Acts 16

1Man ebino Derbe ku Lustra bende: man nen, jalub moko ni keca, ma nyinge Timoteo, e wod Nyayahudi m’uyio; won mire re Jayunani. 2Ng’atuno umego ma Lustra kud Ikonio de giyero pire ber. 3E Paolo yenyo gici gikude; e gigame gitimo yaa i kume ni kum Juyahudi ma gini keca: kum kagi ceke ging’eyo nia won mire e Jayunani. 4Man ka gicikukadhu ku kind adhura, gimio igi lem cik ma giwor ma jukwenda ku judongo ging’olo i Yerusalem. 5Ka kumeno kanisa doko tek i yioyic, man gicikumedri ku ba rupiny. 6Man gikadhu kud i ng’om Frugia ku Galatia de, gi ju ma Tipo Maleng’ ukwerogi ya ku giyer lembuni i Asia; 7e ka giwok kum Musia, giponjo ya gicidh i Bithunia; e Tipo Yesu yio igi ngo; 8ka gikadhu Musia, giloro Troa. 9Man ginmawokiwang’ uwok i wang’ Paolo ku diewor kumae: Ng’atu acel m’i Makedoni cungo, m’ebekwaye ma tek, ewacu kumae, Bin lokani i Makedoni, man ikonywa. 10E kan eneno ginmawokiwang’, e ndhu ndhu nica waponjo cidho i Makedoni, iwa wacu ya Mungu lwong’owa waci wayer lembanyong’a ma juboth ko igi. 11Ka kumeno ka waai Troa ku yo mi pi, wacidho atira Samothraki, urwone ke Neapoli; 12waai ku keca wacidho Filipi, ma adhura mi Makedoni, en e ma kwong’a mi ng’ombuno, e ng’om mi Rumi; e wario i adhura nini ceng’ moko. 13Man i ceng’ sabatu wani wacidho yo ng’ei gang’ dhu kulo, ka ma wawacu nyo karwo ni ie; e wabedo piny wayero de ni mon ma gicokri karacelo. 14Nwang’u dhaku moko ma nyinge Ludia, m’e jatim jamkuloka m’uluga, m’eai i adhura Thuatera, en e ng’atu ma rwo ni Mungu, ewinjo dwandwa: Rwoth uting’o adundene kara ie pid pi gin ma Paolo yero. 15E kinde m’emaku baputisi, ku juode de, e ekwayuwa ma tek, ewacu kumae, Tek iwu wacu ya an a mandha ku ba Rwoth, wumond i ot para, wubed keca de. E ecerowa. 16Man etimbre, kinde ma wabecidho karwo, ya warombo ku nyaku ma won tipo mi ewo giraewa, m’ekelo piny dit ni wegi kum lembe m’ebedeewo. 17Nyano kan ebelubo tokwa waku Paologi ekok akoka, ewacu kumae, Joni gi jumiru pa Mungu ma Malu Ngbir, ma giyero iwu yo mi both. 18Etimo maeni ceng’ dupa. Ento Paolo, can umake dit, elokre ewacu ni tipo kumae, Ang’olo iri ku nying Yesu Kristu nia iwok woko kud i ng’atuni. E eai woko i saa maeni nini. 19Ento ka wegi gineno nia genogen mi kuloka migi ai, gimaku Paolo giku Sila, man giywayugi aywaya gicidho kugi i katali i wang’ jubim, 20e ka gikelogi i wang’ jupoklembe, giwacu kumae, Joni, ma gi Juyahudi, gisendo adhura mwa dit apila. 21man giketho kura ma cik uyio ngo nia wajol, kadi wawor, wan ma wa Jurumi. 22E udul dhanu ceke giai i kumgi karacelo: e jupoklembe giyeco kendi mi joca woko, man ging’olo ya jufodgi ku dul. 23E ka gigoyogi wang’ udul, gicwalugi i odkol, ging’olo ni jakur odkol ya ekurgi kr: 24en de, kan egamu ng’ol ma kumeno, ecwalugi i kusika ma yo the odkol, eroyo kol de i tiendgi. 25Ento kinde ma piny udoko diewor ma ling’, nwang’u Paolo giku Sila giberwo gibewero wer de ni Mungu, jukol de gibewinjogi; 26e eni eni digidi ma dit uwok, ketho the odkol umaku yengre: e ndhu ndhu nica dhugola ceke yabre; e twic mi jukol de ceke gonjre. 27Man jakur mi odkol, uceu ku wang’ nindo e kan eneno dhugola mi odkol ubedo thwolo, eting’o palamularu pare nik enegre ko, ewacu nyo jukol upiei. 28Ento Paolo kok ku dwande ma tek, ewacu kumae, Kud itim gin moko i kumi: kum wan ceke wanuti keni. 29E elwong’o mac man epiei i ie de, ma kume bemiel ku lworo, epodho piny i wang’ Paolo giku Sila, 30man ewodhogi woko ewacu kumae, Paco, akoatim ang’o be ketho abothi? 31Man giwacu kumae, Yi Rwoth Yesu, e ibiboth. in ku juodi de. 32E giyero lembe pa Rwoth ire, ku dhanu ceke ma ni i ot pare de. 33E ecokogi ndhu i saa mi diewor nica, man elwoko wang’ goc mi kumgi; e jumie baputisi ndhu ndhu nica, giku juode kpo. 34Man eterogi malu i ot pare, eketho cam de i wang’gi, e anyong’a nege dit, giku juode ceke, ma giyio Mungu. 35Ento kinde ma piny uru, jupoklembe gioro asikari, giwacu kumae, Wuwek joni cidhi. 36E jakur odkol uyero lembene ni Paolo, ewacu kumae, Jupoklembe gioro ya juwek wucidhi: nie dong’ wuwoki, wuci ma cwinywu kwio. 37Ento Paolo wacu igi kumae, Gifodowa i wang’ dhanu, ma jukupoko lembe mwa rac ungo, ma wan ke wa Jurumi, man gicwaluwa i odkol; e kawono gibewodhowa ling’i? ungone; ento wek gibin giwodhwa woko gin. 38E asikari gidwoko lembe maeni ni jupoklembe: e lworo negogi ka giwinjo nia gi Jurumi; 39e gibino gipaku dhoggi igi; e ka giwodhogi woko, gipenjogi ya giai woko kud i adhura. 40E giai woko kud i odkol gici gimondo i ot pa Ludia: e ka gineno umego, gijukogi, man gicidho.

will be added

X\