Acts 20

1E yo ng’ei rop m’uthum Paolo ma nwang’u elwong’o julub i bang’e ejukogi de, emothogi, e eai ecidho i Makedoni. 2E kan ekadhu kud i theng’ ng’ombuca, emio igi juk de ma dit, ecidho i Yunani. 3E kan ebedo dwi adek kuca, e Juyahudi gipido lembe i kume kinde ma nik etug woth ecidh i Cami ku yo mi pi, ie keco ya ebidok ku yo Makedoni. 4Ju ma gicidho gikugi gijik Asia, Sopater ma Beroya, wod Puro; man mi Jutesaloniki ke, Aristarko man Sekundo; man Gayo ma Derbe, ku Timoteo; man mir Asia ke, Tukiko giku Tronmo. 5Ento joni gilar gicidho, gidong’ gikurowa i Troa. 6E waai Filipi ku yo mi pi ka ceng’ mi kwen ma thobi mbe i ie kadhu, e watundo i bang’gi Troa i ceng’ abic; ka ma wario i ie ceng’ abiro. 7I ceng’ ma kwong’ane ma yenga, ka wacokra karacelo ning’weko i kwen, Paolo giweco gikugi, nwang’u ie pido ya urwone ebicidho; man eyero hai maram piny udoko ko diewor ma ling’. 8Thala de dupa i ot ma malu ka ma wacokra ie karacelo. 9Nwang’u jalawobi acel ma nyinge Eutuko ubedo i wang’ot, ma nindo ma dit unuro kume; man ka Paolo becidho ku yero lembe ma sagu, ng’atuno ma nindo pare sage epodho piny kud i ot mir adege, man juting’e m’etho. 10E Paolo gam uloro piny, eriebre i wie, egwake ewacu kumae, Kud wutimbru swa; kum kwone nuti i ie. 11E kan eidho malu, eng’weko i kwen de, man ecamu, giweco gikugi hai de, maram piny uru ko, e eai woko. 12Gidong’ gikelo nyiruno m’ebedo kwo, e cwinygi kwio. 13Ento wan, ma walar wacidho ba combo, wacidho Aso ku yo mi pi iwa wacu nyo wabicigamu Paolo kuca: kum eng’olo kumeno, ie caku en ya ewoth ku wi ng’om. 14E ka warombo wakugi Aso, wagame, wabino kugi Mitulene. 15E waai keca ku yo mi pi, urwone watundo kum Kio; ceng’ mir adege wagudo Samo; e ceng’ mir ang’wende watundo Mileto. 16Kum Paolo keco ya ekadh Efeso ku yo mi pi, kara kud egal i Asia; kum ewotho pio pio, kara tek ecopre, ceng’ Pentekote ubin unwang’e Yerusalem. 17E eoro lembe kud i Mileto ucidho Efeso, ulwong’ judong kanisa ubin i bang’e. 18Ka gibino i bang’e, ewacu igi kumae, Wun wung’eyo giwu, ugambre i ceng’ ma tienda lar unyono i Asia, maram wabedo ko kudu nindo ceke, 19m’atimo ko ni Rwoth ku pidoia ma mol kwa, man ku piwang’, ku masendi bende m’unwang’a kum rieko lembe mi Juyahudi; 20maram alworo ko ngo niyero iwu gin ceke m’ubedo ni kuloka, ku ponjowu kele, man ku ba udi ku ba udi 21abedatuco ni Juyahudi ku Juyunani bende ya gilok cwinygi ba Mungu, man gibed ku yioyic yo ba Rwoth mwa Yesu Kristu. 22Man nen, kawono, cwinya twire ya aci Yerusalem m’ang’eyo ko gin ma biciwok i kuma kuca ngo: 23ento Tipo Maleng’ utuco ira ku bang’ adhura ceke, ewacu nia kol ku ruvwa bekura. 24Ento aneno kwo para mit ungo i wang’a, ento kara adar bedo para, ku tic m’agamu ba Rwoth Yesu, ya atuc lembanyong’a ma juboth ko mi bero pa Mungu. 25Man kawono, nen, ang’eyo nia wun ceke, m’awotho i kindwu ayero iwu pi ker, wubineno wang’a kendo ngo. 26Kum kumeno tinuni atuco iwu, ya an a leng’ ni rimb dhanu ceke. 27Kum alworo ngo niyero iwu lembapora pa Mungu ceke. 28Wubed ku weng’wu giwu, kud udul ceke, ma Tipo Maleng’ uketho wudoko julieu i ie kara wumi cam ni kanisa pa Rwoth m’eng’iewo ku rimbe gire. 29Ang’eyo yo ng’ei ai para urudi ma rac bimondo i kindwu, ma kisa mbe kugi kum udul; 30man kud i kindwu dhanu moko biai, ma biyero lembe ma tung’. kara giwing’ julub ulub ng’eigi. 31Kum kumeno wukuru, wupoi ya calu nindo mi rundi adek aweko juko dhanu ngo kubang’gi kubang’gi diewor ku dieceng’ ku piwang’. 32Kawono athierowu ni Mungu, man ni lembe mi berone, ma copo teng’owu, ma copo mio iwu camupacu de kind dhanu ceke ma judwokogi leng’. 33Ng’atu moko mbe m’aneno mola ma tar pare mit i wang’a, kadi mola ma kwar, kadi kendi de. 34Wung’eyo giwu nia cing’ maeni timo ni canpiny m’unega, ni ju ma wanuti wakugi de. 35I gin ceke amio iwu por, nia ku tic ma wumulu ko kumeni maku wukony ju ma ng’ic, wupoi de kum lembe pa Rwoth Yesu, nia ewacu en kumae, Mio en e mugisa ma sagu gamu. 36E kan edaru yero kumeno, e erum piny man girwo gikugi ceke. 37E kagi ceke giywak dit, gigwaku ng’ut Paolo gicwio limbe de, 38ma can unegogi ma sagu kum lembe m’eyero, nia gibineno wang’e kendo ngo. E gitere i yo pare ba combo.

will be added

X\