Acts 19

1Man etimbre, nia, kinde ma Apolo ni i Korinto, Paolo m’udaru kadhu kud i ng’om ma yo malu ebino Efeso, man enwang’u julub moko: 2e epenjogi kumae, Wujolo Tipo Maleng’ ka wuyio? Giloko lembe de giwacu ire kumae, Ungo, kadok awinja de wawinjo ngo nia Tipo Maleng’ umire. 3Man ewacu kumae, Ka kumeno jumio iwu baputisi ma mir ang’o? Giwacu kumae, Baputisi pa Yohana. 4Paolo wacu kumae, Yohana mio baputisi mi lokocwiny, ewacu ni dhanu nia dong’ giyi ng’atu ma bilubo ng’eye, en e Yesu. 5E ka giwinjo maeni, e jumio igi baputisi ku nying Yesu. 6Nie ka Paolo ketho cinge i kumgi, Tipo Maleng’ uwok i wigi; e gimaku weco ku dhok mange, man giewo. 7Dhanune ceke giyenyo romo apar wi ario. 8Man emondo i kacokri eyero de ku tegocwinye nindo mi dwi adek, ebedeluro i lembe man ethokogi pi lembe mi ker pa Mungu. 9Ento ka jumoko cwinygi doko nwang’ man giwor ungo, gicido Yojuni i wang’ udul dhanu, eai i bang’gi, ekoyo julubne de, ebedeluro i lembe ku ba rupiny ku ba rupiny i kisoma pa Turano. 10Gin maeni timbre nindo mi rundi ario: ketho dhanu ceke m’ubedo i Asia giwinjo lembe pa Rwoth, Juyahudi ku Juyunani bende. 11E Mungu timo musana ma dit ku cing’ Paolo: 12ketho nia jugamu kitambala ku bongu mi tic m’i kume, jutero ba ju ma kumgi lith, e kumgi kei ndhu, tipo ma rac de ai woko kud i igi. 13Ento Juyahudi moko bende ma giwotho swa, gi weg ajoga, gimaku lwong’o nying Rwoth Yesu wi ju ma weg tipo ma rac giwacu kumae, Wakwong’owu ku Yesu ma Paolo beyero pire. 14Nwang’u Skewa acel, e Jayahudi, ma jalam ma dit, wote de abiro nuti ma gitimo maeni. 15Tipo ma rac uloko lembe ewacu igi kumae, Yesu ang’eyo, Paolo de ang’eyo; ento wun wu jukani? 16E ng’atu ma won tipo ma rac upodho i wigi, esagu gin ario de, eloyogi ndhu, ketho gipiei kud i oduno muneru ma kumgi ju rem de. 17Lembene yik ba dhanu ceke, Juyahudi ku Juyunani de, ma gibedo Efeso; e lworo podho i wigi ceke, nying Rwoth Yesu de doko dwong’. 18Man dhanu dupa bende ma giyio gibino, gituco, giyero pi tic migi de. 19Weg ajoga de m’i kindgi ma nok ungo gikelo kitabu migi karacelo giwang’ugi de i wang’ dhanu ceke; gikwanu wel pinje de, ginwang’u etundo sente mi mola ma tar rubanga pier abic. 20Ka kumeno lembe pa Rwoth unyai udoko dit ma sagu. 21Nie yo ng’ei gin maeni, Paolo keco i cwinye, nia kan ekadhu ku i Makedoni kud Akaya de ya ecidh Yerusalem ewacu kumae, Yo ng’ei cidho kuca, akoneno Rumi be. 22E kan eoro juario ma kind ju ma timo ire ucidh i Makedoni. Timoteo gikud Erasto, en gire edong’ tundu i Asia. 23Man i nindo maeno i dhanu bepido rr kum lembe mi Yojuno. 24Kum ng’atu acel ma nyinge Demetrio, ma jabodho mi mola ma tar, m’etimo hekalu mi mola ma tar mir Artemi, ma kelo kuloka ma nok ungo ni jubodho; 25m’ecokogi karacelo, ku weg tic ma calu maeni de, man ewacu kumae, Paco, wung’eyo nia wanwang’u lonyo ku bodho maeni. 26Wuneno wuwinjo de, nia i Efeso kende ngo, ento cil i Asia ceke kpr kpr, Paolo maeni ethoko dhanu dupa man ewingogi, ewacu nia mungu ma juthiedho ku cing’ ya gi mungu ngo: 27man bodho mwa maeni kende ngo ma jumaru cayu; ento hekalu mir Artemi ma mungu ma nyaku ma dit bende jubidwoke doko mananu, jubikabe woko ku kadwong’ pare ma naka Asia ku ng’om ceke girwo i bang’e. 28E ka giwinjo lembe maeni kwinyo pong’og, man gikok, giwacu kumae, Artemi mi Juefeso e dwong’. 29E adhura pong’ ku yakni: man gikonjri kro i kacokri, ka gidaru maku Gayo gikud Aristarko, gi dhanu ma Makedoni, ma giwotho ku Paologi. 30E ka Paolo yenyo emond ba dhanu, julub gicere. 31Dhanu moko mir Asia bende, ma gi jurimbe, gioro lembe i bang’e gikwaye nia kud emond i kacokri. 32Ka kumeno jumoko gikok ku lembe acel, jumoko ke ku lembe mange: kum cokri bedo wuu; dhanu kucel ma dit ging’eyo lembe ma gicokri i kume ngo. 33Gidong’ giwodho Iskander kud i kind udul dhanu, ma Juyahudi gikethe i wang’ dhanu. Man Iskander ujukogi ku cinge, man eyenyo etit thelembe ni dhanu. 34Ento ka ging’eyo nia en e Jayahudi, kagi ceke gikok ku dwandgi acel i kinde ma yenyo romo saa ario kumae, Artemi mi Juefeso e dwong’. 35Ka jagorlembe juko udul dhanu, ewacu kumae, Wu Juefeso, dhanu makani ma kung’eyo nia adhura mi Juefeso e jakur hekalu mir Artemi ma dwong’, kud ayi de m’uai ba Zeu upodho pinyi? 36Kum jucopo piemo kum gini ngo, maku wubed moth, man kud wutim lembe vur vur. 37Kum wukelo dhanu maeni kakeni, ma gi juyak hekalu ngo kadi gi jucid mungu mwa ma nyaku de ngo. 38Ka kumeno tek Demetrio, ku jubodho wadi ma ni i bang’e, lembe ni i igi kum ng’atu moko, katitlembe bedo ayaba, man jutitlembe de ginuti: wek gidotri. 39Ento tek wuyenyo lembe moko i gin mange ebing’eny i vora ma juketho. 40Kum andha jumaru dotowa kum rop maeni ma tin, kum there mbe: man pi lembe maeni there bititre iwa ngo kum udul dhanu maeni. 41E kan edaru yero kumeno, elalu cokri.

will be added

X\