Acts 10

1Nwang’u ng’atu moko nuti i Kaisaria, ma nyinge Kornelio, en e jego mir ungu asikari ma julwong’o udul asikari mi Juitaliano, 2en e jabero, en e ng’atu ma lworo Mungu de ku juode ceke, m’ebedemio giramia dit ni dhanu, ebederwo ni Mungu de thiri thiri. 3Eneno ku ginmawokiwang’ ngbeng’, nwang’u ene calu saa mir abung’wen mi ceng’, malaika pa Mungu bino i bang’e, ewacu ire kumae, Kornelio. 4En de, kan enene tel, e lworo make, ewacu kumae, Girang’o, Rwoth? Man ewacu ire kumae, Rwo peri ku giramia peri giidho malu gibedo ni poi i wang’ Mungu. 5Kawono dong’ ior dhanu i Yopa, gici gigam Simon, ma j ulwong’o Petro: 6ebedo ku Simon moko ma jabodho mir adila, ma ode ni dhu nam. 7Ka malaika m’uweco i bang’e ai, elwong’o jutic pare ario m’i ot, kud asikari ma lworo Mungu ma kind ju ma kuro kume thiri thiri; 8e kan eyero gin ceke igi, eorogi i Yopa. 9Nie urwone, ka gibecidho i woth migi, man gidhingo adhura de, Petro idho malu i ot nirwo, calu saa mir abusiende: 10e kec umaku nege, man eyenyo ecam: ento kinde ma gibeyiko cam, e piny urwinyo kude biti; 11man eneno polo yabre, e gin moko beloro calu bongu ma dit, ma julure ku gunde ang’wen i ng’om: 12ma ie ju kwond yedi ceke ma tiendgi ang’wen ang’wen ku gin ma lak i ng’om de ku winyo m’i lietho bende. 13E dwai uwok i bang’e kumae, Ai malu, Petro; ineg icam. 14Ento Petro wacu kumae, Kumeno ngo, Rwoth; kum gin ma swa ku m’ucido de fokacamu ki ngo. 15Dwal uwok i bang’e kendo mir arionde kumae, Gin ma Mungu lonyo kud idwoke ni gin ma swa. 16Gin maeni timbre wang’ adek: e ndhu ndhu nica jugamu jamblur nica i polo. 17Nie kinde ma Petro ie pido dit pi ginmawokiwang’ nia nyo thelembene nik ang’o, nen, dhanu ma Kornelio oro, ma gipenjo ka ot pa Simon, gicungo dhugang’, 18man gilwong’o gipenjo tek Simon ma julwong’o Petro bedo keca. 19E kinde ma Petro bepido pi ginmawokiwang’, Tipo wacu ire kumae, Nen, dhanu adek gibeyenyi. 20Ento ai malu, ilor piny, wuci wukugi, cwinyi kud ubed jiji: kum aorogi an. 21E Petro loro ba joca, ewacu kumae, Nen, an a ng’atu ma wubeyenyo: kum kumeno wubino kum lembang’o? 22Giwacu kumae, Kornelio ma jego, ng’atu ma pwe man ng’atu ma lworo Mungu, pire ber de ba thek dho mi Juyahudi, malaika ma leng’ upoye ya eor julwong’i ibin i ot pare, ewinj lembe i beng’i de. 23E ka kumeno elwong’ogi i bang’e man emio igi kagonjo. E urwone eai malu gicidho gikugi, e umego kucel ma i Yopa de gicidho gikugi. 24Urwone gimondo i Kaisaria. Nwang’u Kornelio bekurogi, ku jupagi ku jurimbe de m’elwong’ogi gicoko dhoggi karacelo. 25E kan etimbre nia Petro mondo, Kornelio girombo gikude, e epodho piny the tiende, man erwo ire. 26Ento Petro ting’e malu, ewacu kumae, Cungi; an de an a dhanu bende. 27E ka gibeweco gikude emondo, enwang’u dhanu dupa de gicokri karacelo: 28man ewacu igi kumae, Wun de wung’eyo giwu nia cik uyio ngo ya ng’atu ma Jayahudi ribre kadi ubin ba ng’atu ma Thekdhanumange; ento Mungu nyutho ira nia kud alwong’ ng’atu moko nia dhanu ma swa kadi m’ucido de: 29kum kumeno abino ku piem ungo ka julwong’a. Die apenjowu pirang’o wuIwong’a. 30E Kornelio wacu kumae, Ceng’ ang’wen m’ukadhu dre unyoni, abekwiro saa mir abung’wende mi rwo i ot para; nen, ng’atu moko cungo i wang’a ku kendi m’urieny, 31man ewacu kumae, Kornelio, rwo peri winjre giramia peri de gibedo ni poi i wang’ Mungu. 32Ka kumeno or juci i Yopa, julwong’ Simon, ma julwong’o Petro bin i beng’i; ebedo i ot pa Simon ma jabodho mir adila, dhu nam. 33Ka kumeno aoro dhanu i beng’i mor mor; man itimo ber nia ibino. Nie ka kumeno wan ceke wanuti keni i wang’ Mungu, kara wawinj lembe ceke ma Rwoth ung’olo iri. 34E Petro alu dhoge, ewacu kumae, Ang’eyo andha nia dhanu bedo tung’ tung’ ungo i wang’ Mungu: 35ento i thek ceke ng’atu m’ulwore, m’utimo bedopwe de, e eyie. 36Lembe ma yang’ eoro ni nyithindho pa Israel m’eyero lembanyong’a mi kwiocwiny kum Yesu Kristu (en e Rwoth mi ceke) 37lembe nini wung’eyo giwu, ma jurweyo cil i Yahudi ceke, uthekre i Galilaya, yo ng’ei baputisi ma Yohana yero; 38en e Yesu ma Nazareti, maram Mungu wire ko ku Tipo Maleng’ ku tego bende: m’ebedewotho ko awotha ku timo ber, ku keyo kum dhanu ceke ma wonabali voyogi; kum Mungu ni kude. 39Wan de wa jumulembe mi gin ceke m’etimo i ng’om mi Juyahudi, kud i Yerusalem; en ma ginege bende, giliere kor yen. 40En ma Mungu ting’e i ceng’ mir adege, emie ya junyuthe, 41ni dhanu ceke re ngo, ento ni jumulembe ma Mungu lar ugoyo wigi, en e wan, ma wacamu wamadhu de wakugi ku yo ng’ei cer pare ma kind ju m’utho. 42Man eng’olo iwa ya wayer ni dhanu, man watuc nia maeni en e ng’atu ma Mungu ketho ya ebed japoklembe mi ju ma kwo ku ju m’utho bende. 43Jubila ceke ginyutho pire, nia ni kum nyinge ku ba dhanu ceke m’uyio ire ebinwang’u ruc mi dubo. 44E kinde ma Petro beyero lembe nini, Tipo Maleng’ ucore wi dhanu ceke ma giwinjo lembe nini. 45E ju ma weg yaa ma giyio igi wang’ lii, kagi ceke ma gibino giku Petrogi, kum giramia ma Tipo Maleng’ ukonjre wi Thekdhanumange bende. 46Kum giwinjo gibeweco ku dhok mange, giyungo ko Mungu. E Petro lund uloko lembe kumae, 47Ng’atu moko copo cero pi, nia ku jumi baputisi ni joni, ma gijolo Tipo Maleng’ calu wani? 48E eng’olo ya jumi igi baputisi ku nying Yesu Kristu. E gilund gikwaye ya eri i bang’gi ceng’ moko.

will be added

X\