2 Thessalonians 3

1Aha a, umego, dong’ wurwo piwa, kara lembe pa Rwoth uringi man edok dwong’, cil calu ebedo bende kudu; 2man kara wabodhra ni dhanu m’udhuko ma gi judubo bende; kum dhanu ceke bedo ku yioyic ungo. 3Ento Rwoth en e mandha, m’ebiketho wunyang’, m’ebigwokowu de ni ng’atu ma rac. 4Man wabedo ku genogen i Rwoth piwu, ya wutimo man wubitimo gin ma wang’olo. 5Dong’ Rwoth utel adundewu i mer pa Mungu, man i twiocwiny pa Kristu. 6Nie wang’olo iwu, umego, ku nying Rwoth mwa ma Yesu Kristu, ya wukoiru giwu ni umego kubang’gi nzu ma giwotho ariri swa, man gilubo ponji ma gijolo i bang’wa ngo. 7Kum wung’eyo giwu maram maku wukwany ko kothwa: kum watimbra swa ngo i kindwu, 8kadi wacamu kwen mananu de ngo i cing’ ng’atu moko, ento i muli mi tic man i sendri, watimo diewor ku dieceng’, kara ku wanur ng’atu moko m’i kindwu: 9en e kum nia ng’ol umbe kudwa ngo, ento kara wadwokra ni por iwu, kara wukwany kothwa. 10Kum cil ma fodi wanuti wakudu, wang’olo iwu maeni kumae, Tek ng’atu moko kwero timo tici, kadok acama de kud ecam. 11Kum wawinjo pi jumoko m’uwotho i kindwu ariri swa, ma gitimo tic ki ngo, ento gi juthubganda. 12Nie wagi joni wabeng’olo man wajuko i Rwoth Yesu Kristu, nia gitim tic ling’ ling’, man gicam kwen migi ma dhe. 13Ento wun, umego, kud wuol ku timo ber. 14Man tek ng’atu moko woro lembe mwa ma i waraga nini ngo, wunen ng’atuca, kara kud wuribru wukugi, kara lewic unege. 15Ento kud wukwane calu jadegi, endre wujuke calu en e umego. 16Nie dong’ Rwoth mi kwiocwiny en emi iwu kwiocwiny i nindo ceke i yo ceke de. Dong’ Rwoth ubed kudu ceke. 17Moth para an a Paolo gira ku cinga, ma en e giranyutha ku ba waraga ceke: kumeno agoro. 18Bero pa Rwoth mwa Yesu Kristu bed kudu ceke.

will be added

X\