Acts 23

1Man Paolo, m’eneno dilo tel, ewacu kumae, Umego, abedo i wang’ Mungu ku pidocwiny ma ber ceke cil i ceng’ maeni. 2E jalam ma dit ma nyinge Anania ng’olo ni ju m’ucungo ceng’ni ya gipad dhoge. 3Paolo lund uwacu ire kumae, Mungu bipedi, in i gang’ m’afuya ku vulo: ibedo mi poko lembe para calku cik, e idong’ ing’olo ya jugoya tung’ ku ciki? 4E ju m’ucungo i vute giwacu kumae, Icayu jalam ma dit pa Mungu? 5E Paolo wacu kumae, Ang’eyo ngo, umego, nia en e jalam ma dit: kum egore kumae, Kud iyer lem marac kum jabim mi juthu. 6Ento ka Paolo ng’eyo nia jukucel gi Jusadukayo jukucel ke gi Jufarisayo, ekok her i dilo kumae, Umego, an a Jafarisayo, a wod Jafarisayo: jupoko lembe i wia kum genogen ku cer mi ju m’utho. 7E kan ewacu kumeno, e piem ugapre kind Jufarisayo ku Jusadukayo de; e dhanu m’ucokri gipoko igi dra. 8Kum Jusadukayo giwacu nia cer umbe, kadok malaika, kadok tipo ento Jufarisayo gituco ario de. 9E piem ujai dit: jugorcik moko ma kind Jufarisayo gicungo, gipiemo, giwacu kumae, Wanwang’u dubo moko ngo i ng’atuni: kuno nyo tipo kadi malaika weco en i bang’e, ka nedi ke? 10E ka piem udoko dit, jego ma dit, lworo nege ya jumaru yeco Paolo tung’ tung’, eng’olo nia asikari gilor piny gigame ku tego kud i kindgi, gikele i ot ma tek. 11Diewor m’ulube de Rwoth ucungo i vute, ewacu kumae, Cwinyi bed tek: kum calu ituco pira Yerusalem, e ibikonyutho lembe kumeno be i Rumi bende. 12E ka piny uru, Juyahudi giribri karacelo, man gitwiri gigi ku kwong’, giwacu nia gibicamu giracama kadi madhu giramadha de ngo ma fodi gikunego Paolo ngo. 13E ju ma gikwongri kumeno gi sagu pier ang’wen. 14Man gibino ba julam ma dongo ku judongo de, giwacu kumae, Watwira giwa ku kwong’ ma dit, ya wabibilo gin moko ngo ma fodi wakunego Paolo ngo. 15Nie ka kumeno wun ku dilo de wunyuth ni jego ma dit nia eketh Paolo lor piny i beng’wu, calu ya wuyenyo wung’i i lembe pare cu ma sagu: e wan, ka fodi ewok ceng’ni ngo, nwang’u wayikra ma wanege ko. 16Ento wod nyamin Paolo winjo nia gikanu adhi, e ebino emondo i ot ma tek eyero ni Paolo. 17E Paolo lwong’o jego acel i bang’e, ewacu kumae, Ter jalawobi maeni ba jego ma dit; kum ebedo ku nyawec moko m’eyer ire. 18Ka kumeno ecoke, man etere ba jego ma dit, ewacu kumae, Paolo ma jakol ulwong’a i bang’e, man epenja ya akel jalawobi maeni i beng’i m’ebedo ku nyawec moko m’eyer iri. 19E jego ma dit umake ku cinge, man ecoro kude cen, man epenje mung’ mung’ kumae, En e lembang’o m’ibedo ko m’iyenyo iyer ira? 20Man ewacu kumae, Juyahudi giripo dhoggi, nia gipenji iter Paolo piny urwo ba dilo, calu iyenyo ipenj thelembe pare cu ma sagu. 21Ka kumeno kud iyi igi: kum dhanu pier ang’wen ku wie gikanu adhi ire, ma gitwiri gigi ku kwong’, nia gicamu ngo gimadhu de ngo ma fodi gikunege ngo: e kawono gibedo ayika, ma gibekuro ko lembang’ola m’i beng’i. 22Ka kumeno jego ma dit uweko nyiruno cidho, kan eng’olo ire kumae, Kud iwac ni ng’atu moko ki nia inyutho lem maeni ira. 23Man elwong’o jego ario i bang’e, ewacu kumae, Keth asikari dak ario bed ayika gici gijik i Kaisaria, ku ju ma weg kana de pier abiro, ku ju ma weg tong’ ke dak ario, i saa adek mi diewor: 24man eng’olo igi ya gikel riuni, kara giketh Paolo i wie, gitere ko bo ba Feliki ma jabim. 25Man egoro waraga kumae. 26Klaudio Lusia ni jabim ma dwong’ Feliki, moth iri. 27Ng’atu maeni Juyahudi make gibeyenyo nege, kan abino i bang’gi kud asikari alare ko nwang’u awinjo nia en e Jarumi. 28Kum ayenyo ang’ei thelembe m’uketho gidote, atere piny ba dilo migi: 29adong’ anwang’u nia gidote kum penji mi cik migi, ento en e gin ma romo ku nek kadi twic de ngo. 30E ka junyutho ira nia jubipido lembe kum ng’atuni, e aore i beng’i eno, awacu ni weg adote pare bende nia dong’ gidote kud i weng’i. 31Kum kumeno asikari, gigamu Paolo calu jung’olo rgi, gitere ku diewor nica Antipatri. 32Ento urwone giweko weg riuni e ma gidong’ gicidho kude, gin ke gidok ba ot ma tek: 33joca de, ka gitundo Kaisaria gimio waraga ni jabim, giketho Paolo de i wang’e. 34E kan esome, epenjo ka thugi; e kan ewinjo nia e dhanu ma Kilikia, 35ewacu kumae, Abiwinjoi cu nwang’u weg adote peri bende giwok: man eng’olo ya jukure i Odtiti pa Herode.

will be added

X\