayer pi lonyo pa Kristu ma yenjre ngo ni Thekdhanumange; 9ya aketh dhanu ceke de ginen karamb tic mi pokopok mi giramung’a m’ugamu pandre por yang’ con i Mungu m’ucwio gin ceke; 10kara kwond rieko pa Mungu ma dupa ung’eire kawono ni ker man tego i ka mi polo ni kum kanisa, 11calku yeny ma ie yenyo ma nja i Kristu Yesu Rwoth mwa: 12ma wabedo ku tegocwiny i ie, ku mondo ma wamondo ko i bang’e, ku genogen, ni kum yioyic mwa ma wayie ko. 13Kum kumeno akwayu ya cwinywu kud udieng’ kum masendi m’asendra ko piwu, ma en e dwong’ mu. 14Kum lembe nini arum wi conga ni Wego, 15ma julwong’o ire nying wat ceke kubang’gi kubang’gi mi polo ku ma wi ng’om bende, 16kara emi iwu, calku lonyo mi dwong’ pare, ya tego medre iwu ni kum Tipo pare i ng’atu m’i iwu; 17kara Kristu bed i adundewu ni kum yioyic; kara wun, ma ulegwu daru mondo unyang’ de i mer, 18wubed ku tego karacelo ku jumaleng’ ceke ma wung’ei ko karamb lacne ku kaborne man kadongone ku kathuthne, 19man kung’eyo mer pa Kristu ma sagu ang’eya, kara jupong’wu ni pong’ pa Mungu ceke. 20Nie ni ng’atu m’ecopo timo dit apila ma sagu gin ceke ma wapenjo kadi ma wapido pire, calku tego m’ubetimbre i iwa, 21dong’ dwong’ ma i kanisa ku ma i Kristu Yesu ubed ire cil ku dhanum’utuk ceke rondo ku rondo de. Amen.

will be added

X\