Acts 8

1Saul de yio ya etho. Ceng’ nica ragedo ma dit uwok kum kanisa ma ni i Yerusalem; e kagi ceke julalugi nge nge i ng’om Yahudi man Samaria, jukwenda re m’udong’. 2E dhanu ma lworo Mungu giyiko Stefano, man giketho ywak ma dit i wie. 3Ento Saul unyotho kanisa, m’emondo ko ku ba udi ku ba udi, m’eywayu ko co ku mon de ekethogi i odkol. 4Ka kumeno ju ma julalugi nge nge gicidho ku yero lembe nini. 5E Filipo loro piny i adhura ma Samaria, man eyero igi pi Kristu. 6E udul dhanu giciko ithgi ku cwinygi m’uripo acel ni lembe ma Filipo yero, ka giwinjo, gineno ku giranyutha m’etimo de. 7Kum tipo m’ucido ma ni ii dhanu dupa, giwok woko kud i igi, ma gikok akoka ku dwandgi ma tek: ju ma kumgi tho nding’ de dupa, ku weg abala mi tielo, kumgi kei. 8E mutoro ma dit ubedo nuti i adhura maeno. 9Nwang’u ng’atu acel nuti, ma nyinge Simon, ma naka betimo ajoga i adhura nica, eketho i dhanu ma Samaria de wang’ lii, m’ekethie gire nia en e ng’atu ma dit: 10ma dhanu ceke de giciko ithgi i bang’e, dhanu ma sai ku dhanu ma pigi yik de, giwacu kumae, Ng’atuni en e tego maeno pa Mungu ma julwong’o Dwong’. 11E giciko ithgi i bang’e, kum nindo dupa eketho igi wang’ lii kud ajoga pare. 12Ento ka giyio Filipo m’ubeyero lembanyong’a mi ker pa Mungu ku nying’ Yesu Kristu, e gimaku baputisi, co ku mon de. 13Simonne bende eyio: e kan emaku baputisi, gidong’ gibedo giku Filipo; e kan ebeneno giranyutha ku musana ma dit de m’utimbre, ie wang’ lii. 14Nie ka jukwenda ma ni i Yerusalem giwinjo nia Samaria jolo lembe pa Mungu, gioro Petro giku Yohana i bang’gi: 15ma, ka giloro piny, girwo pigi, kara gijol Tipo Maleng’: 16kum fodi epodho wi jumoko ngo m’i kindgi: fodi gimaku baputisi ku nying Rwoth Yesu kende. 17E gilund giketho cing’gi i wigi, man gijolo Tipo Maleng’. 18Nie ka Simon uneno ya Tipo Maleng’ umire ni kum cing’ ma jukwenda ketho, ewodho igi sente, 19ewacu kumae, Mi tego maeni ira bende, kara ng’atu ma tek aketho cinga i kume ejol Tipo Maleng’. 20Ento Petro wacu ire kumae, Mola ma tar peri nyothii ko giri, kum iwacu nyo giramia pa Mungu junwang’u ku sente. 21Kaperi mbe kadok kume moko de i lembe maeni: kum adundeni bedo pwe ngo i wang’ Mungu. 22Ka kumeno lok cwinyi kum dubo peri maeni, man irwo ni Rwoth, kuno nyo jubiweko pidoic mir adundeni woko iri. 23Kum aneno nia ini i ulecu mi gin ma kec man i twic mi camuco. 24E Simon udwoko lembe ewacu kumae, Wurwo pira ba Rwoth, kara gin ma wuwacu no moko kud uwok i kuma. 25Ka kumeno joni, ka gidaru tuco man giyero lembe pa Rwoth, e gidok i Yerusalem, man giyero lembanyong’a ma juboth ko i pacu dupa mi Jusamaria. 26Ento malaika pa Rwoth uyero ni Filipo, ewacu kumae, Ai malu, ici yor ariwa ma piny ba yo m’uai Yerusalem uloro Gaza: ng’ombe ng’om ngele. 27E eai malu ecidho: nen, Jaethiopia, en e jamugumba ma won ng’ol ma dit the Kandake ma rwoth ma dhaku wi Juethiopia, m’ebedo wi piny m’akana pare ceke, m’ebino de nirwo i Yerusalem; 28man ebedwogo adwoga ebedo de i magali pare, man ebesomo kitabu pa jabila ma Isaya. 29E Tipo wacu ni Filipo kumae, Cor ceng’ni, man iwoth kum magali maeni. 30E Filipo ringo i bang’e, ewinjo ebesomo Isaya ma jabila, e epenjo kumae, Ing’eyo gin m’isomo no? 31Edwoko lembe kumae, Acopo nenedi, tek ng’atu moko kutelo wia ngo? E ekwayu Filipo idh gibed gikude. 32Nwang’u kaka lembagora pa Mungu m’esomone e eni, Jupeye calu rombo ba kathum; Man calu nyathi rombo bedo ling’ i wang’ junyaryuke, En de kumeno ealu dhoge ngo: 33I jwik pare pokolembe pare kabre woko: Ng’a bikoro pi dhanum’utuk i kume? Kum kwo pare jukabu woko kud i ng’om. 34E jamugumba loko lembe ni Filipo ewacu kumae, Akwei, jabila yero maeni pi ng’a? pire gire, kadi pi ng’atu mange? 35E Filipo alu dhoge, man etheko kum lembagora maeni, eyero ko ire pi Yesu. 36Man ka gibecidho i yo, gitundo kum pi moko; e jamugumba wacu kumae, Nen, pi eni; girang’o m’ucera ku maku baputisi? 37E Filipo wacu kumae, Tek iyio kud adundeni ceke icopo. Man eloko lembe ewacu kumae, Ayio nia Yesu Kristu en e Wod Mungu. 38E eng’olo nia magali ukoucungi: e Filipo giloro i pi, giku jamugumba; man emie baputisi. 39E kinde ma giai kud i pi, Tipo Rwoth urwinyo ku Filipo biti; e jamugumba dong’ unene kendo ngo, kum ecidho i yo pare ma anyong’a nege. 40Ento judong’ junwang’u Filipo i Azoto: e kan ebekadhu akadha eyero lembanyong’a ma juboth ko i adhura ceke ram etundo ko Kaisaria.

will be added

X\