Ephesians 1

1Paolo, ma jakwenda pa Kristu Yesu ni kum yeny ma Mungu yenyo, ni jumaleng’ ma ni i Efeso, man jumandha i Kristu Yesu: 2Bero iwu man kwiocwiny m’uai ba Mungu ma Wegwa man Rwoth Yesu Kristu. 3Mugisa ni Mungu ma Won Rwoth mwa Yesu Kristu, m’umio mugisa iwa ku ba mugisa ceke mi tipo i ka mi polo i Kristu: 4cil calu yang’ elwong’owa i ie ka fodi theng’om kuthekre ngo, nia wabed leng’ ma poyo de mbe i wang’e i mer: 5nwang’u elar ekethowa ni dwok ma judwoko kowa ni wote ire gire ni kum Yesu Kristu, calku mutoro mi yeny ma ie yenyo, 6ni pak mi dwong’ mi berone, m’edhenyo bwom iwa i Jamer; 7ma wanwang’u war i ie ni kum rimbe, ni wek mi kier mwa, calku lonyo mi berone, 8m’eketho usagre i bang’wa i rieko ceke ku riu de, 9m’eketho wang’eyo giramung’a mi yeny m’eyenyo, calku mutoro ma ie wacu nik ebitimo i ie 10kara i nindo mi pong’ mi rundi, ecok kwai giki ceke i Kristu, giki m’i polo, ku giki ma wi ng’om bende; i ie, awacu, 11ma i ie bende judwokowa ni camupacu, nwang’u elar ebedo aketha ku kwong’a calku yeny ma ie yenyo m’etimo gin ceke m’elubo ko lembapora mi yeny ma ie yenyo; 12kara wabed ni pak mi dwong’ pare, wan ma walar wageno i Kristu; 13i ie wun bende, ma wudaru winjo lembe mi lemandha, ma en e lembanyong’a mi both ma juboth ko, i ie, nwang’u wudaru yio bende, juketho ayi i kumwu ni kum Tipo Maleng’ mi lembang’ola, 14ma en e mukwatu mi camupacu mwa, ni war mi piny pare gire, ni pak mi dwong’ pare. 15Kum lembe nini an bende, m’adaru winjo pi yioyic ma ni i kindwu i Rwoth Yesu, man ke mer ma wunyutho yo ba jumaleng’ ceke, 16aweko ki ngo nifoyo foc piwu, m’ayero ko piwu i rwo para; 17kara Mungu pa Rwoth mwa Yesu Kristu, ma Wego mi dwong’, umi iwu tipo mi rieko ku nyuth mi ng’ec ma jung’eye ko; 18ma wang’ mir adunde mu bedo ma der ucare, kara wung’ei karamb genogen mi lwong’o pare, karamb lonyo mi dwong’ mi camupacu pare i jumaleng’, 19man karamb dwong’ ma apila mi tego pare yor i bang’wa ma wayio, calku timo maeno mi tego mi tek pare 20m’etimo i Kristu, kan eting’e ku kind ju m’utho, man eketho ejany yo ku cinge ma yor acwic i ka mi polo, 21malu ngbir wi bimobim, ku ng’ol, man tego, ku kero, man wi nying’ ceke kubang’gi kubang’gi ma jucaku, i ng’om maeni kende ngo, ento i maeno ma bibino bende; 22man eketho gin ceke bed wor the tiende, man emie ya ebed wic wi gin ceke ni kanisa, 23ma en e kume, pong’ pare m’epong’o ceke i ceke.

will be added

X\