Acts 27

1E ka jung’olo nia wabicidho Italia ku yo mi pi, gimio Paolo ku jukol mange de i cing’ jego ma nyinge Yulio, mir udul asikari pa Augusto. 2E wamondo i combo mir Adramutio, ma bicicomo kamoko dhu wath mir Asia, e wakieura, nwang’u Aristarko, ma Jamakedoni ma Tesaloniki de, ni i bang’wa. 3Urwone wagudo Sidon: man Yulio timo ber ba Paolo, eyio ya ecidh ba wat pare kara edwok cwinye. 4E wakieura ku kuca, wacidho ku yo mi pi i gund Kupro, kum yamu ai yor i wang’wa. 5E ka wakadhu ku wi nam ma ng’et Kilikia ku Pamfulia de, watundo Mura, adhura ma Lukia. 6E jego nwang’u combo ma Iskanderia keca m’ubecidho i Italia; man ekethowa i ie. 7E ka wawotho moth moth ceng’ dupa, wabino de arida kum Knido, kum yamu becerowa, wacidho ku yo mi pi i gund Krete, kum Salmone; 8man wacidho arida ku dhu wath watundo ka ma julwong’o Bandari ma ber; ceng’ni kud adhura Lasaya. 9E ka nindo dupa kadhu, man woth udoko anaka, kum ceng’ ma juweko ie cam udaru kadhu, Paolo jukogi, 10ewacu igi kumae, Paco, aneno nia wodhuni bibedo mono ku ruvwa ma dit, ni jamni ku combo kende ngo, ento ni kwo mwa bende. 11Ento jego winjo lembe mi weg combo, ma sagu lembe ma Paolo yero. 12Man kum ndiane kabedo mbe i ie mi nindo mi koyo, dhanu kucel m’ulwar giporo lembe ya gikieuri woko ku kuca, nyo gicopo tundo Foiniki ku yo moko, e giri keca de i nindo mi koyo; maeui ndia mi Krete, m’eneno yo pa ndawe ku sasi. 13E ka sasi bekoto yo yo, giwacu nyo ginwang’u yeny ma igi yenyo, e giting’o nyoro gikadhu dri dri ku kum Krete, ceng’ni dhu wath. 14Ento yo ku ng’eye nyanok wavuvu ma dit utuk i cnia ucore piny, wavuvune julwong’o Eurakulo: 15e kan emaku combo, e cidho wang’ yamu de copre ngo, waweko ecidh kudwa, edong’ ebelekowa. 16E waringo i gund nyathi cula ma julwong’o Klauda, waii aiia ka waketho combo cungo keca: 17e ka gicwale maiu, giroyo mangru i there; man, kum gilworo kuno nyo gibimoko wi Surtis, gidong’ giywayu jamb combo piny, e elekre. 18Man kawaii kwe ku wavuvune, urwone gimaku bayu jamni woko; 19i ceng’ mir adege gimaku bayu jamb combo de woko gigi ku cing’gi. 20E ka ceng’ kadok cero de rieny ungo i wiwa wang’ udul, wavuvu ma nyanok ungo de bekukni kudwa, dong’ cwinywa ai ndhu kum both. 21Ka gibedo hai m’umbe cemo, Paolo lund ucungo i kindgi, ewacu kumae, Paco, ande mundo wuwinj dwanda, wuai ungo kud i Krete, nwang’u ande wunwang’u ruvwa ku mono maeni de ngo. 22Man kawono abejukowu ya cwinywu bed tek; kum kwo moko mbe ma birwinyo i kindwu, ndhu combo re. 23Kum malaika pa Mungu ma an a pare, m’atimo ire bende, ecungo i vuta i diewor maeni, 24ewacu kumae, Kud ilwor, Paolo; ibikocungo wang’ Kaisari be: man nen, Mungu mio iri dhanu ceke ma wubewotho wukugi. 25Kum kumeno, paco, cwinywu bed tek: kum ayio Mungu, nia ebibedo kumeno cil calu eyere ira. 26Ento wabioi wi cula moko be. 27Ento ka diewor mir apar wi ang’wende wok, kinde ma wabelekra kan kan i nam Adria, ceng’ni diewor ma ling’ jutic mi combo wacu nyo gidhingo ng’om moko: 28e gibolo thol ucidho the pi, e ginwang’u etundo mugalma pier ario, yo ng’eye nyanok, gibolo kendo, e ginwang’u etundo mugalma apar wi abic, 29E lworo negogi nia nyo wabirodra dhu wath ma ie ju kidi, e gibolo nyoro ang’wen yo the combo, gikuro ko piny m’uru. 30Man ka jutic mi combo gibeyenyo piei kud i combo, giluro nyathi combo de i nam, calu giyenyo gibol nyoro kud i um combo, 31Paolo wacu ni jego kud asikari de kumae, Tek joni bedo i combo ngo wucopo both ungo. 32E asikari gilund githumo uno mi thanga woko, e giweko epodho. 33E kinde ma piny umaku ru, Paolo kwayugi ceke ya gigam cemo moko, ewacu kumae, Maeni ceng’ apar wi ang’wende ma wukuro wuweko ko cam de, ma wucamu ie gin moko ngo. 34Kum kumeno akwayuwu ya wucam cemo moko: kum maeni en e mi both mu: kum yukwic acel de mbe ma birwinyo i wi ng’atu moko m’i kindwu. 35E kan ewacu maeni, eting’o kwen de, egam efoyo Mungu i wang’gi ceke; man eng’weko ie, emaku camu de. 36E cwinygi ceke lund ubedo tek, man gin bende gigamu cemo. 37E wan ceke ma wani i combo wa dak ario ku pier abiro wi abusiel. 38Man ka giyeng’, gidwoko combo yot ku bayu nganu i nam. 39E ka piny uru, gmg’eyo ng’ombe ngo: ento gineno wath moko m’uroire ni gul, e giporo lembe tek gicopo coro combo jolo i wie. 40E gibayu nyoro woko, giwekogi i nam, gigonyo ku thol mir utwindine de; giting’o bongu ma yo um combo de ni yamu, e gicidho dhu wath. 41Ento ka giwok ka ma nam ario rombo i ie, giketho combo gure i ng’om; e ume moko nging’ nging’ ma wodhre ngo, ento there maku ng’eny ni kum tego mi mukura. 42Man asikari poro lembe ya juneg jukol woko, kara jumoko kud ukwang’, upiei. 43Ento jego m’eyenyo ebodh Paolo, edhirogi ku timo yeny ma igi yenyo; e eng’olo de nia ju ma copo kwang’ gikogipiei i pi, gilar gitund i ng’om; 44ju m’udong’ ke, moko ni wi bau, moko ni wi gin mange mi combo. E etimbre, nia kagi ceke gitundo bo dhu wath.

will be added

X\