Colossians 3

1Ka kumeno tek juting’owu karacelo ku Kristu, wuyeny gin ma ni malu, ka ma Kristu ni i ie, m’ejany ko yo ku cing’ Mungu ma yor acwic. 2Wuketh pidoiwu kum gin ma malu, kum gin ma wi ng’om ungo. 3Kum wutho, man kwo mu bedo apana karacelo ku Kristu i Mungu. 4Ka Kristu, ma kwo mwa, binyuthie, e wun bende wubilund nyuthiu wukugi i dwong’. 5Ka kumeno wuneg wathkumwu ma gini i ng’om: tarwang’, sasa, awanya ma rac, ayiri, ku ketho cwiny hai kum piny, ma en e rwo ma ni gin m’acwia; 6kum gin maeni kwinyo pa Mungu wok wi wot juco: 7ma wun bende yang’ wuwotho i ie, kinde ma fodi wubedo i gin maeni; 8ento kawono wun bende dong’ wucorgi ceke cen: ng’ecwiny, ku kwinyo, kud akece, ku cayucac, ku lemblewic ma ai kud i dhogwu: 9kud wucwai ndra ma nia ng’atuman ucwai ni wadi man ni wadi: kum wudaru wanyu ng’atu ma con cen ku tic pare de, 10man wuronyo ng’atu ma nyen, m’ubecikudoko nyen ku ng’eyong’ec calu ayi ng’atu m’ucwie: . 11ma kadok Jayunani kadi Jayahudi, kadi yaa, kadok yaango de, kadi dhanu ma sai, kadok Jakuthi, kadi ng’eca, kadi paker de ceke gicopo bedo i ie ngo; ento Kristu re en e gin ceke, man i gin ceke. 12Ka kumeno wurony, calu dhanu ma Mungu goyo wigi, ma leng’ man jumer de, adunde mi ngisi, ku bedo ber ku dhanu, ku ming’o, ku molcwiny, ku mwonyo lembe hai; 13ma wuoi ko lembe ma kum juwedu ma ng’atuman uoi lembe ma kum wadi man kum wadi, ma wuwek ko lembe ma kum juwedu ma ng’atuman uwek lembe ma kum wadi man kum wadi, tek ng’atu moko lembe ni i ie kum ng’atu moko: cil calu Rwoth uweko lembe mu, e wun bende wutim kumeno: 14man ma sagu gin maeni ceke wurony mer, ma en e twic mi doko cu ma ndhu. 15Man wek kwiocwiny pa Kristu bim wi adundewu, ni maeni bende julwong’owu i kum acel: man wubed ma wufoyo foc. 16Wek lembe pa Kristu sagre i iwu; i rieko ceke ma wubeponjru man wubejukru ku lembwer man wer ku wer mi tipo, ma wubewero ku bero i adundewu ni Mungu. 17Man gin ceke ma tek wutimo, i lembe kadi i tic, tim ceke i nying Rwoth Yesu, ma wufoi ko Mungu ma Wego ni kume. 18Mon, wubed wor ni cogwu, calu m’umaku piny i Rwoth. 19Wu cogmon de, wumar mondwu, man kud wukecgi. 20Nyithindho, wuwor junyodo mu i gin ceke, kum maeni nyayu mutoro i Rwoth. 21Wego, kud wunyai ng’ecwiny i nyithindho mu, kara kud wukab cwinygi. 22Jumiru, wuwinj dwand judongo m’i wiwu ma ku kum i gin ceke; ku tic ma ku wang’ ungo, calu ma dhanu maru, ento kud adunde acel, mi lworo Rwoth: 23gin ceke ma tek wutimo, wutim ku cwinywu ceke, calu ni Rwoth, ni dhanu de ngo; 24ma wung’eyo ko nia wubigamu sukulia mi camupacu ba Rwoth: wutimo ni Rwoth Kristu. 25Kum ng’atu m’utimo rac ebinwang’u kendo en nini m’etimo rac: man dhanu tung’ tung’ ungo.

will be added

X\