Colossians 1

1Paolo, jakwenda pa Kristu Yesu ni kum yeny ma Mungu yenyo, man Timoteo m’umegwa, 2ni jumaleng’ man umego mandha i Kristu ma gini i Kolosai: Bero iwu man kwiocwiny m’uai ba Mungu ma Wegwa. 3Wafoyo Mungu ma Won Rwoth mwa Yesu Kristu, ma warwo ko thiri thiri piwu, 4ma wadaru winjo pi yioyic mu i Kristu Yesu, man pi mer mu ma wubedo ko yo ba jumaleng’ ceke, 5kum genogen ma jukanu iwu i polo, ma wular wuwinjo pire i lembe mi lemandha mi lembanyong’a ma juboth ko, 6m’uwok i beng’wu: cil calu ebedo i ng’om ceke bende m’ecego nyinge man ecikumedre, calu ma i iwu bende, ugambre i ceng’ ma wuwinjo wung’eyo de bero pa Mungu i lemandha; 7cil calu wugamu ng’eyo con bang’ Epafra ma en e jatic wadwa ma jamer mwa, m’e jatic mandha pa Kristu piwa, 8m’eyero iwa pi mer mu bende ma i Tipo. 9Kum lembe nini wan bende, ugambre i ceng’ ma wawinjo, waweko ki ngo nirwo ku kwayu kwac piwu, kara ng’eyong’ec mi yeny ma ie yenyo uromwu i rieko ceke ku ng’eyong’ec mi tipo bende, 10kara wuwoth calu m’uromo ku Rwoth ma wubenyayu ko mutoro kwa, ku cego nyingwu i tic ma ber ceke kubang’gi kubang’gi, ku teng’ni i ng’eyong’ec pa Mungu; 11ma wudoko tek ku tego ceke, calku tek mi dwong’ pare, ni twiocwiny ceke ku mwonyolembe ma jumwonyo hai ku mutoro: 12ma wubefoyo ko Wego, m’udwokowa dre ni jurib mi camupacu mi jumaleng’ i der; 13m’elaruwa kud i tego mi mudho, man elokowa i ker pa Wode mi mer pare; 14ma wanwang’u war ma juwaru kowa ni kume, ni wek mi dubo mwa: 15ma en e ayi Mungu ma nen ungo, kayu mi giracwia ceke pa Mungu; 16kum gin ceke cwire ni kume, ma ni i polo ku ma wi ng’om bende, gin ma nen ku gin ma nen ungo bende, kadok komker kadi kero kadi ker kadi tego; gin ceke cwire ni kume, pire bende; 17man en e kwong’a mi gin ceke, man gin ceke de bedo karacelo ni kume. 18Man en e wic mi kum, ma en e kanisa: ma en e thangambere, en e kayu mi cer ma kud i kind ju m’utho; kara ebed jawipiro i gin ceke. 19Kum ebedo ber ni Wego ya pong’ mi gin ceke bed i ie; 20ya ekwi gin ceke ire gire, m’edaru timo kwiocwiny ni kum rimo mi yen m’athara pare; ni kume, awacu, kadok gin ma wi ng’om, kadi gin ma ni i polo. 21Wun de, ma naka wukoc tung’ wu jukwor de i pidoiwu i tic ma rac mu, 22ento kawono re dong’ ekwiowu i kum mi ring’kume ni kum tho, kara ethierwu i wang’e gire ma wu leng’ ma poyo de mbe adote de mbe: 23tek ebedo kumeno ya wubed i yioyic, ma ulegwu nyang’ ucungo tek de, ma wukucoro cen ungo kum genogen mi lembanyong’a ma juboth ko ma wuwinjo, ma juyero i giracwia pa Mungu ceke the polo; ma an a Paolo judwoka ni jatije. 24Nie anyong’a nega i masendi m’asendra ko piwu, man apong’o gin maka para mi masendi pa Kristu m’urem i ring’kuma pi kume, ma en e kanisa; 25ma juketha ni jatije, calku tic mi pokopok pa Mungu ma jumio ira piwu, kara aketh lembe pa Mungu timbre kakare, 26cil giramung’a m’ugamu pandre por con ku ba dhanu m’ucikutuk de: ento kawono dong’ junyuthe ni jumaleng’ pare, 27e ebedo ber ni Mungu ya eketh ging’ei karamb lonyo mi dwong’ mi giramung’a maeni i kind Thekdhanumange, ma en e Kristu i iwu, genogen mi dwong’: 28ma wayero pire, wacikujuko ko dhanu kubang’gi kubang’gi man wacikuponjo ko dhanu kubang’gi kubang’gi i rieko ceke, kara wathier dhanu kubang’gi kubang’gi ma gibedo ndhu cu i Kristu; 29e amula ku tic bende pi eni, m’abeii ko aiia calku tim m’ebetimo, m’ubetimo i ia ma tek.

will be added

X\