Colossians 2

1Kum ayenyo wung’ei maram aii ko aiia piwu, man pi ju ma Laodikia, man pi ju ma fodi gikuneno wang’a mi kum ungo; 2kara adundegi jukre, gi ju ma juribogi karacelo i mer, man ni lonyo ceke mi kwiocwiny ma pong’ mi ng’eyong’ec, kara ging’ei giramung’a pa Mungu, ma Kristu, 3ma piny m’akana ceke mi rieko ku ng’eyong’ec de ubedo apana i ie. 4Ayero maeni, kara ng’atu moko kud ubombwu ku lembacung’a mi wec. 5Kum kadok ambe i beng’wu ku kum, endre wanuti wakudu i cwiny, ma mutoro benega kan abeneno bedo mu ma kakare, man ke cungo mi yioyic mu i Kristu. 6Ka kumeno calu wudaru jolo Kristu Yesu ma Rwoth, e wuwoth i ie kumeno, 7ma ulegwu nyang’ ma wugombru de i ie, ma wunyang’ i yioyic mu de, cil calu juponjowu, ma wusegru ko i foyofoc bende. 8Wubed ku weng’wu kara ng’atu moko kud udwokwu ni jambayeki ku lembrieko pare man kud abombi mananu, tok lembkei mi dhanu, tok ponji ma kwong’a m’i ng’om, ma ku tok Kristu ngo: 9kum Rucwic upong’ thur i ie ma ku kum, 10man i ie wun de wupong’o thur, ma en e wi ker ku tego ceke: 11i ie de jutimo yaa i kumwu bende ku yaa ma jutimo ku cing’ ungo, i roc ma kum mi ring’kum roc ko, i yaa pa Kristu; 12ma judaru yikowu wukugi i baputisi, man juting’owu bende i ie wukugi ni kum yioyic i timotim pa Mungu, m’uting’e ku kind ju m’utho. 13E wun, kinde ma nwang’u wuni i tho kum kier mu man kumwu ma jukutimo yaa i kume ngo, wun, awacu, edwokowu kwo karacelo kude, nwang’u eweko iwa kier mwa ceke; 14nwang’u eruco lembagora mi cik m’utuco wiwa, m’eketho wang’e i kumwa: man ekabe cen kud i yo, m’egure ko kor yen m’athara ku musumali; 15nwang’u enyotho ker ku tego de, eketho gibedo giranena ma ngbeng’, m’eloyogi ma gwei i ie. 16Ka kumeno ng’atu moko kud upok lembe iwu kum giracama, kadi kum giramadha, kadi kum ceng’ agba kadi mi dwi ma por kadi ceng’ sabatu; 17ma en e tipopiny mi gin ma bibino; endre kum en e pa Kristu. 18Ng’atu moko kud umai giragama mi kwaya mu ku yeny ma ie yenyo mi molcwiny ku rwo ma ni malaika de, m’ebedo ndhu i gin m’eneno, m’etingre mananu kum pidoic mi kum, 19m’emoko kr ngo kum Wic ma kum dho gamu gin m’ucope i bang’e, m’eribre de karacelo ni kum ujonje ku ler, ebenyai de ku nyai pa Mungu. 20Tek wutho ku Kristu ni ponji ma kwong’a m’i ng’om, nedi, wudong’ wumiru giwu ni lembapoka, calu ju ma gibedo i ng’om, 21Kud wumaki, kadok abila de, kadok amula de 22(gin ceke ma gibinyothri i tim), tok lembang’ola ku lemponji mi dhanu? 23Gin maeni bedo andha ni giranena mi rieko i rwo ma ijo maru, ku jwigri gijo, ku sendo kum: ento gin maeni kulokane mbe ma dhiro wi awanyakum.

will be added

X\