2 Timothy 2

1Ka kumeno in, nyathin para, bed ku tego i bero ma ni i Kristu Yesu. 2Man gin m’iwinjo i bang’a i kind jumulembe dupa, lembene dong’ imi ni jumandha, ma gibicopo ponjo dhanu mange bende. 3Ibed jacir can wakudi, calu asikari ma ber pa Kristu Yesu. 4Asikari moko mbe ma tek eni i tic m’etwire gire ku lembe mi kwo maeni; kara enyai mutoro i ng’atu m’ugoro nyinge ya ebed asikari. 5Tek ng’atu moko beponjo ya esag i piem m’abola, enwang’u jamkermiwic ungo, tek etime kacikne ngo. 6Jatipodho m’etio tic ekoelar egamu kum nying yenne be. 7Ii pid pi gin m’ayero; kum Rwoth bimio iri ng’eyong’ec i gin ceke. 8Poi kum Yesu Kristu, m’eai ku kind ju m’utho, mi kodhi pa Daudi, calku lembanyong’a para ma juboth ko: 9i lembene abesendra cil i kol, calu ng’atu ma jugonjo agonja; ento lembe pa Mungu bedo atwia ngo. 10Kum kumeno aciro gin ceke pi ju ma jugoyo nying’gi, kara gin bende ginwang’ both ma juboth ko ma ni i Yesu Kristu karacelo ku dwong’ ma nja ku nja de. 11Maeni lemandha: Kum tek watho wakugi, wabibedo kwo bende wakugi: 12tek wamula ku cani, wabicamu ker wakugi: tek wabikwere, en bende ebikwerowa: 13tek wan wa jumandha ngo, en re en e mandha; kum ecopo kwere gire ngo. 14Poigi kum gin maeni, ng’ol igi i wang’ Rwoth, kara ku gipiem piem kum lembe, ma kulokane mbe, ma biketho ju ma giwinjo gikier. 15Dong’ itim kud amora m’inyuthri ko ni Mungu, ya in i ng’atu m’efoyo, jatic ma lewic umbe i wie, m’upoko lembe mandha cu. 16Endre dong’ ikoc woko kum wec mananu mir acidi: kum gibisagu asaga ku cidho i lembe ma ayi Mungu mbe i kume, 17e lembe migi binyai pamir adhola: Humenayo giku Feleto de gini i kindgi; 18gi ju ma gikier kum lemandha, ku wacu ma giwacu ko ya cer ma ju m’utho cer ko daru kadhu, man ging’ielo yioyic mi jumoko woko. 19Ento ther ukungu lembe pa Mungu cungo ki, m’ebedo kud ayi mae, Rwoth uug’eyo ju ma gi jupare: man, dong’ dhanu ceke kubang’gi kubang’gi ma gilwong’o nying Rwoth giwek tic ma en e tic mi bedopwe ngo. 20Anie i ot ma dit tabu ku bedo tabu mi mola ma kwar kadi mi mola ma tar kende ngo, ento mi yen ku mir ulobo bende; moko bedo mi yung, moko ke m’umbe yung. 21Ka kumeno tek ng’atu moko lwokre gire kum giki maeni, ebibedo tabu mi jambyung, m’udwokre leng’, m’uromo ku tic pa Rwoth, m’ubedo ayika ni tic ceke ma ber. 22Ento dong’ iring awanya ma rac mir ayada, man ilub tok tic ma ber, ku yioyic, ku mer, ku kwiocwiny, karacelo ku ju m’ulwong’o Rwoth ku i adundegi ma leng’. 23Ento kwer penji ma kite mbe, ku ma sang’na bende, m’ing’eyo ko nia ginyayu dhau. 24Man ke jamiru pa Rwoth maku kud edhau, ento ebed yo ni dhanu ceke, ku ng’eyo rieko mi ponji, ku reyo lembe de i tielo, 25ku ponjo ju ma piwu nge kugi ku molcwiny; kuno nyo Mungu bimio igi lokocwiny cil ku ng’eyong’ec mi lemandha, 26kara giai gigi kud i uwic pa wonabali, m’edaru makugi ni ayeki ni yeny ma ie yenyo.

will be added

X\