2 Timothy 1

1Paolo, ma jakwenda pa Yesu Kristu ku yeny ma Mungu yenyo, calku lembang’ola mi kwo ma ni i Yesu Kristu 2ni Timoteo, ma nyathin para ma jamer: bero, ku kisa, ku kwiocwiny, m’uai ba Mungu ma Wego ku Kristu Yesu ma Rwoth mwa ubed iri. 3Afoyo Mungu, m’atimo ire ku pidocwinya ma leng’ ugambre kum kwara, ma ia kuweko poyo piri ngo i kwac para m’akwayu, diewor ku dieceng’ de 4ma ava nenoi benega, ma ia bepido kum piweng’i, kara anyong’a nega; 5m’apoi ko pi yioyic ma abombi mbe i ie ma ni ii; m’ular ubedo i wang’u ma Lois, man i meru ma Eunike; man, ang’eyo andhandha ya eni ii bende. 6Kum lembe nini apoyoi ya iyau giramia pa Mungu, ma ni ii m’inwang’u ni kum cinga m’aketho. 7Kum Mungu ku mio iwa cwiny mi lworo ngo; ento mi tego, ku mi mer, ku kweri ma jukweri ko gijo. 8Ka kumeno lewic kud unegi kum lembatuca pa Rwoth mwa, kadi i kuma de m’a jakol pare: ento dong’ ibed jacir masendi ma wok kum lembanyong’a ma juboth ko calku tego pa Mungu; 9m’elaruwa, m’elwong’owa de ku lwong’o ma leng’, ni kum tic ma watimo wan ungo, ento calu ie yenyo en ku bero, m’umire iwa ni kum Kristu Yesu ku kwong’a, 10ento kawono dong’ edaru nyuthre ni kum kawok ma Jalar mwa ma Yesu Kristu wok ko, m’ekabu tho, m’ekelo kwo, man kwo ma rondo ku rondo i der ni kum lembanyong’a ma juboth ko, 11kum lembe nini juketha ni jayer lembe, man jakwenda, man japonji bende. 12Kum lembe nini abemula ku can kum giki maeni bende: endre lewic ubenega ngo; kum ang’eyo ng’atu m’ayio, man ang’eyo andhandha nia ecopo gwoko lembe m’aketho i kore cil i ceng’ maeca. 13Ceri wi kit lembe ma cu m’iwinjo i bang’a, ku yioyic ku mer ma ni i Kristu Yesu. 14Gin ma ber maeni ma juketho i kori no gwoke ku Tipo Maleng’ m’ubedo i iwa. 15Ing’eyo eni, nia ju ma gini i Asia ceke ging’eny i kuma; Fijelo giku Hermogene de gini i kindgi. 16Dong’ kisa neg Rwoth kum juot pa Onesiforo: kum edwoko cwinya wang’ udul, lewic de kunege ngo kum nyoro para; 17ento, kan eni i Rumi, eyenya kle kle, man enwang’a 18(dong’ Rwoth ubin uketh enwang’ kisa i bang’e i ceng’ maeca); man kwai gin dupa m’ebederimo ira i Efeso, in ing’eyo cu.

will be added

X\