Acts 18

1Yo ng’ei lembe maeni eai Athene, man ebino Korinto. 2Man enwang’u Jayahudi moko keca ma nyinge Akula, thugi ni i Ponto, fodi eai i Italia, giku cege ma nyinge Priskila, kum Klaudio ng’olo ya dhanu ma Juyahudi ceke giai i Rumi: e ebino i bang’gi; 3man kum gi weg bodho acel, gibedo gikugi, gitimo de: kum bodho migi kwoyo hema. 4Ebedeluro lembe ku ba ceng’ sabatu i kacokri, ebedethoko ko Juyahudi ku Juyunani de. 5Ento ka Sila giku Timoteo giai i Makedoni giloro piny, e lembe ting’o cwiny Paolo, man etuco ni Juyahudi ya Yesu en e Kristu. 6E ka gipiembri giyanyu ayany de, eyengo bongu pare man ewacu igi kumae, Dong’ rimo mu bed i wiwu giwu; an a leng’ ugambre kawono adong’ cidho ba Thekdhanumange. 7E eai kakeca, emondo de i ot pa ng’atu acel ma nyinge Tito Yusto, en e ng’atu ma rwo ni Mungu, ma ot pare bedo ceng’ni ku kacokri. 8Man Krispo, ma jadit mi kacokri, uyio Rwoth ku juode ceke; Jukorinto de dupa ka giwinjo giyio, e jumio igi baputisi. 9E Rwoth uwacu ni Paolo ku diewor ku ginmawokiwang’ kumae, Lworo kud unegi, ento yer kud iling’: 10kum wanuti wakudi, ng’atu moko mbe de ma bitimo rac i kumi: kum abedo ku dhanu dupa i adhura nini. 11Ebedo kuca rundi acel ku dwi abusiel, ebedeponjo lembe pa Mungu i kindgi. 12Nie kinde ma Galio bedo jabim mir Akaya, Juyahudi giai wang’ acel kum Paolo gitere i wang’ kom mi pokolembe, 13giwacu kumae, Ng’atuni bethoko dhanu ya girwo ni Mungu tung’ ku ma cik uyio. 14Ento ka Paolo yenyo alu dhoge, Galio wacu ni Juyahudi kumae, Tek en e lembe ma rac kadi lem sasa ma rac, E wu Juyahudi, kuno di awinjowu: 15ento tek en e penji mi lembe man mi nying’ ku mi cik mu giwu, wukor ie giwu; kum ayenyo ngo abed japoklembe mi gin ma kumeno. 16Man eriemogi woko ku vut kom mi ng’olo lembe. 17E kagi ceke gidong’ gimaku Sosthene, e jadit mi kacokri, e gifode nyim kom mi pokolembe. E Galio oyo lembene ku die ng’eye. 18Man Paolo, kan erio ceng’ dupa yo ng’ei lembuni, emotho umego, e etugo woth ku yo mi pi ecidho Cami, giku Priskila man Akula: kan edaru gwaru wie Kenkrea; kum eng’olo lembene ang’ola. 19E gitundo Efeso, man ewekogi keca: ento en emondo i kacokri, man giluro lembe giku Juyahudi. 20E ka gipenje ya gikogibed kugi tundu, eyio ngo; 21ento emothogi, ewacu kumae, Abidwogo i beng’wu kendo tek Mungu yio, e eai Efeso ku yo mi pi. 22E kan etundo Kaisaria, eidho malu emotho kanisa, kan edong’ eloro Antiokia. 23E kan erio nindo moko keca, eai, ekadhu i ng’om Galatia, ku Frugia, ndri ndri, ecikudwoko cwiny julub ceke tek. 24Nie Jayahudi moko ma nyinge Apolo, ma junyole i Iskander, en e ng’atu ma dwande leng’, ebino Efeso; man eng’eyo lembagora pa Mungu dit. 25Judaru ponjo ng’atu maeni ku yo pa Rwoth; e cwinye ting’e dit eyero eponjo lembe pi Yesu cu, ere eng’eyo baputisi pa Yohana kende: 26man emaku yero ku tegocwinye i kacokri. Ento ka Priskila gikud Akula giwinje, gigame i bang’gi, man gikoro ire pi yo pa Mungu cu ma sagu. 27E ka ie pido nik ekadh i Akaya, umego gicwake, gigoro lembe de ni julub ya gijole: e kan ewok, ekonyogi dit gi ju ma giyio ni kum bero; 28kum eloyo Juyahudi, enyutho i wang’ dhanu ku lembagora pa Mungu nia Yesu en e Kristu.

will be added

X\