Acts 17

1Nie ka gikadhu kud i pacu Amlipoli, kud Apolonia de, e gibino Tesaloniki, ka ma kacokri mi Juyahudi ni ie: 2man calu kura Paolo emondo i bang’gi, man ku ba ceng’ sabatu adek gicikuluro lembe i lembagora pa Mungu gikugi, 3eyabu i lembe enyutho de ya Kristu kosendre be, man eai kendo de ku kind ju m’utho; man nia Yesu maeni, m’ayero iwu pire nini, en e Kristu. 4E jumoko m’i kindgi giloko pidoigi, man giribri ku Paolo ku Silagi: udul Juyunani ma dit de ma lworo Mungu, ku mon ma dongo de nyanok ungo. 5Ento Juyahudi, ma ngiri benegogi, gigamu jumoko ma rac ma kind dhanu ma sai, e ka gicoko njuru dhanu, ginyayu rop i adhura; e gicori kum ot pa Yason, giyenyo giwodh joca woko ni dhanu. 6E ka ginwang’ugi ngo, gidong’ giywayu Yason kud umego moko i wang’ jubim mir adhura, gikok kumae, Joni ma ginyotho ng’om gibino keni bende, 7ma Yason ujologi; man joni ceke gitimo tung’ ku cik pa Kaisari, giwacu ya ubimo mange nuti, en e Yesu. 8Man gisendo udul dhanu ku jubim mir adhura de, ka giwinjo gin maeni. 9E ka gigamu jupiny ma Yason ku juwagi gigonjri ko, e giwekogi ya gicidhi. 10Man umego gioro Paolo giku Sila pio pio ku diewor nica gicidho Beroya: gin ka gitundo kakeca gimondo i kacokri mi Juyahudi. 11Nie joni gi riek ma sagu ju ma Tesaloniki kum gijolo lembene ku pidoigi ma yot, giyenyo i lembagora pa Mungu ku ba rupiny ku ba rupiny, tek gin maeni en e andha. 12Ka kumeno dupa m’i kindgi giyio; mon Juyunani ma dongo, ku jumaco de, nyanok ungo. 13Ento ka Juyahudi ma Tesaloniki ging’eyo nia Paolo yero lembe pa Mungu Beroya de, gicidho kuca bende, ma gibethubo kind udul dhanu gisendogi de. 14E aruca ruca nica umego gilund gioro Paolo ucidho agbele dhu nam: Sila giku Timoteo gidong’ keca. 15Ento ju ma gilwoko Paolo gitere cik Athene: e ka gigamu lembang’ola m’ulwong’o Sila giku Timoteo ya gibin i bang’e pio pio, e gicidho. 16Nie kinde ma Paolo bekurogi i Athene, edieng’o cwinye kan eneno adhurane dhir kud ayi m’acwia. 17Kum kumeno gibegiporo lembe i kacokri giku Juyahudi ku ju ma lworo Mungu de, man i katali ku ba rupiny ku ba rupiny ku ju ma girombo kugi bende. 18Jurieko moko ma gi Juepikurio ku Justoiki girombo kugi. Man jumoko wacu kumae, Jakemo maeno yenyo yero nik ang’o? jumange wacu kumae, Kuno nyo e jayer pi mungu ma welo: kum eyero pi Yesu ku pi cer bende. 19E gigame, gitere Areopago, gipenje kumae, Iyio wang’ei ponji ma nyen maeni m’ibeyero no? 20Kum ikelo gin ma fo’wakung’eyo ngo ba ithwa: ka kumeno nie wayenyo wang’ei thelembe mi gin maeni. 21(Nie Juathene ku welo m’ubedo i kindgi gidaru nindo migi ku gin moko mange ngo, ndhu ku yero kadi ku winjo gin moko ma nyen.) 22Man Paolo cungo i dier Areopago, ewacu kumae, Wu dhanu mir Athene, aneno i gin ceke wuyenyo ka mungu dit. 23Kum kan abekadhu, man aneno gin mi rwo mu, anwang’u pemblam de ma karamblembe ni i kume kumae, NI MUNGU MA JUKUNG’EYO NGO. Nie gin ma wurwo i bang’e ma wubedo cobo pire nini, e ma ayero iwu pire. 24Mungu m’ucwio ng’om ku gin ceke ma ni i ie de, en, m’e Rwoth mi polo ku ng’om de, ebedo i hekalu ma jugomo ku cing’ ungo; 25kadok ku cing’ dhanu de jutimo ire ngo, calu ya can gin moko benege, kum en e m’emio kwo ni giki ceke, ku lietho m’i igi de, ku gin ceke; 26man etimo thek ceke mi dhanu kud acel kara gibed i wang’ ng’om ceke, nwang’u eng’olo rundi migi m’aketha, ku kieu mi kabedo migi; 27kara giyeny Mungu, tek kuno nyo giyenye e ginwang’e, kadok abora de ebor ungo kudwa kubang’wa nzu: 28kum wakwo man wawotho, wabedo de ni kume; calu jurieko mu moko giwacu kumae, Kum wan de wa nyikwaye. 29Ka kumeno tek wa nyikwai Mungu, maku ku wawac nia nyo Rucwic calu mola ma kwar, kadi mola ma tar, kadi kidi ma jung’iko ku bodho man ku rieko mi dhanu. 30Nie nindo ma jubedo ie cobo, wang’ Mungu kadhu kud i wie; ento kawono eng’olo ni dhanu ceke ku kaka ceke ya gilok cwinygi: 31kum eketho ceng’ m’ebipoko ie lembe mi ng’om i bedopwe ku ng’atu m’eketho: kum maeni emio gin ma ketho kwiocwiny ni dhanu ceke, kum eketho ecer ku kind ju m’utho. 32Nie ka giwinjo pi cer mi ju m’utho, jumoko gicayu acaya; ento jumoko giwacu kumae, Wabiwinjo pi maeni kendo i beng’i. 33Ka kumeno Paolo ai woko kud i kindgi. 34Ento jumoko gimoko i kume, giyie de: kind joni moko Dionusio ma Jaareopago, dhaku ke ma nyinge Damari, giku jumange de.

will be added

X\