Acts 2

1E ka ceng’ mi Pentekote tundo, kagi ceke gibedo karacelo i ka acel. 2E aruca ruca nica ba gin moko ai i polo pami wavuvu m’ukoto, man epong’o ot ceke ka ma gibedo i ie. 3E leb m’ukaru pami lebmac, uwok i wang’gi; man ebedo i wigi kubang’gi nzu. 4E kagi ceke Tipo Maleng’ uromogi, man gimaku weco ku dhok ma nge nge, calu wec ma Tipo mio igi. 5Nwang’u Juyahudi gibedo Yerusalem, gi dhanu ma lworo Mungu, ma giai kud i thek ceke ma the polo. 6Man ka ba gin maeni winjre, udul dhanu gicoko dhoggi karacelo, e lembene loyogi, kum dhanu kubang’gi nzu giwinjo gibeweco ku dhu thugi ma dhe. 7E kagi ceke gipoi igi de wang’ lii, giwacu kumae, Nen, joni ceke ma giweco gi Jugalilaya ngo? 8Wawinjo ku dhu thuwa ma junyolo kowa kubang’wa ceke ngi nenedi? 9Juparthi ku Jumedi man Juelemiti, ku ju m’ubedo i Mesopotamia, i Yahudi man Kapadokia, i Ponto man Asia, 10i Frugia man Pamfulia, i Misiri man ng’et Libua ma yo ba Kurene, ku jubedo m’uai i Rumi, Juyahudi ku ju ma juloko wang’gi bende, 11Jukrete man ju Arabi, wawinjo gibeweco ku dhu thuwa kwa pi tic ma dwong’ pa Mungu. 12E kagi ceke igi wang’ lii, e igi pido kwe, giwacu gigi kumae, Thelembe maeni ang’o? 13Ento jumange giyero ku cac kumae, Pigulok ma nyasa merogi en. 14Ento Petro, m’ucungo giku juwagi apar wi acel, eting’o dwande malu, eyero igi kumae, Wu dhanu mi Yahudi, ku kewu ceke ma wubedo i Yerusalem de, dong’ wung’ei lembe nini, man wucik ithwu kum lem para. 15Kum joni gimer amera ngo, calu ma wuwacu nyo; kum ceng’ udoko saa adek kende; 16ento maeni en e lembe m’uyere ni kum jabila ma Yoel: 17Mungu wacu kumae, Gini bitimbre i kajik ceng’, Abikonjo kum Tipo para moko wi weg kum ceke: Man wotu ku nyigu gibiewo, Awobi mu de gibineno ginmawokiwang’, Judongo mu m’uti ke gibileko lek: 18Eyo i ceng’ maeno abikonjo kum Tipo para wi jumiru para ma co. Ku jumiru para ma nyir bende; e gibiewo. 19Man abinyutho musana malu i polo, Ku giranyutha ma piny i ng’om de; Rimo, ku mac, ku lietho mi yiro de: 20Ceng’ bilokre ni mudho, Dwi ke ni rimo, Ma fodi ceng’ pa Rwoth ku wok ungo, Cenguno m’e dwong’ pire de dit: 21Gini bitimbre, nia ng’atu ma tek bilwo ng’o nying Rwoth ebiboth. 22Wu dhanu pa Israel, wuwinj lembe maeni: Yesu ma Nazareti, en e ng’atu ma Mungu foye iwu ku tic ma dwong’ man musana ku giranyutha ma Mungu timo ni kume i kindwu, cil calu wun de wung’eyo giwu; 23en, ma jumie ni kum lembagora m’ubedo aketha pa Mungu m’elar eng’eyo, wun de wudong’ wugure ku cing’ juco wunege de: 24ma Mungu ketho ecer, m’egonye ko ku i masendi mi tho: kum ecopre ngo ya ebed kudo. 25Kum yang’ Daudi yero pire kumae, Aneno Rwoth i wang’a thiri thiri; Kum eni yo ku cinga ma yor acwic, kara ia kud upidi: 26Ka kumeno mutoro nego adundena, leba de anyong’a nege; Man ke ring’kuma bende bibedo m’egeno; 27Kum ibiweko ng’eyong’ec para ni Hadeya ngo, Kadi ibimio Ng’atu Maleng’ peri ngo ya enen top. 28Iketho ang’eyo yo mi kwo; Ibiyeng’a ku mutoro i weng’i. 29Umego, acopo yero iwu dwe dwe pi Daudi ma kwaru, nia etho man juyike, man ke odliel pare ni i kindwa cil i ceng’ maeni. 30Kum en e jabila, m’eng’eyo de nia Mungu ng’olo ire ku kwong’, nia kum kodhi mi kume ebiketho ng’atu acel wi komker pare: 31en m’elar eneno maeni eyero pi cer ma Kristu bicer ko, nia juweke ni Hadeya ngo, kadi ring’kume de neno top ungo. 32Yesu maeni Mungu ketho ecer, ma kawa ceke de wa jumniembene. 33Ka kumeno en ma judode malu ba cing’ Mungu ma yor acwic, m’ejolo lembang’ola ma Wego ng’olo pi Tipo Maleng’, ekonjo gin maeni, ma wuneno wuwinjo de. 34Kum Daudi idho i polo ngo: ento ewacu en kumae, Rwoth uwacu ni Rwoth para, Jany yo ku cinga ma yor acwic, 35Maram abiketho ko jukwoji ni kom mi tiendi. 36Dong’ juot pa Israel ceke ging’ei ma cwinygi kwio, nia Mungu ketho Yesu maeni ma wugure, ni Rwoth ku Kristu bende. 37Nie ka giwinjo maeni, e ecobo adundegi, man giwacu ni Petro giku jukwenda wagi de kumae, Umego, wabitimo ang’o? 38E Petro wacu igi kumae, Wulok cwinywu, wumak baputisi kubeng’wu kubeng’wu ku nying’ Yesu Kristu ni ruc mi dubo mu; man wubijolo giramia ma Tipo Maleng’. 39Kum lembang’olane en e iwu, man ni nyithindho mu, man ni dhanu ceke ma gibedo bor cen, cil ku ju ma Rwoth Mungu mwa bilwong’o i bang’e. 40Man etuco ku lembe mange de dupa, man ethokogi, ewacu kumae, Dong’ wubodhiu giwu ni dlianum’utuk maeni m’ugondri. 41E ju m’ujolo lembe pare gilund gimaku baputisi: man ceng’ nica dhanu ma yenyo romo rubanga adek umedogi. 42Man gibedo asu ku ponji mi jukwenda ku ripocwiny de, ku kwen m’angweka man ku rwo de. 43Man Iworo makugi kubang’gi ceke: e musana ku giranyutha dupa rimbre ni kum jukwenda. 44E ju m’uyio ceke gibedo karacelo, piny migi ceke de bedo ariba; 45man giloko jupiny migi ku jamni migi de, gipoko de ku ba dhanu ceke, calku canpiny ma ni kum dhanu kubang’gi kubang’gi. 46Man ku ba rupiny ku ba rupiny, ma gibedo asu ku cwinygi m’uripo acel i hekalu, ku kwen m’ang’weka de i udigi, gijolo cemo migi ku mutoro kwa kud adunde m’ucungo acel, 47ma gipaku ko Mungu, ma gibedo ku bero de ku ba dhanu ceke. E Rwoth ucikumedo igi ju m’uboth ku ba rupiny ku ba rupiny.

will be added

X\