3 John 1

1Jadit ni Gayo ma jamer, m’amaru i lemandha. 2Jamer, akwayu nia gin ceke bed miero iri man kumi de bed leng’, cil calu ng’eyong’ec peri de bedo miero. 3Kum anyong’a nega dit, kinde ma umego gibino ginyutho lemandha peri, cil calu ibewotho i lemandha. 4Mutoro mange mbe i bang’a ma sagu maeni, ni lembe mi nyithindho para m’awinjo gibewotho i lemandha. 5Jamer, itimo tic mandha ku ba tic ceke m’itimo ni ju ma gin umego man welo bende; 6ma ginyutho mer peri i wang’ kanisa: m’ibitimo ber tek ibiyiko woth migi calu eromo ku Mungu: 7kum giwok woko ni kum Nying’ nino, ma gigamu gin moko ngo ba Thekdhanumange. 8Ka kumeno maku wajol wagi ju ma kumeno, kara wabed jutic karacelo pi lemandha. 9Agoro lembe moko ni kanisa: endre Diotrefe, m’uyenyo ebed jawipiro, i kindgi de, ebejolowa ngo. 10Ka kumeno, tek abino, abipoi kum tic pare m’etimo, m’ebeyero ko lembe ma rac i kumwa: man cwinye cungo kum maeni ngo, kadi en ku kite de ejolo umego ngo, man ju ma giyenyo de ekwerogi man ewodhogi woko kud i kanisa. 11Jamer kud ikwany ba gin ma rac, endre ikwany ba gin ma ber. Ng’atu m’utimo ber en e pa Mungu: ng’atu m’utimo rac nwang’u fodi eneno Mungu ngo. 12Demetrio bedo ku giranyutha mi dhanu ceke, ku mi lemandhane de: eyo, wan bende wanyutho; man in de ing’eyo nia lembe ma wanyutho en e andha. 13Nwang’u abedo ku lembe dupa m’agor iri endre ayenyo ngo nik agor iri ku vino man kalamu mi vino: 14ento ageno ya fodi nyanok abineni, man wabiweco ma wanendra ku wang’wa. 15Dong’ ibed ma cwinyi kwi. Jurimo gimothi. Moth jurimo ku nying’gi ku nying’gi.

will be added

X\