Acts 22

1Umego ku wego de, wukowuwinj lembe para ma kawono abetito iwu. 2E ka giwinjo nia ebeyero igi ku dhu Juebrania, giling’ m’usagu: man ewacu kumae, 3An a Jayahudi, ma junyola i Tarso ma Kilikia, ento apidha re jupidha i adhura maeni, ku the tiend Gamaliel, juponja cu calku kura cik pa kwaruwa, ma ava Mungu tima, cil calu etimowu tinuni: 4man anyayu ragedo kum Yojuni cil mi nek ngi, m’atwio ko co ku mon de man acwalugi i odkol. 5Calu jalam ma dit bende nyutho pira, ku dilo ceke mi judongo bende: m’agamu waraga de i bang’gi ni umego, man acidho Dameski, kara akel ju ma ni kuca bende Yerusalem ku uno kara jusendgi. 6Man etimbre, nia ka wabewotho, wadhingo Dameski de, calu nyangu ma the dieceng’, e ndhu ndhu nica der uai i polo caru piny ngbeng’ i kuma. 7E apodho i ng’om, man awinjo dwal uwacu ira kumae, Saul, Saul, inyayu ragedo i kuma nedi? 8Man adwoko lembe kumae, In i ng’a, Rwoth? En ke edwoko lembe ira kumae, An a Yesu ma Nazareti, m’ibenyayu ragedo i kuma. 9Man ju ma wawotho wakugi gineno der andha, ento giwinjo dwal ungo m’uweco i bang’a. 10An ke awacu kumae, Abitimo ang’o, Rwoth? Rwoth uloko ira lembe kumae, Ai malu, icidh imond i Dameski; ka jubiyero iri kuca pi gin ceke ma juketho iri ya itim. 11E kan acopo neno piny ungo kum rieny mi der maeno, e ju ma wawotho wakugi gidong’ gipeya ku cinga ka wabino Dameski. 12E ng’atu moko ma nyinge Anania, m’e jalwor Mungu calku cik, ma pire ber de ni Juyahudi ceke m’ubedo kuca, 13ebino i bang’a, ecungo i vuta e ewacu ira kumae, Umira Saul, mak neno piny. E aneno bang’e ndhu i saa nica. 14Man ewacu kumae, Mungu pa kwaruwa kethi kara ing’ei gin ma ie yenyo, inen Ng’atu ma Pwe de, man iwinj dwal m’uai i dhoge bende. 15Kum ibibedo jamulembe pire ni dhanu ceke kum gin m’ineno m’iwinjo de. 16Kawono igalu nedi? ai malu, mak baputisi, lwok dubo peri woko, m’ilwong’ ko nyinge bende. 17E etimbre, nia, kan adwogo Yerusalem, e kinde m’arwo i hekalu, piny urwinyo kuda biti, 18e aneno ebeweco i bang’a kumae, Tim pio, iwodhri tho kud i Yerusalem kum gibijolo lembatuca ma pira ngo i beng’i. 19Man adwoko lembe kumae, Rwoth, ging’eyo gin ya i kacokri kubang’gi ceke abedafodo ju m’uyio iri acwalugi i odkol de: 20e ka rimb Stefano ma jamulembe peri cwir, nwang’u an de acungo i vute, ayia de ayio, akuro kum kendi mi ju m’unege de. 21Man ewacu ira kumae, Cidhi: kum abiori ngbir ba Thekdhanumange. 22E giwinje maram etundo ko kum lembe mae; e giting’o dwandgi malu, giwacu kumae, Wukab wagi ng’atu ma kumeno woko kud i ng’om: kum maku kud ebed kwo. 23E ka gikok, gibayu kendi migi de woko, giketho utur de i lietho, 24e jego ma dit ung’olo ya jutere i ot ma tek, ewacu nia jubiluro i lembe pare ku fodo, kara eng’ei thelembe m’uketho jukok kumeno i kume. 25E ka gitwie ku foto, Paolo wacu ni jego m’ucungo i vute kumae, Cik uyio ya ifod ng’atu ma Jarumi, ma fodi jukupoko lembe pare rac ungo? 26Ka jego winjo kumeni, ecidho ba jego ma dit, ewacu kumae, Iyenyo timo ang’o? kum ng’atu maeni en e Jarumi. 27E jego ma dit ubino ewacu ire kumae, Koiwac ira, in i Jarumi? Man ewacu kumae, Eyo. 28Jego ma dit uloko lembe kumae, Anwang’u paker maeni ku piny ma dit. Man Paolo wacu kumae, Ento an junyola anyola Jarumi. 29E ju ma giyenyo gliur i lembe pare ging’eny wany kud i kume: e jego ma dit bende lworo make kan eng’eyo nia en e Jarumi, man kum etwie. 30Ento urwone, kum eyenyo eng’ei thelembe ma Juyahudi dote i kume cu, egonye, man eng’olo ya julam ma dongo ku dilo ceke gicokri karacelo, man ekelo Paolo piny ekethe i wang’gi de.

will be added

X\