Acts 25

1Ka kumeno, ka Festo wok i ng’ombuno, yo ng’ei ceng’ adek eai Kaisaria eidho malu Yerusalcm. 2Man julam ma dongo ku judongo mi Juyahudi gipiko ie lembe kum Paolo; man gikwaye, 3gipenjo bero igi i kume, ya eore Yerusalem e gipido lembe ya gibinege i yo. 4Ento Festo loko lembe, nia Paolo jubekure Kaisaria, nia en de fodi nyanok ebidok kuca. 5Ewacu kumae, Ka kumeno dong’ jutego m’i kindwu walor piny wakugi, man tek gin moko ma rac ni i ng’atuno, wek gidote. 6E kan evuto i kindgi ma sagu ceng’ abora kadi ceng’ apar de ngo, eloro piny Kaisaria; e urwone ejany wi kom mi pokolembe, eng’olo de ya jukel Paolo. 7E kan ewok, Juyahudi ma giai Yerusalem giloro piny gicungo gitieke, gikelo acukadhok dupa ma rac de i wie ma gicopo ketho ngo ya jung’ei nia en e andha; 8nie Paolo yero lembe pare kumae, Kadok kum cik mi Juyahudi, kadi kum hekalu de, kadi kum Kaisari de, adubo lembe ki ngo. 9Ento Festo, m’uyenyo ya Juyahudi gifoye, edwoko lembe ni Paolo ewacu kumae, Iyenyo icidh i Yerusalem e ka jubicipoko lembe peri mi gin maeni i wang’a kuca? 10Ento Paolo wacu kumae, Acungo wang’ kom mi pokolembe pa Kaisari, ka ma maku jupok ie lembe para: ni Juyahudi atimo gin moko ma rac ungo, calu in bende ing’eyo cu. 11Ka kumeno tek an a jadubo, man atimo gin moko ma romo ku tho, akwero ngo ya atho; ento tek gin maeni andha ngo ma joni gidota ko, ng’atu moko mbe ma copo mia igi. Ayenyo ndhu ba Kaisari. 12Ka kumeno ka Festo, gipido lembe giku dilo, elund eloko lembe kumae, Iyenyo ba Kaisari: ba Kaisari ibicidho. 13Nie ka ceng’ moko kadhu, Agripa m’ubimo giku Berenike de giwok Kaisaria, man gimotho Festo. 14Man ka girio kuca ceng’ dupa, Festo pedho lembe pa Paolo i wang’ ubimo, ewacu kumae, Nwang’u ng’atu moko nuti ma Feliki weke jakol; 15pi ng’atuni, kan ani i Yerusalem, julam ma dongo ku judongo mi Juyahudi giyero pire ira, gipenja ya apok lembe pare. 16Aloko igi lembe, nia en e kura mi Jurumi ngo ya juwodh ng’atu moko, ma fodi ng’atu ma judote gikunendri ku wang’gi ngo, ma fodi jukuyio ngo de ya eyer pi lembe ma judote ko. 17Ka kumeno ka gicoko dhoggi keni, agalu ngo, ento urwone ajany wi kom mi pokolembe, man ang’olo ya jukel ng’atuno. 18Pi ng’atuno, ka weg adote pare gicungo, gikelo adote mi gin ma rac ungo calu m’awacu nyo: 19ento gibedo ku penji moko i kume pi kisoma migi gigi, man pi Yesu moko, m’utho, e ma Paolo wacu nia ebedo kwo. 20An de, kum ang’eyo ngo maram juluro ko thelembe maeni, apenje tek eyenyo eci Yerusalem ka ma jubipoko ie lembe mi gin maeni. 21Ento ka Paolo yenyo jugwoke ni pokolembe pa Augusto, ang’olo ya jugwoke maram abiore ko ba Kaisari. 22Man Agripa wacu ni Festo kumae, An bende ayenyo awinj ng’atuno an. Ewacu kumae, Urwo ibiwinje. 23Ka kumeno urwone, kan Agripa wok giku Berenike de, kud ayunga ma dit, gimondo de ka ma juwinjo ie lembe ku jego ma dit ku judongo ma i adhura de, e Festo ng’olo ya jukel Paolo i ie. 24E Festo wacu kumae, Ubimo Agripa, ku dhanu ceke ma wanuti wakudu kakeni de, wuneno ng’atu maeni, ma udul Juyahudi ceke giyero pire ira, kud i Yerusalem kuni bende, ma gibekok akoka ya maku kud ebed kwo kendo. 25Ento anwang’u nia etimo gin moko ngo ma romo ku nek: man kum eyenyo en bang’ Augusto akeco ya aore. 26Pi ng’atuno abedo ku gin moko ngo ma cu m’agor ni rwoth para. Kum kumeno akele woko i weng’wu, ndhu i weng’i, ubimo Agripa, kara, yo ng’ei titine, abed ku gin moko m’agor. 27Kum kud i bang’a emaku piny ungo, nioro jakol, ma jukunyutho pir adote mi kume ngo.

will be added

X\