Acts 5

1Ento ng’atu moko ma nyinge Anania, giku Sahra ma cege, ging’iewo jupiny moko, 2man ekanu wel jupiny kucel, cege de giribri kude i lembene, man ekelo kume kucel, ekethe the tiend jukwenda. 3Ento Petro wacu kumae, Anania, Jok upong’o adunden inedi m’icwayu ko ndra ni Tipo Maleng’, m’ikanu ko kum welpiny mi ng’omi? 4Kinde m’eni i beng’i, nwang’u en e peri ngo? man kan idaru loke, ebedo i tego peri ngo? Iyio gino wok i adundeni pirang’o? icwayu ndra ni dhanu ngo, ento ni Mungu. 5E ka Anania winjo lembe nini epodho bir e cwinye kadhu ndhu; man lworo ma dit apila podho wi dhanu ceke ma giwinjo maeni. 6E awobi giai giboye de, gitere woko gicigiyike. 7Man eyenyo romo kinde mi saa adek yo ng’eye, ka cege, ma fokung’eyo gin m’utimbre ngo, umondo. 8E Petro wacu ire kumae, Yer ira tek wuloko ng’om ku piny mae. Man ewacu kumae, Eyo, ku piny maeno. 9Ento Petro wacu ire kumae, Wugewuripo lembe ya wumul ko Tipo Rwoth nedi? nen, tiend ju m’uyiko cweri gi ni dhugola, man gibiteri woko. 10E ndhu ndhu nica epodho bir etho ndhu, man gitere woko gicigiyike ba cware. 11E lworo ma dit upodho wi kanisa ceke, ku wi dhanu ceke de ma giwinjo gin maeni. 12Man giranyutha ku musana dupa timbre kind dhanu ku cing’ jukwenda: kagi ceke de gibedo ku cwinygi m’uripo acel i pondot pa Suleman. 13Ento i kind dong’ dhanu m’udong’ ng’atu moko mbe ma cwinye tek m’eribre ko kugi: ento ayunga re dhanu yungogi; 14man juyic gimedri m’usagu ba Rwoth, udul jumaco ku jumamon bende: 15ketho giwodho cil ju ma kumgi lith giterogi woko i gengi, gipielogi wi kavuto ku wi par bende, kara ka Petro bekadhu, kuno nyo tipone biumo ng’atu moko m’i kindgi. 16Udul dhanu bende giai i adhura m’utieko Yerusalem, gicoko dhoggi ma gikelo ko ju ma kumgi lith, ku ju ma tipo m’ucido besendogi: e kumgi kei kubang’gi ndri. 17Ento jalam ma dit uai malu, ku ju ma gibedo gikugi ceke (ma en e pokri mi Jusadukayo), e ngiri pong’ogi 18e giketho cing’gi kum jukwenda, man gicwalugi i odkol. 19Ento malaika pa Rwoth uyabu dhugola mi odkol ku diewor, ewodhogi woko, man ewacu kumae, 20Wucidh wucung i hekalu wuyer lembe ceke ni dhanu pi Kwo maeni. 21E ka giwinjo maeni, gimondo i hekalu ka mombwa maku thumo, giponjo de. Ento jalam ma dit uwok, ku ju ma gibedo gikugi de, man gicoko dhu dilo, ku judongo mi nyikwai Israel de, e gioro ya jugamgi i odkol jukelgi. 22Ento asikari m’ucidho giwok ginwang’u gimbe i odkol; man giloko gidok, giyero kumae, 23Wawok wanwang’u dhu odkol ubedo acika kubang’e, jukur de gicungo dhugola: ento ka wayabu, wanwang’u ng’atu moko mbe i ie. 24Nie ka jadit mi hekalu ku julam ma dongo giwinjo lembe maeni, igi pido mumbe i kumgi maram lembene binyai ko. 25E ng’atu acel ubino uyero igi kumae, Nen, dhanu ma wukethogi i odkol gini i hekalu gicungo gibeponjo dhanu. 26E jadit mi hekalu kud asikari gilund gicidho, gikelogi, endre ku kero ngo; kum gilworo dhanu, gimaru canyugi ku kidi. 27E ka gikelogi, gikethogi i wang’ dilo. E jalam ma dit upenjogi, 28ewacu kumae, Wang’olo iwu ma tek ya kud wuponj ku nying’ maeni: nen, wuromo Yerusalem ceke ku ponji mu, wuyenyo wukel rimb ng’atuno i wiwa de. 29Ento Petro giku jukwenda wagi de giloko lembe giwacu kumae, Wakoworo Mungu be ma sagu woro dhanu. 30Mungu pa kwaruwa ting’o Yesu malu, ma nwang’u wunege, ma wuliere ko wi yen. 31En Mungu dode ku cinge ma yor acwic ya ebed Jaker ku Jalar, kara emi lokocwiny ni Israel, ku ruco dubo. 32Wan de wa jumulembe mi ginduni; man Tipo Maleng’ bende, ma Mungu mio ni ju m’uwore. 33Ento joca, ka giwinjo maeni, ethumo adundegi, e giyenyo gineggi. 34Ento ng’atu acel ma Jafarisayo ai malu i kind dilo, ma nyinge Gamaliel, m’e jaeuthecik, m’e ng’atu ma pire ber ni dhanu ceke, man eng’olo ya gikogiketh joca cen tundu. 35Man ewacu igi kumae, Wu dhanu pa Israel, wubed ku weng’wu i kumwu giwu kum joni, ni gin ma wuyenyo timo. 36Kum nwang’u ka fodi ceng’ maeni kuwok ungo Theuda wodhre, m’eketho pire yik ya en e m’e en; e dhanu moko, ma va dak ang’wen, ging’ino i kume: e junege; man ju m’uwore ceke, julalugi, e gidoko yaca. 37Yo tok ng’atuni ke, Yuda ma Galilaya i ceng’ ma jugoro nying’ ewodhre, man ecoko dhanu kucel i kume: en bende erwinyo; e ju ma giwore ceke, julalugi nge nge. 38E kawono abeyero iwu kumae, Kud wutim gin moko kum joni, wuwekgi: kum tek lembapora maeni kadi tic maeni ai ba dhanu, ebirany: 39ento tek eai ba Mungu, wubicopo ranjugi ngo; kuno nyo jubinwang’u ya wubetimo ali cil kum Mungu. 40Man giwinjo dwande: e ka gilwong’o jukwenda i bang’gi, gidong’ gifodogi afoda man ging’olo igi ya ku giyer ku nying’ Yesu, e giwekogi gicidho. 41E ka kumeno giai kud i dilo, ma anyong’a negogi kum jukwanu ya giromo sendri ma jujwigo kogi kum Nying’ maeni. 42E ku ba rupiny ku ba rupiny, i hekalu kud i udigi de, giweko ponjo ku yero de ki ngo ya Yesu en e Kristu.

will be added

X\