Acts 12

1Nie calu nindo maeno Herode m’ubimo rieyo cinge esendo ko jumoko mi kanisa. 2E enego Yakobo m’umin Yohana ku palamularu. 3E kan eneno nia maeni nyayu mutoro i Juyahudi, eyenyo nik emak Petro bende. Ceng’ nino en e ceng’ kwen ma thobi mbe i ie. 4E kan emake de, ekethe i odkol, emie de ni thek asikari ang’wen ang’wen ya gikure; ie wacu ya ebiwodhe ni dhanu yo ng’ei cemo mi Kadhukuwijo. 5Ka kumeno jukuro Petro i odkol: ento kanisa giguro rwo ma tek ni Mungu pire. 6E kinde ma Herode yenyo ewodhe woko, nie dieworne nwang’u Petro nindo kind asikari ario, m’ebedo atwia ku nyoro ario: jukur de ma nyim dhugola gikuro odkol. 7Man nen, malaika pa Rwoth ucungo i vute, der de caru i kusika: man epadu Petro i ng’ete, ecewe ko, ewacu kumae, Ai malu pio. E nyoro gony lwany kum cinge. 8Malaika wacu ire kumae, Twiri, roi wara peri de. E etimo kumeno. Man ewacu ire kumae, Bol kendi peri i kumi, man ilub ng’eya. 9E ewok woko, elube de; ere eng’eyo ngo nia gin ma malaika timo e ya andha, ento ewacu nyo eneno ginmawokiwang’. 10E ka gikadhu thek jukur ma kwong’ane ku mir arionde, giwok dhugang’ mi nyunyu ma mondo i adhura; m’uyabre igi gire kende: e giwok woko, gikadhu kud i yo acel: e eni eni malaika weke. 11E ka wang’ Petro lero, ewacu kumae, Kawono apoi ng’eyo andha, nia Rwoth uoro malaika pare ulara kud i cing’ Herode, man kud i genogen ceke mi dhanu mi Juyahudi. 12E ka ie pido pi lembene, ewok kum ot pa Mariamu ma min Yohana ma julwong’o Marko; ka ma dhanu dupa gicoko ie dhoggi giberwo. 13E kinde m’ebedwong’o dhugola ma dhugang’, nyaku acel ma nyinge Roda ubino winjo. 14E kan eng’io dwand Petro, eyabu dhugola ngo ni anyong’a m’unege, ento eringo emondo, ewacu ya Petro cungo dhugang’. 15E giwacu ire kumae, In i avake. Ento eyero asu nia kumeni andha. Gidong’ giwacu kumae, En e malaika pare. 16Ento Petro bedwong’o asu: e ka giyabu, ginene de, igi wang’ lii. 17Ento en, m’ejukogi ku cinge nia gibed ling’, egonyo igi maram Rwoth uwodhe ko kud i odkol. Man ewacu kumae, Wuyer lembe maeni ni Yakobo, kud umego bende. E eai, ecidho kamange. 18Nie kinde ma piny uru, asikari igi bepido dit kum Petro, ya eni kani. 19E ka Herode yenye, enwang’e de ngo, erondo jukur, man eng’olo ya juneggi anega. Man eai i Yahudi eloro Kaisaria, ebedo kuca de. 20Nie ebedo ku thungo kum dhanu mi Turo ku Sidon: e gibino i bang’e ku cwinygi m’uripo acel, man, ka gidaru camu rimo ku Blasto majakur kusika p’ubimo, gipenjo ya ng’om ukwi, kum ng’om ma thugi tungre ni kum ng’om p’ubimo. 21Nie i ceng’ ma jung’olo Herode ronjre ku kendi mi ker, ejany ko wi komker de, man eting’o lembayera igi. 22Dhanu gigoyo muzira, giwacu kumae, Meni dwand mungu, mi dhanu ngo. 23E ndhu ndhu nica malaika pa Rwoth ugoye, kum emio dwong’ ni Mungu ngo: man ukoko came, cwinye de mwony ndhu. 24Ento lembe pa Mungu meu man emedre. 25E Barnaba giku Saul giai Yerusalem, kinde ma gidaru timotim migi kakare, e gigamu Yohana ma julwong’o Marko gidwogo gikugi.

will be added

X\