Acts 9

1Ento Saul, ma fodi ubewodho cim man nek kum julub Rwoth, ecidho ba jalam ma dit, 2man ekwaye ku waraga m’ecidh ko Dameski ba kacokri, kara tek enwang’u jumoko ma gi mi Yojuni, kadok co kadi mon, ekelgi atwia Yerusalem. 3E kan ebewotho, e etimbre nia edhingo Dameski: e aruca ruca nica der uai i polo ucare ngbeng’: 4e epodho i ng’om, man ewinjo dwal uwacu ire kumae, Saul, Saul, inyayu ragedo i kuma nedi? 5Man ewacu kumae, In i ng’a, Rwoth? Ewacu kumae, An a Yesu m’ibenyayu ragedo i kuma: 6ento ai malu, imond i adhura, man jubiyero iri pi gin m’itim. 7E dhanu ma giwotho gikugi dhoggi tal kau ka giwinjo dwal, ento gineno ng’atu moko ngo. 8Saul uai malu kud i ng’om; e ka wang’e yabre, eneno gin moko ngo; judong’ jupeye apeya ku cinge, jutere ko Dameski. 9Man ebedo ceng’ adek m’eneno ko piny ungo, m’ecamu de ngo kadok amadha de emadhu ngo. 10Nwang’u jalub acel ni i Dameski, ma nyinge Anania; e Rwoth uwacu ire ku ginmawokiwang’ kumae, Anania. En de eloko lembe kumae, Nen, anuti, Rwoth. 11E Rwoth uwacu ire kumae, Ai malu, icidh i gengi ma julwong’o Atira, ipenj ng’atu acel ma nyinge Saul, ma Jatarso, i ot pa Yuda: kum nen, eberwo; 12man eneno ng’atu ma nyinge Anania bemondo, ubeketho cinge de i kume kara emak neno piny. 13Ento Anania loko lembe kumae, Rwoth, awinjo pi ng’atuni ba dhanu dupa, maram etimo ko rac kum jumaleng’ peri ma ni i Yerusalem: 14keni de ebedo ku ng’ol m’uai ba julam ma dongo m’etwi ko dhanu ceke m’ulwong’o nyingi. 15Ento Rwoth uwacu ire kumae, Cidh miri: kum en e agulu m’agoyo wie ira, ya eter nyinga i wang’ Thekdhanumange ku ju m’ubimo ku nyithi Israeli bende: 16kum abinyutho ire kwai gin dupa m’ebikosendre kudo be kum nyinga. 17E Anania cidho, man emondo i ot; e kan eketho cinge i kume ewacu kumae, Umira Saul, Rwoth ma Yesu m’uwok i beng’i i yo kan ibino, eora kara imak neno piny, Tipo Maleng’ de uromi. 18E ndhu ndhu nica gin moko ma calu apoka ai i wang’e podho piny, e emaku neno piny; man eai malu emaku baputisi; 19e ecamu cemo man edoko tek. Man ebedo nindo moko ku julub ma gini i Dameski, 20e pio pio eyero pi Kristu nia en e Wod Mungu. 21E kagi ceke ka giwinjo igi wang’ lii, giwacu kumae, Ng’atuni en e ng’atu m’unyotho ju m’ulwong’o nying’ maeni ngo? m’ukele kuni de lembuni, kara etergi atwia wang’ julam ma dongo. 22Ento Saul udoko tek m’usagu, man eloyo Juyahudi m’ubedo i Dameski, enyutho andha nia maeni en e Kristu. 23E ka ceng’ dupa kadhu, Juyahudi giporo lembe karacelo nia ginege: 24ento rieko migi ng’eire ni Saul. E gikuro dhugang’ dieceng’ ku diewor de kara ginege: 25ento julub giting’e ku diewor, e gilure ku wi gang’ ku katoko. 26E kan ewok Yerusalem, eponjo ya en de giribri ku julub: man kagi ceke gilwore, giyio de ngo nia en e jalub. 27Ento Barnaba game, etere ba jukwenda, man eyero igi maram eneno ko Rwoth i yo, man nia eweco i bang’e, man maram eyero ko ku tegocwinye i Dameski ku nying Yesu. 28Man gibedo gikugi Yerusalem m’ebedemondo ewok woko de, 29m’ebeyero ku tegocwinye i nying Rwoth: man eyero epiemo piem de kum Juyahudi ma Juyunani; ento gibeyenyo ya ginege. 30Ka utumego ging’eyo maeni, gikele piny i Kaisaria, e giore cidho Tarso. 31Ka kumeno kanisa m’i ng’om ceke mi Yahudi ku mi Galilaya man Samaria de gibedo ma cwinygi kwio, e giteng’ni; e ka gibewotho i lworo pa Rwoth man i jukojuk pa Tipo Maleng’, gimedri. 32Gini timbre, ka Petro cidho i ng’et ng’om ceke, eloro piny bende ba jumaleng’ ma gibedo i Luda. 33Enwang’u ng’atu acel keca ma nyinge Ainea, m’uvuto ru avuta doko rundi abora; kum kume tho nding’. 34E Petro wacu ire kumae, Ainea, Yesu Kristu keyo kumi: ai malu, ipedh kavuto peri. E eai malu tho. 35Dhanu ceke m’ubedo i Luda ku Saron ginene, e giloko cwinygi ni Rwoth. 36Nwang’u jalub acel ma nyinge Tabitha, ma ka juloke edoko Dorka, eni i Yopa: dhaku maeni pong’ ku tic ma ber ku tic ma ni jucan m’etimo bende. 37Man etimbre i ceng’ maeno, nia kume make, man etho ndhu: e ka gijome, gikethe i ot ma malu. 38Nwang’u Luda bedo kpengle ku Yopa, e julubne, ka giwinjo nia Petro ni keca, gioro dhanu ario i bang’e, gikwaye kumae, Kud igal ku bino i bang’wa. 39E Petro ai malu gicidho gikugi de. E kan ewok, gitere i ot ma malu: man mon ma coggi tho ceke gicoro i vute gibeywak, gibenyutho ko kanzu ku kendi de ma Dorka ubedukwoyo ma fodi enuti i bang’gi. 40Ento Petro wodhogi ceke woko, man erum piny, erwo de; man elokre bang’ avu, ewacu kumae, Tabitha, ai malu. E eyabu wang’e, e kan eneno Petro, eai wi there. 41Man emio ire cinge, eting’e ko malu; e elwong’o jumaleng’ ku mon ma coggi tho de, man ethiere m’e kwo. 42E lembene ng’eire cil i Yopa ceke: dhanu dupa de giyio ni Rwoth. 43Man etimbre, nia Petro bedo ceng’ dupa i Yopa giku Simon ma jabodho mir adila.

will be added

X\