Acts 24

1E ka ceng’ abic ukadhu jalam ma dit ma Anania loro piny ku judongo moko, ku ng’atu acel de ma dwande leng’, ma nyinge Tertulo; man gidoto Paolo ba jabim. 2E ka julwoug’e, Tertulo maku dote, ewacu kumae, Kum wanwang’u kwiocwiny ma dit ni kumi, in i Feliki ma dwong’, man ni kum gwok peri gin ma rac uyikre ni thek maeni, 3wajolo maeni i yo ceke, i kaka ceke de, man ku foyofoc ceke. 4Ento, kara kud aoli kendo, akwei ya ikoiwinja nyanok ku mol peri. 5Kum wanwang’u ng’atu maeni en e jaganda, e jathub ali i kind Juyahudi ceke i ng’om ngung’, man en e jatel wi weg pokri mi Junazareti: 6man kendo eponjo cido hekalu: e wamake: wabeyenyo wapok lembe pare de ku cik mwa. 7Ento jego ma dit Lusia bino, man emaye kud i cingwa ku kero ma dit, 8man eng’olo ya weg adote pare gibin i beng’i e ibing’eyo gin ma wadote i kume ceke ni kum luro i lembe pare m’ibiluro in. 9E Juyahudi de giribri i lembene, giwacu ya gin maeni bedo kumeno. 10Ka jabim ugwelo ire ya eycr, Paolo loko lembe kumae, Kum ang’eyo nia ibedo japoklembe mi thek maeni rundi dupa, agonyo lembe para ku tegocwiny: 11kum icopo ng’eyo nia esagu ceng’ apar wi ario de ngo m’aidho ko nirwo i Yerusalem: 12man kadok i hekalu ginwang’u apiemo ku ng’atu moko ngo kadi athubo i njuru dhanu de ngo, kadi i kacokri, kadi i adhura de. 13Gin de ecopre igi ngo ma nia giketh ing’ei ya gin ma gidota i kume en e andha. 14Ento maeni atuco iri, nia i Yo ma gilwong’o pokri, e ma atimo ie ni Mungu pa kwaruwa, ma wayio ko gin ceke ma gi calku cik, ku lembe m’ugore i kitabu mi jubila bende; 15m’abedo ku genogen yo ba Mungu, ma gin gi joni bende gigeno, nia cer ma jucer ko bibedo nuti ni weg bedopwe ku ni weg bedopwe ngo de. 16Kum kumeno aponjra gira kara abed ku pidocwiny ma ber m’umbe kier yo ba Mungu ku ba dhanu de thiri thiri. 17Nie ka rundi moko kadhu abino nikelo giramia ba thek mwa, kud ajok bende: 18ginwang’a i maeni ma ia leng’ i hekalu, ku njuru dhanu de ngo, ku yakni de ngo: ento Juyahudi moko ma giai i Asia ginuti, 19ma maku gin de gibed nuti i weng’i keni, gikel adote de, tek gibedo ku lembe moko i kuma. 20Kadi wek joni gin giwac pi tic ma rac ma ginwang’u kan acungo i wang’ dilo, 21tek en e pi dwal acel maeni ngo, ma nia akok kumae kan acungo i kindgi, Pi cer mi ju m’utho ketho jubetonda i weng’i tinuni. 22Ento Feliki, m’ung’eyo pi Yojuno cu m’usagu, ethirogi, ewacu kumae, Ka Lusia ma jego ma dit biloro piny, abipoko lembe mu. 23Man eng’olo ni jego ya jukure, man juweke ewoth gire kende; man ku jucer wat pare moko kutimo ire. 24Ento yo ng’ei ceng’ moko, Feliki gibino giku Drusila, ma cege, ma en e Nyayahudi, e elwong’o Paolo, man ewinje pi yioyic ma ni i Kristu Yesu. 25E kan eluro lembe mi bedopwe, man pi kwerigijo, ku mi pokolembe ma bibino de, e Feliki doko tipo, man edwoko lembe kumae, Koicidh i yo peri tundu; ka nindo m’ubedo ber ira wok, abilwong’i i bang’a. 26Egeno nyo Paolo bimio ire sente: kum kumeno ebedelwong’e wang’ udul, man giweco gikude. 27Ento ka rundi ario kadhu, Portio Festo kabu Feliki; man kum eyenyo Juyahudi gifoye, Feliki weko Paolo atwia.

will be added

X\