Acts 21

1E kan etimbre nia kindwa liero ku joca e wacidho ku yo mi pi, wabino atira Kos, urwone ke Rodo, waai keca wabino Patara: 2e ka wanwang’u combo m’ukadhu lokaca Foiniki, waidho i ie, wacidho ko ku yo mi pi. 3E ka waweko Kupro unen yor acam, wacidho Cami ku yo mi pi, e wanyiko Turo; kum keca ka ma combo olo ie ter. 4E ka wanwang’u julub wario keca ceng’ abiro: e joni wacu ni Paolo ku Tipo, nia kud enyon i Yerusalem. 5E ka ceng’ nica thum kakare, waai wacidho i woth mwa; e kagi ceke ku mongi ku nyithindhgi de, gilwokowa ram wakadhu ko ku i adhurane: e warum piny dhu wath, warwo, man wamothia; 6e wadong’ waidho i combo, gin ke giloko gidok thugi kendo. 7E ka wadaru wot ma waai ko Turo, watundo Tolemai: e wamotho umego, wario de wakugi ceng’ acel. 8Urwone waai, wabino Kaisaria: e wamondo i ot pa Filipo ma jayer lembayong’a ma juboth ko, ma en e ng’atu acel ma kind juabiro, wabedo i bang’e. 9Nie ng’atuno jumanyir pare gin ang’wen ma gi sumba, ma giewo. 10E ka wario keca ceng’ moko, jablia moko ma nyinge Agabo uai i Yahudi loro piny. 11E ebino i bang’wa, eting’o thondh pier Paolo, etwio ko tiende ku cinge, ewacu kumae, Tipo Maleng’ uwacu kumae, Juyahudi ma i Yerusalem gibitwio ng’atu ma won thondh pier maeni kumeni, gibikethe de i cing’ Thekdhanumange. 12E ka wawinjo gin maeni, wan ku ju ma kakeca de wakwaye ya kud eidh Yerusalem. 13E Paolo lund uloko lembe kumae, Wubeywak, wuturo ko adundena nedi? kum abedo ayika mi twic kende ngo, ento mi tho bende i Yerusalem pi nying Rwoth Yesu. 14E kan ekwero loko pidoie, waweke, wawacu kumae, Dong’ yeny ma i Rwoth uyenyo e m’utimbre. 15E yo ng’ei ceng’ maeni wating’o jamni mwa waidho Yerusalem. 16Man jumoko ma kind julub ma Kaisaria bende wacidho wakugi, ma gikelo ng’atu acel mi Kupro, ma nyinge Nason, en e jalub ma con, ma wabicibedo wakugi. 17E ka watundo Yerusalem, umego gijolowa ku mutoro. 18E urwone Paolo mondo ba Yakobo wakugi; nwang’u judongo ceke ginuti. 19E kan emothogi, egonyo gin ma Mungu timo acel acel i kind Thekdhanumange ni kum tic pare. 20Gin de, ka giwinjo maeni, giyungo Mungu; man giwacu ire kumae, Umego, ineno nia dhanu m’uyio ma kind Juyahudi gi rubanga swa ngi; man gin ceke ava cik utimogi: 21man giwinjo piri, nia iponjo Juyahudi ceke m’i kind Thekdhanumange ya giwek Musa, nia ku gitim yaa kum nyithindho migi, kadi kuragi de ku gikwany. 22Ka kumeno ang’o? gibiwinjo andha nia ibino. 23Ka kumeno tim maeni ma wawacu iri: Dhanu ang’wen nuti bang’wa ma lembang’ola ni i wigi: 24igam joni, wudwokru leng’ wukugi, iwodh jupiny igi, kara gigwar wigi: e dhanu ceke gibing’eyo nia lembe ma giwinjo piri en e lemandha ngo; ento nia in giri bende iwotho atira, iworo cik de. 25Ento pi Thekdhanumange ma giyio, wagoro, wang’olo nia dong’ gigwokri gigi kum gin ma julamu ni ayi gin m’acwia, man ni rimo, ku gin ma judeyo adeya, man kum tarwang’. 26E Paolo lund ugamu jono, man urwone kan edwokre leng’ gikugi gimondo i hekalu, m’enyutho ko nia ceng’ mi dwokrileng’ utimbre kakare, maram lam uwodhre ko pigi ceke kubang’gi kubang’gi. 27E ka ceng’ abiro dhingo thum, Juyahudi ma Asia, ka ginene i hekalu, githubo i udul dhanu ceke man giketho cing’gi i kume, 28gikok kumae, Dhanu mir Israel, wukonywa: Janduni en e ng’atu m’uponjo dhanu ceke ku kaka ceke kum dhanu, kum cik de kum ka maeni bende; man ke ekelo dhanu mi Yunani de i hekalu, man ecido kamaleng’ maeni. 29Kum gilar ginene i adhura giku Trolimo ma Jaefeso, e ma giwacu nyo Paolo kele i hekalu. 30E adhura ceke bewoi swa, dhanu de ring’ni karacelo; e gimaku Paolo, giywaye woko kud i hekalu: e giciko dhugolane rit. 31E ka gibeyenyo nege, rwonglembene tundo ba jego ma dit mir udul asikari, nia rop uromo Yerusalem ceke. 32E ndhu ndhu nica egamu asikari ku ju ma jego de, man gikonjri kugi piny i bang’gi: e joni, ka gineno jego ma dit kud asikari de, giweko fodo Paolo. 33E jego ma dit ulund ubino ceng’ni, emake de, man eng’olo ya jutwie ku nyoro ario; e epenjo nia en e ng’a, man edubo ang’o. 34E juman kok ku lembe migi tung’, juman ku lembe migi tung’, i kind njuru dhanu: e kan ecopo ng’eyo the rop maeni ngo cu kum woi mi dhanu, eng’olo ya jutere i ot ma tek. 35E kan ewok wi gin ma juidho ko i ot, nwang’u asikari giyeye ayeya kum rop mi njuru dhanu; 36kum udul dhanu gilubo ng’eye, ma gikok kumae, Wucwale cen. 37E ka jumaku tero Paolo i ot ma tek, ewacu ni jego ma dit kumae, Acopo yero lembe moko iri? Man ewacu kumae, Ing’eyo dhu Juyunani? 38Ka kumeno in i Jamisiri ngo ma nyamaca teng’o ali, m’utelo wi dhanu rubanga ang’wen i yamba mi Jukwori? 39Ento Paolo wacu kumae, An a Jayahudi, mi Tarso i Kilikia, an a dhanu mir adhura ma nok ungo: e akwei, ya ikoiyi ayer ni dhanu. 40E kan eyio, Paolo, m’ucungo wi gin ma juidho ko i ot, ejuko dhanu ku cinge; man ka giling’ ti, eyero igi ku dhu Juebrania, ewacu kumae,

will be added

X\