Acts 26

1E Agripa wacu ni Paolo kumae, Juyio ya igony lembe peri giri. E Paolo lund urieyo cinge, man egonyo lembe pare kumae: 2Kud i bang’a mutoro nega gira, ubimo Agripa, kum abegonyo lembe para i weng’i tinuni pi gin ceke ma Juyahudi gidota pire: 3ma sagu kum in i riek dit i kura ku penji ma kind Juyahudi: kum kumeno akwei iwinja ku twiocwiny. 4Juyahudi ceke ging’eyo karamb kura mi bedo para ma fodi a nyathin maram adongo ko de, ugambre ku kwong’a i kind thek mwa, kud i Yerusalem de; 5ma ging’eyo ko pira ku kwong’a, tek giyio tuco, nia abedo Jafarisayo m’ulubo pokri m’arida mi kisoma mwa. 6Man pi genogen mi lembang’ola ma Mungu ng’olo ni wegwa e kawono acungo kara jupok lembe para; 7ni lembang’olane suru mwa apar wi ario, ma gitimo ni Mungu kud avane dieceng’ ku diewor, gigeno ya gibitundo i bang’e. Man Juyahudi gidota pi genogen maeni, E ubimo! 8Nedi wuwacu ya maeni jucopo yio ngo, nia Mungu ting’o ju m’utho? 9Awacu gira andha nia e ber tek atimo gin dupa ma tung’ ku nying Yesu ma Nazareti. 10Maeni de atimo i Yerusalem: aciko ba jumaleng’ dupa i odkol, kan adaru gamu ng’ol ba julam ma dongo, man ka junegogi de ayio. 11Asendogi de bang’ udul i kacokri ceke, aponjo ketho giyer lembacidi de; kum ng’ecwiny unega dit apila i kumgi, anyayu ragedo i kumgi cil i adhura mi juwirok. 12Kum kumeno kan abecidho Dameski ku ng’ol man lembaketha mi julam ma dongo, 13dieceng’ ma ling’, E ubimo, aneno i yo der m’uai i polo, ma sagu rieny mi ceng’, m’erieny i kuma i kum ju ma wawotho wakugi de. 14E ka wan ceke wapodho i ng’om, awinjo dwal m’uwacu ira ku dhu Juebrania kumae, Saul, Saul, inyayu ragedo i kuma nedi? cwanyu lak kenge ku tiendi tek iri. 15An ke awacu kumae, In i ng’a, Rwoth? E Rwoth uwacu kumae, An a Yesu m’ibenyayu ragedo i kuma. 16Ento ai malu, icung wi tiendi: kum anyutho iri pi maeni, kara akethi ibed jatic man jamulembe mi gin maeni m’inena i ie, man mi gin m’abinyuthra iri i ie; 17abodha abibodhi ni dhanu, ni Thekdhanumange de, m’abeori i bang’gi, 18niyabu wang’gi, kara gilokri kud i mudho giwok i der man kud i tego pa Jok ba Mungu, kara ginwang’ ruc mi dubo, man camupacu kind ju ma judwokogi leng’ ni kum yioyic ma ni kuma. 19Kum kumeno, E ubimo Agripa, ajai ngo kum ginmawokiwang’ m’uai i polo: 20ento ku kwong’a ayero ni ju ma Dameski, i Yerusalem de, kud i ng’om Yahudi ngung’ bende, ni Thekdhanumange bende, nia gilok cwinygi man gilokri ba Mungu, gitim tic de m’uromo ku lokocwiny. 21Kum lembe nini ketho Juyahudi gimaka i hekalu, giponjo nega de. 22Ka kumeno kan adaru nwang’u kony m’uai ba Mungu, acungo cil i ceng’ maeni m’abetuco ko ni dhanu ma thindho ku ma dongo de, m’ayero gin moko ngo ndhu gin ma jubila ku Musa giwacu ya bibino; 23nia Kristu bikosendre be, nia ebilar nyutho der ku cer ma kind ju m’utho ni dhanu ku Thekdhanumange. 24Man kan ebegonyo lembe pare kumeno, Festo wacu ku dwande ma tek kumae, Paolo, in i avake; ng’eyo lembe peri ma dit bedwoki ni avake do. 25Ento Paolo wacu kumae, An a avake ngo, Festo ma dwong’: ento abeyero lembe mi lemandha ku ma nger de. 26Kum ubimo ng’eyo gin maeni, e abeyero ire bende yot yot: kum ang’eyo gin maeni moko mbe m’upandre ire; kum maeni kutimbre i gul ungo. 27Ubimo Agripa, iyio jubila? Ang’eyo nia iyio. 28E Agripa wacu ni Paolo kumae, Nyakanok ci iyenyo thoka ni dwoka Jakristu. 29Man Paolo wacu kumae, Ayenyo ba Mungu, nia kadok ku ma nyanok kadi ku ma dit de, in kendi ngo, ento ku dhanu ceke bende ma giwinja tinuni, gidok calu an, ku twic re ngo. 30E ubimo ai malu, giku jabim de, man Berenike, ku ju ma gibedo gikugi de: 31e ka gicoro cen, giweco gigi, giwacu kumae, Ng’atuni timo gin moko ngo ma romo ku nek kadi twic de. 32E Agripa wacu ni Festo kumae, Dok ng’atuni kuyenyo ba Kaisari ngo, kuno di jugonye.

will be added

X\